Joshua 11

Lao Bible 2012 (ພຣະຄຳພີສັກສິ)

← Chapter 10 Jump to: Chapter 12 →

1ເມື່ອເຈົ້າຢາບິນກະສັດແຫ່ງຮາໂຊ ໄດ້ຍິນເຖິງໄຊຊະນະຂອງຊາວອິດສະຣາເອນ ເພິ່ນກໍໄດ້ສົ່ງຄົນໄປບອກເຈົ້າໂຢບັບກະສັດແຫ່ງມາໂດນ, ກະສັດແຫ່ງຊີມໂຣນ ແລະກະສັດແຫ່ງອັກຊັບ

2ແລະບັນດາກະສັດທີ່ຢູ່ຕາມເຂດເນີນພູທາງພາກເໜືອ, ຢູ່ທາງຮ່ອມພູຈໍແດນໃຕ້ທະເລສາບຄາລີເລ, ຢູ່ຕາມຕີນພູ ແລະຢູ່ຕາມຝັ່ງທະເລໃກ້ກັບເມືອງໂດເຣ.

3ແລ້ວເພິ່ນກໍຍັງສົ່ງຄົນໄປບອກຊາວການາອານ ທີ່ຢູ່ທາງສອງຟາກຂ້າງຂອງແມ່ນໍ້າຈໍແດນຄື: ຊາວອາໂມ, ຊາວຮິດຕີ, ຊາວເປຣີຊີ ແລະຊາວເຢບຸດທີ່ຢູ່ຕາມເນີນພູ ຕະຫລອດທັງຊາວຮີວີທີ່ຢູ່ຕາມຕີນພູເຮີໂມນໃນດິນແດນມີຊະປາ.

4ພວກເຫຼົ່ານີ້ ໄດ້ມາພ້ອມດ້ວຍທະຫານທັງໝົດຂອງພວກຕົນ ເປັນກອງທັບທີ່ປະກອບດ້ວຍຄົນຢ່າງຫລວງຫລາຍ ດັ່ງເມັດຊາຍຕາມແຄມຝັ່ງທະເລ. ພວກເຂົາມີທັງມ້າແລະລົດຮົບຢ່າງຫລວງຫລາຍ.

5ກະສັດທັງໝົດເຫຼົ່ານີ້ໄດ້ມາໂຮມກັນຕັ້ງຄ້າຍພັກທີ່ຫ້ວຍນໍ້າເມໂຣມ ເພື່ອຕໍ່ສູ້ພວກອິດສະຣາເອນ.

6ພຣະເຈົ້າຢາເວໄດ້ກ່າວແກ່ໂຢຊວຍວ່າ, “ຢ່າຢ້ານພວກເຂົາ ເພາະມື້ອື່ນໃນເວລາດຽວກັນນີ້ ເຮົາຈະຂ້າພວກເຂົາທັງໝົດໃຫ້ຊາດອິດສະຣາເອນ. ໃຫ້ເຈົ້າຕັດເອັນຄະນ່ອງມ້າ ແລະຈູດລົດຮົບຂອງພວກເຂົາຖິ້ມ.”

7ດັ່ງນັ້ນ ໂຢຊວຍພ້ອມດ້ວຍທະຫານທັງໝົດຂອງຕົນ ຈຶ່ງຫລອນໂຈມຕີພວກເຂົາທີ່ຫ້ວຍນໍ້າເມໂຣມ.

8ພຣະເຈົ້າຢາເວໄດ້ໃຫ້ພວກອິດສະຣາເອນມີໄຊຊະນະ. ພວກອິດສະຣາເອນໄດ້ໂຈມຕີ ແລະໄລ່ຕິດຕາມພວກເຂົາໄປທາງທິດເໜືອໄກສຸດ ຈົນເຖິງເມືອງມີສະເຣໂຟດມາອີມແລະຊີໂດນເມືອງໃຫຍ່ ແລະໄປທາງທິດຕາເວັນອອກໄກສຸດ ຈົນເຖິງຮ່ອມພູຂອງເມືອງມີຊະປາ. ການສູ້ຮົບໄດ້ດຳເນີນໄປ ຈົນກວ່າເຫຼົ່າສັດຕູໄດ້ຖືກຂ້າໝົດສິ້ນ.

