Numbers 19

Lugbara (E’yo Siza Alatararu Munguniri BIBLIA)

← Chapter 18 Jump to: Chapter 20 →

1Yehova nga di ’yo Musa pi ma tia Aroni be, kini,

2Azita Yehovani azileri ma e’yo azizaruri ’di, kini, Mi ’yo anzi Israelini ma tia, yi ma eji tikari ekaru nyibile kokoru, ezata kokoru, pati kulumburu ’izu nga ombelenia kuri.

3Emi ma fe eri Eleazari edeta edepiri dri, eri nga ani eri ji pari ’bani hema asozuri ma tia amve, ’ba azini nga eri li eri milia ’daa.

4Eleazari edeta edepiri nga di i drileju su arini ma alia, nga ari nde oya hema ti ecizaniri ma drilealeru paleko aziri.

5’Ba nga di tikari nde eve eri ma milia, ma eve enyirikoni pi, zani pie, arini pie, yamanakani pie dria;

6’ba edeta edepiri nga mario pati ma bidrile pi o’du, ediko bi pie, baka ekaruri pie, nga yi o’be ad tikari evezuri ma alia.

7’Ba edeta edepiri nga di i ma bongo oji, nga i ma rua oji yisi raka, nga fi pari ’bani hema asozuria ndo; te ’ba nde edeta edepiri nga ovu alatara kokoru kpere ondresi.

8’Ba eri evepiri nga i ma bongo oji yisi, nga vini i ma rua oji yisi, nga ovu alatara kokoru kpere ondresi indi.

9’Ba alaruri nga tikari nde ma ofuta omvu, da pari ’bani hema asozuri ma tia amve, pari alaruri ma alia; yi nga tani mba anzi Israelini ongulumuru ’diyi dri, ovuzu yi onzi ojizuriru; eri edeta e’yo onzi edezuri’i.

10Te ’ba tikari ma ofuta omvupiri nga i bongo oji, nga ovu alatara kokoru kpere ondresi. E’yo ’diri nga ovu anzi Israelini piyi dri azitaru ani’bo ovupi yi ma eseliari be ’dani ’dani.

11’Ba avu ’bani elopiri nga ovu alatara kokoru o’du aziri;

12o’du naria agu nde ma oji i alaru yi ndesi, eri nga di ani ovu alaru o’du aziririsi; te eri ka i oji alaru o’du naria ku, ngani ovu alaru o’du aziririsi ku.

13’Ba ka a’di’i yari ti, ka ’ba drapiri ma avu elo, te ka i rua oji alaru ku, eri bere Yehovani eza ra, ma ja ’ba nderi ma dri Israeli ma eseliasi ra; eri nga ovu alatara kokoru yini yi onzi ojizuri oyale eri ma dria kurisi, ondiniri nga kiri ovu eri ma dria’dani.

14’Ba azini ka dra hema ma alia jazitaniri ’di: ’ba dria fipi hema nde ma alia ’diyi pi, ’ba dria ovupi hema ma alia ’diyi be, nga ovu alatara kokoru o’du aziri.

15Afazu dria ti be mgboru, ’bani tini opile afa ti opizurisi kuri ovu alatara kokoru.

16Te ’ba dria ovupi asea amve, ’ba fule seisiri ma avu elopiri, kani avu azini, kani ’ba ma falako, kani nyadri, eri nga ovu alatara kokoru o’du aziri.

17’Ba alatara kokoru ’diyi ma e’yosi yi nga edeta e’yo onzi edezuri ma ofuta ndi, nga yi ara ma yi be drinia imvu ma alia;

18’ba azini alaruri nga ediko bi ’du, nga eri su yi nde ma alia, nga eri oya hema nderi pi ma dria, afazu dria alenia ’diyi pie, ’ba ndra ovupi ’daa ’diyi pie dria, nga vini eri oya ’ba falako, kani ’ba avu, kani ’ba drapiri, kani ’ba nyadri elopiri ma dria.

19’Ba alaruri nga yi nderi oya ’ba alatara kokoruri ma dria o’du naria, azini o’du aziriria, ’dini o’du aziririsi eri nga eri ’ba alaru, vutinia eri nga i ma bongo oji yisi, nga vini i ma rua oji yisi ondresi, eri nga di ovu alaru beni.

20Te ’ba ovupi alatara kokoru lepi i ’bapi alaru kuri, ’ba ma ja agu nderi ma dri ’ba ongulumuru ma eseliasi ra, erini pari alatararu Yehovaniri ezalerisi; ’bani yi onzi ojizuri oyale drinia kurisi, eri ala tara kokoru.

21Eri nga ovu yi dri azitaru ’dani ’dani. ’Ba yi onzi ojizuri oyapiri nga i ma bongo oji ra; te ’ba azini yi onzi ojizurini tizu ruaniari nga ovu alatara kokoru kpere ondresi.

22Afa dria ’ba alatara kokoruni elole ’diyi nga ovu alatara kokoru; azini ’ba afa nde elopiri nga ovu alatara kokoru kpere ondresi.

← Chapter 18 Jump to: Chapter 20 →