Joshua 18

Lao Bible 2012 (ພຣະຄຳພີສັກສິ)

← Chapter 17 Jump to: Chapter 19 →

1ຫລັງຈາກທີ່ພວກອິດສະຣາເອນຢຶດຄອງດິນແດນໄດ້ແລ້ວ ພວກເຂົາໄດ້ມາເຕົ້າໂຮມກັນທີ່ເມືອງຊີໂລ ແລະຕັ້ງຫໍເຕັນບ່ອນຊຸມນຸມໃນທີ່ນັ້ນ.

2ແຕ່ໄດ້ມີປະຊາຊົນອິດສະຣາເອນຢູ່ເຈັດເຜົ່າ ທີ່ຍັງບໍ່ທັນໄດ້ຮັບດິນແດນເປັນສ່ວນແບ່ງຂອງພວກເຂົາ.

3ດັ່ງນັ້ນ ໂຢຊວຍຈຶ່ງໄດ້ຖາມປະຊາຊົນອິດສະຣາເອນວ່າ, “ພວກເຈົ້າຈະລໍຖ້າຢູ່ອີກດົນປານໃດຈຶ່ງຈະເຂົ້າໄປຢຶດຄອງດິນແດນ ທີ່ພຣະເຈົ້າຢາເວ ພຣະເຈົ້າຂອງປູ່ຍ່າຕາຍາຍຂອງພວກເຈົ້າໄດ້ມອບໃຫ້?

4ຈົ່ງເລືອກເອົາສາມຄົນ ຈາກແຕ່ລະເຜົ່າໃຫ້ຂ້າພະເຈົ້າ. ຂ້າພະເຈົ້າຈະໃຊ້ພວກເຂົາອອກໄປທົ່ວທັງດິນແດນ ເພື່ອແຕ້ມແຜນທີ່ເຂດແດນ ຊຶ່ງພວກເຂົາຢາກໄດ້ເປັນກຳມະສິດ ແລ້ວໃຫ້ພວກເຂົາກັບຄືນມາຫາຂ້າພະເຈົ້າ.

5ດິນແດນນີ້ຈະຕ້ອງແບ່ງອອກເປັນເຈັດສ່ວນໃຫ້ພວກເຂົາຄື: ເຜົ່າຢູດາໃຫ້ຢູ່ໃນດິນແດນຂອງພວກເຂົາທາງທິດໃຕ້ ແລະເຜົ່າໂຢເຊັບໃຫ້ຢູ່ໃນດິນແດນຂອງພວກເຂົາທາງທິດເໜືອ.

6ໃຫ້ພວກເຈົ້າແຕ້ມແຜນທີ່ຂອງດິນແດນເຈັດສ່ວນເຫຼົ່ານີ້ ແລະນຳມາໃຫ້ຂ້າພະເຈົ້າ. ແລ້ວຂ້າພະເຈົ້າກໍຈະໃຊ້ສະຫລາກ ຕໍ່ໜ້າພຣະເຈົ້າຢາເວ ພຣະເຈົ້າຂອງພວກເຮົາສຳລັບພວກເຈົ້າ.

7ແຕ່ສຳລັບພວກເລວີແລ້ວ ພວກເຂົາຈະບໍ່ໄດ້ຮັບດິນແດນສ່ວນໃດໆເໝືອນດັ່ງພວກເຈົ້າ ເພາະສ່ວນຂອງພວກເຂົາແມ່ນຮັບໃຊ້ພຣະເຈົ້າຢາເວໃນຖານະເປັນປະໂຣຫິດ. ສ່ວນເຜົ່າກາດ, ເຜົ່າຣູເບັນ ແລະເຜົ່າມານາເຊຕາເວັນອອກນັ້ນໄດ້ຮັບດິນແດນ ທາງຝັ່ງຕາເວັນອອກຂອງແມ່ນໍ້າຈໍແດນແລ້ວ ຊຶ່ງໂມເຊຜູ້ຮັບໃຊ້ຂອງພຣະເຈົ້າຢາເວໄດ້ມອບໃຫ້ແກ່ພວກເຂົາ.”