9ໂຢຊວຍໄດ້ເຮັດຕໍ່ພວກເຂົາຕາມທີ່ພຣະເຈົ້າຢາເວໄດ້ສັ່ງ ຄືຕັດເອັນຄະນ່ອງມ້າແລະຈູດລົດຮົບທັງໝົດຂອງພວກເຂົາຖິ້ມ.

10ແລ້ວໂຢຊວຍກໍຍົກທັບກັບຄືນມາຢຶດຄອງເມືອງຮາໂຊ ແລະຂ້າກະສັດຂອງເມືອງນີ້. (ໃນຄາວນັ້ນ ຮາໂຊເປັນອານາຈັກທີ່ມີອຳນາດເໜືອຣາຊອານາຈັກຕ່າງໆ).

11ພວກເຂົາໄດ້ຂ້າທຸກໆຄົນ ແລະບໍ່ໄວ້ຊີວິດໃຜເລີຍ ພ້ອມທັງໄດ້ຈູດເມືອງຖິ້ມດ້ວຍ.

12ໂຢຊວຍໄດ້ຢຶດຄອງເມືອງຕ່າງໆ ທັງຈັບເອົາກະສັດຂອງເມືອງເຫຼົ່ານີ້. ເພິ່ນໄດ້ຂ້າທຸກໆຄົນຕາມທີ່ໂມເຊຜູ້ຮັບໃຊ້ຂອງພຣະເຈົ້າຢາເວໄດ້ສັ່ງໄວ້.

13ແຕ່ໂຢຊວຍບໍ່ໄດ້ຈູດເມືອງຕ່າງໆຕາມໂຄກຕາມເນີນ ເວັ້ນໄວ້ແຕ່ເມືອງຮາໂຊພຽງເມືອງດຽວ.

14ປະຊາຊົນອິດສະຣາເອນໄດ້ຢຶດເອົາສິ່ງຂອງຕ່າງໆອັນມີຄ່າ ຕະຫລອດທັງຝູງສັດໃນເມືອງເຫຼົ່ານີ້ມາເປັນຂອງຕົນເອງ ແລະພວກເຂົາໄດ້ຂ້າທຸກໆຄົນໂດຍບໍ່ໄວ້ຊີວິດໃຜເລີຍ.

15ພຣະເຈົ້າຢາເວໄດ້ສັ່ງໂມເຊຜູ້ຮັບໃຊ້ຂອງພຣະອົງຢ່າງໃດ ໂມເຊໄດ້ສັ່ງໂຢຊວຍຢ່າງນັ້ນ ແລະໂຢຊວຍກໍປະຕິບັດຕາມທີ່ພຣະເຈົ້າຢາເວໄດ້ສັ່ງໄວ້ກັບໂມເຊທຸກປະການ.

16ໂຢຊວຍໄດ້ຍົກທັບໄປຢຶດຄອງດິນແດນທັງໝົດ ຄືດິນແດນຕາມເຂດເນີນພູ ແລະຕາມຕີນພູທາງທິດເໜືອແລະທິດໃຕ້, ເຂດໂກເຊັນທັງໝົດກັບດິນແດນທີ່ແຫ້ງແລ້ງທາງທິດໃຕ້ຂອງເຂດນັ້ນ, ຕະຫລອດທັງຮ່ອມພູຈໍແດນດ້ວຍ.

