Numbers 31 — Lugbara (E’yo Siza Alatararu Munguniri BIBLIA)

2Mi fe anzi Israelini ma ofe arioti ’ba Midianini ma ruaa; mi nga mu ’ba mini odrapi ’bo ’diyi vu ndo.

3Musa nga di ’yo ’ba ma tia kini, Emi fe ’ba emi eselia ’diyi ma osu afa ombani a’di ’dizu, yi ma mu a’di ’di ’ba Midianini be Yehova ma arioti ofezu ’ba Midianini ma ruaa.

4Emi ma pe ’ba ma ti a’di ’dizu alifu alu alifu alu suru vusi suru vusi, engazu suru Israelini dria ma eselia.

5Yi nga di ’ba alifu mudri drini iri afa ombani be yi ruaa ’diyi fe, engazu ’ba Israelini alifu kakau ’diyi ma eselia, suru vusi suru vusi ’ba alifu alu alifu alu.

6Musa nga yi ti pe muzu a’dia suru vusi suru vusi ’ba alifu alu alifu alu, yi kuhani Finehasi Eleazari mvi be, muzu afazu pari alatararuria ’diyi pi be eri ma dria guka yule alicerele ’diyi pie.

7Yi nga di a’di ’di ’ba Midianini be ekile Yehovani azile Musa ma tiarile, yi ofu ’ba agupiru ’diyi dria ra.

8Ofu ’ba opiru ’ba Midianini ma drilia ’diyi indi ’ba yini ofule ’diyi be tualu, yi Evi pi, Rekemu pi, Zuri pi, Huri pi, Reba pie, yi opi ’ba Midianini ma drilia towi ’diyi; yi fu vini Balamu Beori mvini seisi indi.

9Te anzi Israelini obi oku Midianini ’diyi pi ati’baru, anzi yini nyiri nyiri pie; opa anyapa yini dria yi ma afaru, anyapa yini nyiri ’diyi pie, afa yini akua ’diyi pie dria.

10Yi odu aku yini ambo ambo pari yini adrizuria ’diyi pi ma ti dria acisi, pari yini hema asozu ’diyi be.

11Yi wu afa dria, afa yini opale ombaa ’diyi be, kani ’bani kani anyapani.

12Yi nga di ’ba obile ati’baru ’diyi pi, afa yini opale ombaa ’diyi pie, afa yini wule ’diyi pie dria wu ji Musa pi vu kuhani Eleazari pie, anzi Israelini ongulumuru ’diyi pie dria, pari yini hema asozu angu dala Moabunia ovupi Yoridani ma tia, Yerikoaria.

13Musa pi, kuhani Eleazari pie, ’ba opiru dria ’ba ongulumuru ma drilia ’diyi pie nga fu mu dri fuzu yi be pari hema asozuri ma tia amve.

14Musa ovu adrasi ’ba asikari ongulumuru ma drilia ’diyi be, yi ’ba alifu alifu ma drilia, kani ’ba turu turu ma drilia, ibipi emvipi ombaa ’diyi.

15Musa nga zi yi ma tia, Emi opa oku dria idriru ya?

16Mi ndre, e’yo amaza Balamunisi oku ’diyi fe ndra anzi Israelini e’yo ezazu Yehova vu e’yo Peorinisi, ’dini azo muani nga ndra ovu ani ’ba ongulumuru Yehovani ma eselia.

17E’yo ’disi emi ma ofu agupianzi dria anzi nyiri ma eselia, azini oku dria yi ecipi agupi be ’bo ’diyi indio

18Te emi ma opa ezoanzi yi ecipi nga agupi be ku ’diyi idriru emi ngulupi dri.

19Emi ma aso hema emini pari hema asozuri ma tia amve o’du aziri; ’ba dria emi eselia ’ba ’dipi kai, kani ’ba avu elopi ’diyi, emi’i ’ba emini obile ati’baru ’diyi be, emi ma ’ba emi alaru o’du nari pia o’du aziriri be.

20Emi ma ’ba emi alaru bongo dria ma e’yosi, afa dria edele enyisi ’diyi pie, afa dria cale ndri ma podosi- ’diyi pie, afa dria edele patisi ’diyi pie dria.

21Kuhani Eleazari nga ’yo ’ba ombani mupi a’dia ’diyi ma tia, Azita Yehovani azile Musa ma tiari ma e’yo azizari’di:

22te mele pi, dahabu pie, mola pie, aya pie, aya emveruri pie, aya nzizaruri pie,

23afa dria ecopi aci ma okpo ndepi ra ’diyi, emi osu aci, yi ma efu alaru beni. Te ma ’ba afa nde alaru yi afa ma onzi ojizurisi indi; azini emi ma osu afa dria ecopi aci ma okpo ndepi ku ’diyi yia.

24Emi ma oji emi bongo o’du aziririsi, emi nga ovu ani alaru; emi nga di fi pari hema asozuria ndo.