8ຄົນເຫຼົ່ານັ້ນກໍອອກໄປທົ່ວດິນແດນ ຫລັງຈາກທີ່ໂຢຊວຍໄດ້ໃຫ້ຄຳແນະນຳເຫຼົ່ານີ້ວ່າ, “ຈົ່ງອອກໄປທົ່ວທັງດິນແດນເພື່ອແຕ້ມແຜນທີ່ ແລະກັບຄືນມາຫາຂ້າພະເຈົ້າ. ແລ້ວໃນເມືອງຊີໂລນີ້ ທີ່ຂ້າພະເຈົ້າກໍຈະໃຊ້ສະຫລາກໃຫ້ພວກເຈົ້າຊ້ອງໜ້າພຣະເຈົ້າຢາເວ.”

9ດັ່ງນັ້ນ ຄົນເຫຼົ່ານີ້ຈຶ່ງພາກັນອອກໄປທົ່ວດິນແດນ ແລະແຕ້ມແຜນທີ່ລົງໄປວ່າ ພວກຕົນຈະແບ່ງປັນດິນແດນນີ້ເປັນເຈັດສ່ວນ ແລະຂຽນລາຍຊື່ຂອງເມືອງຕ່າງໆໃສ່ຢ່າງໃດ. ແລ້ວພວກເຂົາກໍໄດ້ກັບຄືນມາຫາໂຢຊວຍທີ່ເມືອງຊີໂລ.

10ໂຢຊວຍໄດ້ໃຊ້ສະຫລາກໃຫ້ພວກເຂົາຢູ່ທີ່ຊີໂລຊ້ອງໜ້າພຣະເຈົ້າຢາເວ ແລະໄດ້ມອບດິນແດນໃຫ້ແກ່ທຸກໆເຜົ່າທີ່ເຫຼືອຢູ່ນັ້ນ ຕາມສ່ວນແບ່ງຂອງໃຜລາວ.

11ດິນແດນທີ່ໃຊ້ສະຫລາກໄດ້ກ່ອນໝູ່ນັ້ນ ເປັນຂອງຄອບຄົວຕ່າງໆໃນເຜົ່າເບັນຢາມິນ. ດິນແດນຂອງພວກເຂົາແມ່ນຕັ້ງຢູ່ ລະຫວ່າງເຜົ່າຢູດາແລະເຜົ່າໂຢເຊັບ.

12ທາງພາກເໜືອ ຊາຍແດນຂອງພວກເຂົາເລີ່ມແຕ່ແມ່ນໍ້າຈໍແດນ ຈົນຂຶ້ນໄປເຖິງເນີນພູທາງທິດເໜືອຂອງເມືອງເຢຣິໂກອອກໄປທາງທິດຕາເວັນຕົກ ໂດຍຜ່ານເຂດເນີນພູໄປຈົນເຖິງຖິ່ນແຫ້ງແລ້ງກັນດານເບັດອາເວນ.

13ແລ້ວຊາຍແດນກໍເລີຍໄປຈົນເຖິງເນີນພູທາງໃຕ້ຂອງເມືອງລູເຊ (ມີຊື່ອີກວ່າເບັດເອນ) ແລ້ວລົງໄປຈົນເຖິງອາຕາໂຣດອັດດາ ທີ່ເທິງພູທາງໃຕ້ເມືອງເບັດໂຮໂຣນລຸ່ມ.

14ແລ້ວຊາຍແດນນີ້ກໍອອກໄປທາງທິດໜຶ່ງອີກ ໂຄ້ງໄປທາງທິດໃຕ້ດ້ານທະເລ ຈາກທິດຕາເວັນຕົກຂອງພູນີ້ ແລະໄປຈົນເຖິງກີຣິອາດບາອານ (ຫລືກີຣີອາດເຢອາຣີມ) ຊຶ່ງເປັນເມືອງຂອງເຜົ່າຢູດາ. ນີ້ແມ່ນຊາຍແດນທາງທິດຕາເວັນຕົກ.

15ສ່ວນຊາຍແດນທາງພາກໃຕ້ນັ້ນໄດ້ເລີ່ມແຕ່ແຄມເມືອງກີຣີອາດເຢອາຣີມ ແລະໄປຈົນເຖິງ ບໍ່ນໍ້າເນັບໂທອາ.