17ເຂດແດນນັ້ນໄດ້ຂະຫຍາຍອອກຕື່ມ ຈາກພູຮາລັກຢູ່ທາງທິດໃຕ້ຕິດກັບເມືອງເອໂດມ ຈົນເຖິງບາອານກາດທາງພາກເໜືອ ໃນຮ່ອມພູເລບານອນທີ່ທາງທິດໃຕ້ຂອງພູເຂົາເຮີໂມນ. ໂຢຊວຍໄດ້ເຮັດເສິກກັບບັນດາກະສັດ ໃນເຂດແດນເຫຼົ່ານີ້ເປັນເວລາດົນນານ. ເພິ່ນຈັບກະສັດເຫຼົ່ານີ້ໄດ້ ແລະໄດ້ຂ້າທຸກໆຄົນຖິ້ມ.

19ມີເມືອງດຽວເທົ່ານັ້ນ ທີ່ໄດ້ສ້າງຄວາມສະຫງົບສຸກກັບປະຊາຊົນອິດສະຣາເອນຄື: ເມືອງກີເບໂອນບ່ອນທີ່ຊາວຮີວີບາງພວກໄດ້ອາໄສຢູ່. ສ່ວນເມືອງອື່ນໆທັງໝົດນັ້ນແມ່ນໄດ້ສູ້ຮົບເອົາ.

20ພຣະເຈົ້າຢາເວໄດ້ເຮັດໃຫ້ພວກເຂົາມີໃຈຢາກສູ້ຮົບຊາວອິດສະຣາເອນ ເພື່ອວ່າພວກເຂົາຈະໄດ້ຖືກທຳລາຍຢ່າງໝົດກ້ຽງເປັນການລົງໂທດ ແລະເພື່ອທຸກຄົນຈະຖືກຂ້າຢ່າງບໍ່ປານີ ເໝືອນດັ່ງທີ່ພຣະເຈົ້າຢາເວໄດ້ສັ່ງໄວ້ກັບໂມເຊ.

21ໃນເທື່ອນີ້ ໂຢຊວຍໄດ້ຍົກທັບອອກໄປທຳລາຍຄົນຮ່າງໃຫຍ່ພວກໜຶ່ງ ຊື່ວ່າ ອານາກີມ. ຄົນພວກນີ້ໄດ້ອາໄສຢູ່ຕາມເນີນພູຕ່າງໆ ດັ່ງນີ້: ເຮັບໂຣນ, ເດບີ, ອານາບ, ແລະຕາມເນີນພູທັງໝົດຂອງຢູດາແລະເນີນພູທັງໝົດຂອງອິດສະຣາເອນ. ໂຢຊວຍໄດ້ທຳລາຍພວກເຂົາແລະເມືອງຂອງພວກເຂົາຈົນກ້ຽງ.

22ບໍ່ມີພວກອານາກີມຈັກຄົນທີ່ເຫຼືອຢູ່ໃນດິນແດນອິດສະຣາເອນ ແຕ່ຍັງມີບາງຄົນທີ່ໄດ້ເຫຼືອຢູ່ໃນເມືອງກາຊາ, ເມືອງກາດ ແລະເມືອງອາຊະໂດດ.

23ໂຢຊວຍໄດ້ຢຶດຄອງດິນແດນທັງໝົດ ຕາມທີ່ພຣະເຈົ້າຢາເວໄດ້ສັ່ງໄວ້ກັບໂມເຊ. ເພິ່ນໄດ້ມອບດິນແດນນີ້ໃຫ້ເປັນກຳມະສິດຂອງຊາວອິດສະຣາເອນ ໂດຍໄດ້ແບ່ງປັນດິນແດນນັ້ນເປັນສ່ວນໃຫ້ແຕ່ລະເຜົ່າ. ສະນັ້ນ ປະຊາຊົນຈຶ່ງໄດ້ເຊົາສູ້ຮົບ ແລະຢູ່ຢ່າງສະຫງົບສຸກ.

← Chapter 10 Jump to: Chapter 12 →