Joshua 21 — Lao Bible 2012 (ພຣະຄຳພີສັກສິ)

1ບັນດາຫົວໜ້າຂອງຄອບຄົວເລວີໄດ້ພາກັນໄປຫາປະໂຣຫິດເອເລອາຊາ, ໂຢຊວຍ ລູກຊາຍຂອງນູນ ແລະຫົວໜ້າຄອບຄົວຕ່າງໆຂອງທຸກເຜົ່າໃນຊາດອິດສະຣາເອນ.

2ພວກເຂົາໄດ້ກ່າວແກ່ພວກເຫຼົ່ານີ້ ທີ່ເມືອງຊີໂລໃນດິນແດນການາອານວ່າ, “ພຣະເຈົ້າຢາເວໄດ້ສັ່ງຜ່ານທາງໂມເຊວ່າ ພວກເຮົາຕ້ອງໄດ້ຮັບເມືອງເປັນບ່ອນຢູ່ອາໄສ ໂດຍໃຫ້ມີທົ່ງຫຍ້າອ້ອມແອ້ມສຳລັບລ້ຽງຝູງສັດຂອງພວກເຮົາດ້ວຍ.”

3ດັ່ງນັ້ນ ປະຊາຊົນອິດສະຣາເອນຈຶ່ງໄດ້ມອບເມືອງບາງແຫ່ງ ພ້ອມທັງທົ່ງຫຍ້າຈາກເຂດແດນໃນສ່ວນຕ່າງໆຂອງພວກເຂົາໃຫ້ແກ່ພວກເລວີ ຕາມຄຳສັ່ງຂອງພຣະເຈົ້າຢາເວ.

4ການໃຊ້ສະຫລາກຄັ້ງທຳອິດໄດ້ຕົກຖືກຄອບຄົວຕ່າງໆໃນຕະກຸນໂກຮາດ. ສ່ວນຄອບຄົວທີ່ມາແຕ່ເຊື້ອສາຍຂອງປະໂຣຫິດອາໂຣນນັ້ນໄດ້ຮັບ 13 ຕົວເມືອງ ຈາກເຂດແດນສ່ວນຕ່າງໆຂອງຢູດາ, ຊີເມໂອນ ແລະເບັນຢາມິນ.

5ສ່ວນຕະກຸນໂກຮາດທີ່ເຫຼືອຢູ່ນັ້ນໄດ້ຮັບ 10 ຕົວເມືອງ ຈາກເຂດແດນສ່ວນຕ່າງໆຂອງເອຟຣາອິມ, ດານ ແລະມານາເຊຕາເວັນຕົກ.

6ຕະກຸນເກໂຊນໄດ້ຮັບ 13 ຕົວເມືອງ ຈາກເຂດແດນຂອງເຜົ່າອິດຊາຄາ, ອາເຊ, ເນັບທາລີ ແລະມານາເຊຕາເວັນອອກ.

7ສ່ວນບັນດາຄອບຄົວໃນຕະກຸນເມຣາຣີນັ້ນໄດ້ຮັບ 12 ຕົວເມືອງ ຈາກເຂດແດນສ່ວນຕ່າງໆຂອງຣູເບັນ, ກາດ ແລະເຊບູໂລນ.

8ປະຊາຊົນອິດສະຣາເອນໄດ້ມອບເມືອງຕ່າງໆພ້ອມທັງທົ່ງຫຍ້າໃຫ້ແກ່ພວກເລວີ ໂດຍການໃຊ້ສະຫລາກ ຕາມທີ່ພຣະເຈົ້າຢາເວໄດ້ສັ່ງໄວ້ຜ່ານທາງໂມເຊ.

9ຕໍ່ໄປນີ້ແມ່ນຊື່ບັນດາເມືອງຈາກເຂດແດນສ່ວນຕ່າງໆຂອງຢູດາແລະຊີເມໂອນ ທີ່ໄດ້ຖືກມອບໝາຍໃຫ້

10ເຊື້ອສາຍຂອງອາໂຣນໃນຕະກຸນໂກຮາດ ຜູ້ທີ່ໄດ້ສືບເຊື້ອສາຍມາຈາກເລວີ. ຕະກຸນນີ້ເປັນພວກທຳອິດທີ່ໄດ້ຖືກມອບໝາຍເມືອງໃຫ້.

11ພວກເຂົາໄດ້ຮັບເມືອງກີຣິອາດອາກບາ ຕະຫລອດທັງທົ່ງຫຍ້າທີ່ຢູ່ອ້ອມແອ້ມນັ້ນ (ອາກບາເປັນພໍ່ຂອງອານາກ) ແຕ່ໃນເວລານີ້ເອີ້ນວ່າເຮັບໂຣນໃນເຂດພູດອຍຂອງຢູດາຍ.

