Joshua 3

Lao Bible 2012 (ພຣະຄຳພີສັກສິ)

← Chapter 2 Jump to: Chapter 4 →

1ມື້ໃໝ່ມາ ໂຢຊວຍແລະປະຊາຊົນອິດສະຣາເອນທັງໝົດໄດ້ລຸກແຕ່ເຊົ້າໆ, ອອກຈາກຄ້າຍພັກທີ່ຊິດຕິມ ແລະມຸ້ງໜ້າໄປສູ່ແມ່ນໍ້າຈໍແດນ. ພວກເຂົາໄດ້ຕັ້ງຄ້າຍພັກຢູ່ບ່ອນນີ້ ໃນຂະນະທີ່ລໍຖ້າຈະຂ້າມແມ່ນໍ້າ.

2ຄັນລ່ວງມາໄດ້ສາມວັນແລ້ວ ພວກຜູ້ນຳກໍໄດ້ຍ່າງເລາະຜ່ານໄປທົ່ວຄ້າຍພັກ

3ແລະສັ່ງປະຊາຊົນວ່າ, “ເມື່ອພວກເຈົ້າເຫັນພວກປະໂຣຫິດ ຫາມຫີບພັນທະສັນຍາຂອງພຣະເຈົ້າຢາເວ ພຣະເຈົ້າຂອງພວກເຈົ້າອອກໄປ ໃຫ້ພາກັນອອກຈາກຄ້າຍພັກແລະຕິດຕາມໄປໂລດ.

4ພວກປະໂຣຫິດຈະນຳທາງພວກເຈົ້າໄປ ເພາະພວກເຈົ້າບໍ່ເຄີຍຜ່ານທາງເສັ້ນນີ້ຈັກເທື່ອ, ແຕ່ຢ່າເຂົ້າໄປໃກ້ຫີບພັນທະສັນຍາ ໃຫ້ຢູ່ຫ່າງປະມານໜຶ່ງກິໂລແມັດ.”

5ແລ້ວໂຢຊວຍກໍໄດ້ສັ່ງປະຊາຊົນວ່າ, “ຈົ່ງຊຳລະຕົນໃຫ້ບໍຣິສຸດ ເພາະມື້ອື່ນພຣະເຈົ້າຢາເວຈະເຮັດການອັດສະຈັນໃນທ່າມກາງພວກເຈົ້າ.”

6ແລ້ວໂຢຊວຍກໍບອກພວກປະໂຣຫິດໃຫ້ຫາມຫີບພັນທະສັນຍາອອກໄປກ່ອນປະຊາຊົນ ແລະພວກເຂົາກໍປະຕິບັດຕາມ.

7ຕໍ່ມາ ພຣະເຈົ້າຢາເວໄດ້ກ່າວແກ່ໂຢຊວຍວ່າ, “ສິ່ງທີ່ເຮົາກະທຳໃນມື້ນີ້ ຈະເຮັດໃຫ້ຊາວອິດສະຣາເອນທຸກຄົນໃຫ້ກຽດແກ່ເຈົ້າ ວ່າເຈົ້າເປັນຜູ້ຍິ່ງໃຫຍ່ຄົນໜຶ່ງ ແລະພວກເຂົາຈະຮູ້ວ່າ ເຮົາໄດ້ຢູ່ນຳເຈົ້າເໝືອນດັ່ງທີ່ໄດ້ຢູ່ນຳໂມເຊ.

8ດັ່ງນັ້ນ ເຈົ້າຈົ່ງສັ່ງພວກປະໂຣຫິດທີ່ຫາມຫີບພັນທະສັນຍານັ້ນວ່າ ເມື່ອໄປຮອດແມ່ນໍ້າຈໍແດນແລ້ວ ໃຫ້ຢຸດຢູ່ໃນນໍ້າໃກ້ໆກັບຕາຝັ່ງສາກ່ອນ.”

