Joshua 16

Lao Bible 2012 (ພຣະຄຳພີສັກສິ)

← Chapter 15 Jump to: Chapter 17 →

1ຊາຍແດນພາກໃຕ້ຂອງດິນແດນທີ່ໄດ້ຖືກມອບໝາຍໃຫ້ເຊື້ອສາຍຂອງໂຢເຊັບ ເລີ່ມແຕ່ເຂດແມ່ນໍ້າຈໍແດນໃກ້ກັບເມືອງເຢຣິໂກ ທາງທິດຕາເວັນອອກຂອງບໍ່ນໍ້າເຢຣິໂກ ໄປຈົນເຖິງຖິ່ນແຫ້ງແລ້ງກັນດານ. ຊາຍແດນນີ້ເລີ່ມແຕ່ເມືອງເຢຣິໂກ ຂຶ້ນໄປຈົນເຖິງເຂດເນີນພູແລະເມືອງເບັດເອນ.

2ແຕ່ເບັດເອນໄປທາງເມືອງລູເຊ ຜ່ານໄປທາງອາຕາໂຣດອັດດາ ບ່ອນທີ່ພວກອາກກີໄດ້ອາໄສຢູ່.

3ແລ້ວຊາຍແດນນີ້ກໍໄປທາງທິດຕາເວັນຕົກ ທາງເຂດຂອງພວກຢາຟະເລດ ຈົນເຖິງເຂດເບັດໂຮໂຣນລຸ່ມ, ແຕ່ບ່ອນນີ້ເລີຍໄປຈົນເຖິງເກເຊ ແລະສຸດທີ່ທະເລເມດີແຕຣາເນ.

4ພວກເຊື້ອສາຍຂອງໂຢເຊັບ ຄືເຜົ່າເອຟຣາອິມແລະເຜົ່າມານາເຊຕາເວັນຕົກ ໄດ້ຮັບດິນແດນເຫຼົ່ານີ້ເປັນກຳມະສິດຂອງພວກເຂົາ.

5ຕໍ່ໄປນີ້ແມ່ນເຂດແດນຂອງຄອບຄົວຕ່າງໆໃນເຜົ່າເອຟຣາອິມ: ຊາຍແດນຂອງພວກເຂົາເລີ່ມແຕ່ອາຕາໂຣດອັດດາ ທາງທິດຕາເວັນອອກໄປຈົນເຖິງເບັດໂຮໂຣນເທິງ

6ແລະຈາກບ່ອນນັ້ນໄປສູ່ທະເລເມດີແຕຣາເນ. ມິກເມທັດທາງດ້ານເໜືອ ຈາກທິດຕາເວັນອອກຂອງບ່ອນນີ້ ຊາຍແດນໄດ້ເລີຍໄປຈົນເຖິງຕາອານາດຊີໂລ ແລະຜ່ານໄປຈົນເຖິງທາງທິດຕາເວັນອອກສູ່ຢາໂນອາ.

7ແລ້ວຈາກຢາໂນອາລົງມາເຖິງອາຕາໂຣດແລະນາອາຣາ ຈົນໄປເຖິງເມືອງເຢຣິໂກແລະສຸດທີ່ແມ່ນໍ້າຈໍແດນ.

8ຊາຍແດນນີ້ທາງທິດຕາເວັນຕົກ ຈາກຕັບປູອາເຖິງຫ້ວຍນໍ້າການາ ແລະສຸດລົງທີ່ທະເລເມດີແຕຣາເນ. ນີ້ແມ່ນດິນແດນທີ່ໄດ້ຖືກມອບໝາຍໃຫ້ ເປັນກຳມະສິດຂອງຄອບຄົວຕ່າງໆໃນເຜົ່າເອຟຣາອິມ

9ລວມທັງບາງເມືອງກັບບ້ານຕ່າງໆ ຢູ່ພາຍໃນເຂດຊາຍແດນຂອງມານາເຊ ຊຶ່ງໄດ້ຖືກມອບໝາຍໃຫ້ພວກເອຟຣາອິມ.

10ແຕ່ພວກເຂົາບໍ່ໄດ້ຂັບໄລ່ພວກການາອານ ທີ່ຢູ່ໃນເມືອງເກເຊໃຫ້ອອກໄປ. ດ້ວຍເຫດນີ້ ພວກການາອານຈຶ່ງຍັງຢູ່ຮ່ວມກັບພວກເອຟຣາອິມຈົນເຖິງທຸກວັນນີ້. ແຕ່ພວກເອຟຣາອິມໄດ້ບັງຄັບພວກເຂົາໃຫ້ເຮັດວຽກດັ່ງທາດຮັບໃຊ້.

← Chapter 15 Jump to: Chapter 17 →