25Yehova nga ’yo Musa ma tia kini,

26Emi ma la afa yini opale ombaa ’diyi ma kalafe, kani ’bani kani anyapani, emi kuhani Eleazari be, ’ba ’ba ongulumuru ma eselia suruti yi ma a’bipini ma drilia ’diyi pie;

27emi ma awa afa opaza nderi esele be iri, eri awazu ’ba omba ma onduouru mupi ndra a’dia ’diyi pi ma eselia ’ba dria ongulumuru ’diyi be.

28Emi oku vini musoro Yehova dri ’ba ombani mupi ndra a’dia ’diyi vu, ’ba turu towi ma eselia ’ba alu, kani ’bani kani tini kani akanyani kani kabiloni;

29emi ma o’du afa ’diyi esele awaza yiniri ma alia, fezu kuhani Eleazari dri ovuzu edeta e’dule uru Yehova dririru.

30Te engazu esele awaza Israeli anzipiniri ma alia, mi ma o’du kali towi kali towi ma eselia alu alu, kani ’ba ma eselia, kani tini kani akanyani kani anyapa nyiri ’diyi, adani anyapa dria ma eselia, fezu ’ba Levini bere Yehovani ma azi ngapi ’diyi dri.

31Musa pi kuhani Eleazari be nga di ’ye ekile Yehovani azile Musa dririle ra.

32Isu de afa opaza omba ma alia ’ba ombani ’diyini opale ’diyi ma kalafe acepiri ’di kabilo alifu turu azia drini kali aziri drini towi,

33ti alifu kali aziri drini iri,

34akanya alifu kali azia drini alu,

35te ’baruni, ezoanzi yi ecipi nga agupi be ku ’diyi ma kalafe driari alifu kali na drini iri.

36Afa ’diyi ma esele awale ’ba mupi omba ’bapi ’diyiniri ’di, kabilo alifu turu na drini kali na drini aziri drini turu i towi,

37musoro Yehovani kabilo ’diyi ma eseliari eri kabilo turu azia drini kali aziri drini towi.

38Ti yi alifu kali na drini azia; yi ma eselia musoro Yehovaniri ti kali aziri drini iri.

39Akanya yi alifu kali na drini turu towi; yi ma eselia musoro Yehovaniri akanya kali azia drini alu.

40Te ’ba yi alifu mudri drini azia; yi ma eselia musoro Yehovaniri ’ba kali na drini iri.

41Musa nga di musoro nde ovupi edeta e’dule uru Yehova dririruri fe kuhani Eleazari dri, ekile Yehovani azile Musa tiarile,

42Te engazu esele awaza Israeli anzipini, Musani awale ndu esele awale ’ba mupi omba ’bapi ’diyiniri beri ma eselia-

43de isu esele awaza ’ba ongulumuru ’diyiniri ’di, kabilo alifu turu na drini kali na drini aziri, drini turu towi,

44ti alifu kali na drini azia,

45akanya alifu kali na drini turu towi,

46’ba alifu mudri drini azia-

47ada, esele awaza Israeli anzipiniri ma eselia Musa nga kali towi kali towi ma eselia alu alu ’du, kani ’bani kani anyapani, nga yi fe ’ba Levini bere Yehovani ma azi ngapi ’diyi dri ra; ekile Yehovani azile Musa tiarile.

48’Ba ’ba dri cepi ’ba ombani alifu alifu ma drilia ’diyi, yi ’ba ’ba alifu alifu ma dri cepi ’diyi pie, ’ba ’ba turu turu ma dri cepi ’diyi be, yi nga esi Musa vu ogogo,

49yi nga ’yo Musa tia, Ama ati’ba mini, ama la te ’ba omba ’bapi ama palaa ’diyi ma kalafe ’bo, te ’ba ama eselia aluni avipini yo.

50Ka’dini ama eji afa ’ba driani isule ’diyi ma azi afa feza Yehovaniru ’do, onyiafa meleru ’diyi pi, emve pie, ocoko pie, driadriamva eceta be ’diyi pie, nzia bia ’diyi pie, gbaala wua ’diyi pie, orindi amani ma e’yo onzi edezu Yehova ma drilia.

51Musa pi kuhani Eleazari be nga mele nde a’i yi driasi, adani onyiafa onduouni edele ’diyi dria.

52Edeta e’dule ururi ma mele dria yini fete Yehova dri, adani ’ba ’ba alifu alifu ma dri cepi ’diyi pini fele ’ba ’ba turu turu ma dri cepi ’diyi beri ma kalafe ovu sekeli alifu mudri drini azia drini turu aziri, drini kali towi.

53(De isu ’ba omba ’bapi ’diyi alu alu opa ndra afa azini yi ma ngulupiniru indi.)

54Musa pi kuhani Eleazari be nga di mele nde a’i ’ba ’ba alifu alifu ma dri cepi ’diyi pi ma driasi ’ba ’ba turu turu ma dri cepi ’diyi be, nga yi ji hema ti ecizaniri ma alia, afa e’yo egazuriru anzi Israelini dri Yehova ma drilia.