16ແລ້ວຊາຍແດນນີ້ກໍໄດ້ລົງໄປ ຈົນເຖິງຕີນພູບ່ອນທີ່ຫລຽວເຫັນພູຮິນໂນມ ທາງເໜືອສຸດຂອງຮ່ອມພູເຣຟາອິມ. ແລ້ວຊາຍແດນນີ້ກໍໄດ້ເລີຍໄປທາງໃຕ້ຜ່ານຮ່ອມພູຮິນໂນມ ທາງໃຕ້ສັນພູຂອງຊາວເຢບຸດໄປທາງເອນໂຣເກນ.

17ແລ້ວກໍລ້ຽວໄປທາງທິດເໜືອສູ່ເອນເຊເມດສູ່ເກລີໂລດ ຊຶ່ງກົງກັນຂ້າມກັບທາງຜ່ານຊ່ອງແຄບອາດຸມມິມ. ແລ້ວຊາຍແດນນີ້ກໍໄດ້ລົງໄປທາງໂງ່ນຫີນຂອງໂບຮານ (ໂບຮານເປັນລູກຊາຍຂອງຣູເບັນ)

18ແລະຜ່ານໄປທາງສັນພູເບັດອາຣາບາບ່ອນທີ່ຫລຽວເຫັນຮ່ອມພູຈໍແດນ. ແລ້ວຊາຍແດນນີ້ກໍລົງໄປຈົນເຖິງຮ່ອມພູອາຣາບາ.

19ໂດຍຜ່ານໄປທາງສັນພູເບັດໂຮກະລາ ແລະໄປສຸດທີ່ທາງເຂົ້າທະເລຕາຍເບື້ອງເໜືອ ບ່ອນທີ່ແມ່ນໍ້າຈໍແດນໄຫລໄປໃສ່. ນີ້ແມ່ນຊາຍແດນທາງທິດໃຕ້.

20ແມ່ນໍ້າຈໍແດນເປັນຊາຍແດນທາງທິດຕາເວັນອອກ. ນີ້ແມ່ນຊາຍແດນຂອງດິນແດນ ທີ່ຄອບຄົວຕ່າງໆໃນເຜົ່າເບັນຢາມິນໄດ້ຮັບເປັນກຳມະສິດ.

21ເມືອງທັງຫລາຍທີ່ເປັນສ່ວນຂອງຄອບຄົວຕ່າງໆໃນເຜົ່າເບັນຢາມິນນັ້ນ ມີດັ່ງນີ້: ເຢຣິໂກ, ເບັດໂຮກະລາ, ເອເມັກເກຊິດ,

22ເບັດອາຣາບາ, ເຊມາຣາອິມ, ເບັດເອນ,

23ອາວິມ, ປາຣາ, ໂອຟະຣາ,

24ເກຟາອຳໂມນີ, ໂອຟະນີ ແລະເກບາ. ລວມທັງໝົດມີ 12 ຕົວເມືອງ ຕະຫລອດທັງເມືອງເລັກເມືອງນ້ອຍທີ່ຢູ່ອ້ອມແອ້ມນັ້ນ.

25ນອກນີ້ກໍຍັງມີເມືອງກີເບໂອນ, ຣາມາ, ເບເອໂຣດ,

26ມີຊະປາ, ເກຟີຣາ, ໂມຊາ,

27ເຣເກມ, ອີຣະເປເອນ, ຕາຣາລາ,

28ເຊລາ, ຮາເອເລັບ, ເຢບູ (ເມືອງເຢຣູຊາເລັມ), ກີເບອາ ແລະກີຣີອາດເຢອາຣີມ. ລວມທັງໝົດມີ 14 ຕົວເມືອງ ຕະຫລອດທັງເມືອງເລັກເມືອງນ້ອຍທີ່ຢູ່ອ້ອມແອ້ມນັ້ນ. ນີ້ແມ່ນດິນແດນທີ່ຄອບຄົວຕ່າງໆໃນເຜົ່າເບັນຢາມິນ ໄດ້ຮັບເປັນກຳມະສິດຂອງພວກເຂົາ.

← Chapter 17 Jump to: Chapter 19 →