9ແລ້ວໂຢຊວຍກໍໄດ້ບອກປະຊາຊົນວ່າ, “ຈົ່ງພາກັນເຂົ້າມາພີ້ ເພື່ອຟັງຖ້ອຍຄຳທີ່ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ສັ່ງ.

10ເມື່ອພວກເຈົ້າບຸກໜ້າເຂົ້າໄປ ພຣະອົງຈະຂັບໄລ່ຄົນເຫຼົ່ານີ້ອອກໄປ ເຊັ່ນ: ຊາວການາອານ, ຊາວຮິດຕີ, ຊາວຮີວີ, ຊາວເປຣີຊີ, ຊາວກີກາຊີ, ຊາວອາໂມ ແລະຊາວເຢບຸດ. ພວກເຈົ້າຈະໄດ້ຮູ້ວ່າ ພຣະເຈົ້າອົງຊົງຊີວິດຢູ່ສະຖິດໃນທ່າມກາງພວກເຈົ້າ;

11ເມື່ອຫີບພັນທະສັນຍາຂອງອົງພຣະຜູ້ເປັນເຈົ້າ ຂ້າມແມ່ນໍ້າຈໍແດນໄປກ່ອນພວກເຈົ້າ.

12ດັ່ງນັ້ນ ຈົ່ງຄັດເລືອກເອົາສິບສອງຄົນຈາກເຜົ່າອິດສະຣາເອນ ຄືເຜົ່າລະຄົນ.

13ເມື່ອພວກປະໂຣຫິດ ຜູ້ທີ່ຫາມຫີບພັນທະສັນຍາຂອງພຣະເຈົ້າຢາເວ ອົງພຣະຜູ້ເປັນເຈົ້າ ແຫ່ງແຜ່ນດິນໂລກ ຈຸ່ມຕີນລົງໃນແມ່ນໍ້າຈໍແດນ ແລະແມ່ນໍ້າຈໍແດນທີ່ໄຫລລົງມາແຕ່ທາງເໜືອກໍຈະຢຸດໄຫລໂຮມກັນຢູ່ບ່ອນດຽວ.”

14ເວລານັ້ນເປັນລະດູເກັບກ່ຽວ ແລະນໍ້າໄດ້ລົ້ນຖ້ວມຕາຝັ່ງ. ເມື່ອປະຊາຊົນໄດ້ອອກໄປຈາກຄ້າຍພັກເພື່ອຈະຂ້າມແມ່ນໍ້າຈໍແດນ ພວກປະໂຣຫິດທີ່ຫາມຫີບພັນທະສັນຍາໄດ້ອອກໄປກ່ອນໜ້າພວກເຂົາ. ພໍພວກປະໂຣຫິດຈຸ່ມຕີນລົງໃນນໍ້າ

16ທັນໃດນັ້ນ ນໍ້າທີ່ໄຫລມາຈາກທາງເໜືອກໍຢຸດໄຫລແລະໂຮມເຂົ້າກັນທີ່ເມືອງອາດາມ ຢູ່ໃກ້ກັບເມືອງຊາເຣທານ ສາຍນໍ້າທີ່ໄຫລລົງສູ່ທະເລຕາຍຖືກຕັດຂາດໝົດກ້ຽງ ແລະປະຊາຊົນຈຶ່ງສາມາດຂ້າມນໍ້າໄປໃກ້ກັບເມືອງເຢຣິໂກໄດ້.

17ໃນຂະນະທີ່ພວກເຂົາຍ່າງຂ້າມດິນແຫ້ງໄປນັ້ນ ພວກປະໂຣຫິດທີ່ຫາມຫີບພັນທະສັນຍາຂອງພຣະເຈົ້າຢາເວ ກໍຢືນຢູ່ເທິງດິນແຫ້ງກາງແມ່ນໍ້າຈໍແດນ ຈົນກວ່າປະຊາຊົນທຸກຄົນຂ້າມໄປຫວິດໝົດແລ້ວ.

← Chapter 2 Jump to: Chapter 4 →