12ແຕ່ທົ່ງນາຂອງເມືອງນີ້ ພ້ອມທັງເມືອງເລັກເມືອງນ້ອຍທີ່ຢູ່ອ້ອມແອ້ມນັ້ນ ໄດ້ຖືກມອບໝາຍໃຫ້ເປັນກຳມະສິດຂອງກາເລັບລູກຊາຍຂອງເຢຟຸນເນ.

13ນອກຈາກເຮັບໂຣນ (ໜຶ່ງໃນບັນດາເມືອງລີ້ໄພ) ເມືອງທີ່ໄດ້ຖືກມອບໝາຍໃຫ້ເຊື້ອສາຍຂອງປະໂຣຫິດອາໂຣນ ມີດັ່ງນີ້: ລິບນາ,

14ຢັດຕີ, ເອຊະເຕມົວ,

15ໂຮໂລນ, ເດບີ,

16ອາອິນ, ຢຸດຕາ ແລະເບັດເຊເມດພ້ອມທັງທົ່ງຫຍ້າ. ລວມທັງໝົດມີ 9 ຕົວເມືອງ ຈາກເຜົ່າຢູດາແລະຊີເມໂອນ.

17ຈາກເຂດແດນຂອງເບັນຢາມິນ ພວກເຂົາໄດ້ຮັບ 4 ຕົວເມືອງ ມີດັ່ງນີ້: ກີເບໂອນ, ເກບາ,

18ອານາທົດ ແລະອານໂມນພ້ອມທັງທົ່ງຫຍ້າ.

19ລວມທັງໝົດມີ 13 ຕົວເມືອງ ພ້ອມທັງທົ່ງຫຍ້າ ທີ່ໄດ້ຖືກມອບໝາຍໃຫ້ປະໂຣຫິດເຊື້ອສາຍຂອງອາໂຣນ.

20ສ່ວນຄອບຄົວອື່ນໆຂອງຊາວເລວີໃນຕະກຸນໂກຮາດ ໄດ້ຮັບບາງເມືອງຈາກເຂດແດນຂອງເອຟຣາອິມ.

21ພວກເຂົາໄດ້ຮັບ 4 ຕົວເມືອງ ມີດັ່ງນີ້: ຊີເຄມແລະທົ່ງຫຍ້າທີ່ຢູ່ໃນແຖບເນີນພູຂອງເອຟຣາອິມ (ເມືອງໜຶ່ງໃນຈຳນວນເມືອງລີ້ໄພ), ເກເຊ,

22ກິບຊາອີມ ແລະເບັດໂຮໂຣນພ້ອມທັງທົ່ງຫຍ້າ.

23ຈາກເຂດແດນຂອງດານ ພວກເຂົາໄດ້ຮັບ 4 ຕົວເມືອງ ມີດັ່ງນີ້: ເອນເຕເກ, ກິບເບໂທນ,

24ໄອຢາໂລນ ແລະກາດຣິມໂມນ ພ້ອມທັງທົ່ງຫຍ້າ.

25ຈາກເຂດແດນຂອງມານາເຊຕາເວັນຕົກ ພວກເຂົາໄດ້ຮັບ 2 ຕົວເມືອງ ມີດັ່ງນີ້: ຕາອານັກ ແລະກາດຣິມໂມນ ພ້ອມທັງທົ່ງຫຍ້າ.

26ຄອບຄົວເຫຼົ່ານີ້ຂອງຕະກຸນໂກຮາດໄດ້ຮັບທັງໝົດ 10 ຕົວເມືອງ ພ້ອມທັງທົ່ງຫຍ້າ.

27ສ່ວນຊາວເລວີພວກອື່ນຈາກຕະກຸນເກໂຊນ ໄດ້ຮັບຈາກມານາເຊຕາເວັນອອກ 2 ຕົວເມືອງ ມີດັ່ງນີ້: ໂກລານໃນບາຊານ (ເມືອງໜຶ່ງໃນຈຳນວນເມືອງລີ້ໄພ) ແລະເບເອັດຊະເຕຣາ ພ້ອມທັງທົ່ງຫຍ້າ.

28ຈາກເຂດແດນຂອງອິດຊາຄາ ພວກເຂົາໄດ້ຮັບ 4 ຕົວເມືອງ ມີດັ່ງນີ້: ກີຊີໂອນ, ດາເບຣັດ,

29ຢາຣະມຸດ ແລະເອັນກັນນີມພ້ອມທັງທົ່ງຫຍ້າ.

