Numbers 24

Lugbara (E’yo Siza Alatararu Munguniri BIBLIA)

← Chapter 23 Jump to: Chapter 25 →

1Balamu ka ndre Yehova le asi ndriza fe Israeli dri ra, eri muni ekile ndra okorile andri ndrizasi ku, te eri ’ba i mile angu roko driari vuleru.

2Balamu nga i mile enga uru, nga Israeli ndre yini riria suru yini vusi suru yini vusi; Orindi Munguni nga di eca eri ma dria.

3Eri nga e’yo olu e’yo o’bezasi, kini, Balamu Beori mvi ’yo ra, agu milenini i zizuri kini,

4’ba e’yo Munguni ’yoleri eripi, afa ndreza Mungu Okpoe’ini ndrepiri ’yo ra, erini i ecoria va, de milenini i ziria mgboru ’dani, kini:

5Yakobo la, hema mini yi onyiru tu ’doni ya! Israeli la, bere mini yi onyiru tu ’doni ya

6Yi aja yi ekile e’buti ’diyile walaru, ekile amvu yi tia ’diyile, ekile pati arikariru Yehovani isile ’diyile, ekile mario yi tia ’diyile.

7Yini nga ra yile mvu erini ’diyi ma aliasi, ori eriniri nga ovu yi kakau ma alia, opi eriniri nga ovu uru aga Agagini ra, opi nyaza erini nga ovu inzizaru uru.

8Mungu ofu eri Misiriasini; eri ovu okpo be ekile odru ma okpole, eri nga suru eri ma ari’baru ’diyi oki ra, eri nga yi ma fala onyo nyingiriki, eri nga yi ogbi lekeke lekeke ’ye ini ’diyisi.

9Eri avu va, la i va kamile, ekile kamiandrile, a’dini nga eri enga uruni ya? ’Ba dria asi ndriza fepi mi driri ovu asi ndriza be, ’ba dria mi tripiri ovu trizaru.

10Balaki nga di ovu adrasi Balamu be, eri nga i dri sa sa; Balaki nga ’yo Baramu ma tia, Ma omve mi ari’ba mani otrizu, te mi ndre, mi fe yi dri asi ndriza teketeke pale na ’di.

11Te curu’do mi ma apa mi paria vile; ma ega te ma nga mi idri inzita isuzu amboru tu, te mi ndre, Yehova oga mi inzita isuko si.

12Balamu nga di ’yo Balaki ma tia, Ma ’yoni vini ndra ojio mini, mini ti pele ma vu ’diyi ma tia, kini,

13Balaki ka te tro i ma jo gapi dahabu pisi mele be treri fe’i ti, ma econi agazaru e’yo Yehovani ’yoleri drisi ku, mani ani e’yo onyiru kani e’yo onzi ’yezu ma drisi, te e’yo Yehovani ’yoleri ma nga ’yo’i’diniri ku ya?

14Curu’do ma di mvi ’ba mani vu mvi mvi; te di, ma nga e’yo suru ’dorini ngale ’yele suru mini vu ewu vilerisiri olu mi tia ra.

15Eri nga e’yo olu e’yo o’bezasi kini, Balamu Beori mvi ’yo ra, agu milenini i zizuri kini,

16’ba e’yo Munguni ’yoleri eripi, Mungu Uru Turi ma nita nipi, afa ndreza Okpoe’ini ndrepiri ’yo ra, erini i ecoria va, de milenini i ziria mgboru ’dani, kini:

17Ma eri ndre ra, te curu’do ku; ma eri lu ra, te ogogo ku: ’bi’bioni nga efu Yakobo ma aliasi, kali opiniri nga enga Israeli ma alia, ngapi Moabu ma kalati copi co, ngapi anzi iyikiyi zopi ’diyi onyopi vari’i.

18Edomuni nga ovu afa yini pule yi ma afaruri, Seiri ndra eri ma ari’baru ’diyi nga vini ovu afa yini pale yi ma afaruri, de Israelini e’yo ’yeria asi agupisiria.

19’Ba efupi Yakobo ma aliari nga opi nyani, nga ’ba joloko acepi akua ’diyi dri ja ra!

20Eri nga di lu ’ba Amalekini vu, nga e’yo olu e’yo o’bezasi kini, Amalekini ndra suru ’diyi ma okoruri’i, te asiza erini vileri nga ca dri jazaru.

21Eri nga lu ’ba Kenini vu, nga olu e’yo o’bezasi kini, Pari mini ovuzuri ovu okporu, mi ’ba jorovu mini oni eselia ’bo;

22te ti, yi nga Kainini eza ra, cazu kpere Asurini ngazu mi jizu ati’boruria.

23Eri nga e’yo olu e’yo o’bezasi kini, Eyawaye! a’dini nga ovu idriru Munguni ngaria e’yo ’diri ’yeria ya?

24Te oguru yi nga emu yikuti Kitimuariasi, yi nga Asurini inza, azini yi nga Eberini inza; eri nga vini dri ja indio

25Balamu nga di nga ra, nga dri ko mvizu i vile angua; Balaki nga vini alu mvi i ma gerisi indi.

← Chapter 23 Jump to: Chapter 25 →