30ຈາກເຂດແດນຂອງອາເຊພວກເຂົາໄດ້ຮັບ 4 ຕົວເມືອງ ມີດັ່ງນີ້: ມີຊັນ, ອັບໂດນ,

31ເຮນກາດ ແລະເຣໂຮບ ພ້ອມທັງທົ່ງຫຍ້າ.

32ຈາກເຂດແດນຂອງເນັບທາລີ ພວກເຂົາໄດ້ຮັບ 3 ຕົວເມືອງ ມີດັ່ງນີ້: ເກເດັດໃນຄາລີເລ, ພ້ອມທັງທົ່ງຫຍ້າ (ເມືອງໜຶ່ງໃນຈຳນວນເມືອງລີ້ໄພ), ຮາມໂມດໂດເຣ ແລະກາກຕານ ພ້ອມທັງທົ່ງຫຍ້າ.

33ຄອບຄົວຕ່າງໆໃນຕະກຸນເກໂຊນໄດ້ຮັບທັງໝົດ 13 ຕົວເມືອງ ພ້ອມທັງທົ່ງຫຍ້າ.

34ສ່ວນພວກເລວີທີ່ເຫຼືອຢູ່ນັ້ນ ຄືຕະກຸນເມຣາລີ ໄດ້ຮັບຈາກເຂດແດນຂອງເຊບູໂລນ 4 ຕົວເມືອງ ມີດັ່ງນີ້: ໂຢກເນອາມ, ກາກຕາ,

35ດີມນາ ແລະນາຮາລານ ພ້ອມທັງທົ່ງຫຍ້າ.

36ຈາກເຂດແດນຂອງຣູເບັນ ພວກເຂົາໄດ້ຮັບ 4 ຕົວເມືອງ ມີດັ່ງນີ້: ເບເຊ, ຢາຊາ,

37ເກເດໂມດ ແລະເມຟາອາດ ພ້ອມທັງທົ່ງຫຍ້າ.

38ຈາກເຂດແດນຂອງກາດ ພວກເຂົາໄດ້ຮັບ 4 ຕົວເມືອງ ມີດັ່ງນີ້: ຣາໂມດໃນກີເລອາດ ພ້ອມທັງທົ່ງຫຍ້າ (ເມືອງໜຶ່ງໃນຈຳນວນເມືອງລີ້ໄພ), ມະຫານາອິມ,

39ເຮັດຊະໂບນ ແລະຢາເຊ ພ້ອມທັງທົ່ງຫຍ້າ.

40ດັ່ງນັ້ນ ຕະກຸນເມຣາຣີຈຶ່ງໄດ້ຮັບ 12 ຕົວເມືອງດ້ວຍກັນ.

41ພວກເລວີໄດ້ຮັບດິນແດນທີ່ເປັນສ່ວນຂອງປະຊາຊົນອິດສະຣາເອນ; ລວມທັງໝົດມີ 48 ຕົວເມືອງ ພ້ອມທັງທົ່ງຫຍ້າທີ່ຢູ່ອ້ອມແອ້ມນັ້ນ.

43ສະນັ້ນ ພຣະເຈົ້າຢາເວຈຶ່ງໄດ້ໃຫ້ດິນແດນທັງໝົດນັ້ນແກ່ຊາດອິດສະຣາເອນ ຕາມທີ່ພຣະອົງໄດ້ສັນຍາໄວ້ກັບປູ່ຍ່າຕາຍາຍຂອງພວກເຂົາ. ເມື່ອພວກເຂົາຢຶດຄອງດິນແດນເປັນກຳມະສິດແລ້ວ ກໍພາກັນຕັ້ງຖິ່ນຖານຢູ່ທີ່ນັ້ນ.

44ພຣະເຈົ້າຢາເວໄດ້ໃຫ້ພວກເຂົາມີສັນຕິສຸກທົ່ວດິນແດນ ຕາມທີ່ພຣະອົງໄດ້ສັນຍາໄວ້ກັບປູ່ຍ່າຕາຍາຍຂອງພວກເຂົາ. ບໍ່ມີສັດຕູໃດໆທີ່ສາມາດຕໍ່ຕ້ານພວກເຂົາໄດ້ ເພາະພຣະເຈົ້າຢາເວໄດ້ມອບພວກສັດຕູທັງໝົດໃຫ້ຢູ່ໃນກຳມືຂອງພວກເຂົາ.

45ພຣະເຈົ້າຢາເວໄດ້ຮັກສາຄຳສັນຍາທຸກໆຂໍ້ ທີ່ພຣະອົງໄດ້ສັນຍາໄວ້ກັບປະຊາຊົນອິດສະຣາເອນ. ທຸກໆຢ່າງກໍໄດ້ເກີດຂື້ນ.