Acts 11

Mossi MPBU (WẼNNAAM SEBRE 2014)

← Chapter 10 Jump to: Chapter 12 →

1Tẽn‑tʋmdbã la b ba-biisã sẽn da be Zʋʋde wã wʋmame tɩ bu-zẽmsã me reega Wẽnnaam goamã.

2La a Pɩyɛɛr sẽn lebg n wa Zeruzalɛm tẽedb nins sẽn yaa Zʋɩf buudã wẽe nokoeemd ne yẽnda.

3N yeel-a yaa: Yãmb kẽe neb sẽn ka kẽ bãong zakẽ n dɩ ne-ba!

4La a Pɩyɛɛr togsa bãmb yellã fãa sẽn maanã ball-balle, n yeel-b yaa:

5«Mam dag n bee Zope tẽngã pʋgẽ, la mam sẽn wa n pʋʋsdẽ, mam paama vẽnegre. Mam yãnda bũmb sẽn wẽnd wa peen-bedr sẽn yi arzãn n sigd mam nengẽ t'a noy a naasã loe. La a sulgame n pẽneg maam.

6Mam maaga m meng n gese, la m yãnda rũms sẽn tar nao a naase, we-rũmsi, baa bõn-vuuds ne bõn-pɩgs sẽn be a pʋgẽ.

7Dẽ mam wʋma koɛɛg sẽn yeele: ‹Pɩyɛɛre, yik n kʋ n dɩ.›

8La mam leokame yaa: ‹Ayo, Zu-soaba, bala, bũmb sẽn ka zems wala sẽn yaa rẽgd na n zɩɩ n kẽ mam noorẽ ye.›

9La koɛɛgã yii arzãn naoor a yiibẽ soab n yeel maam yaa: ‹Wẽnnaam sẽn yeel tɩ bũmb ning yaa yɩlemdã, bɩ f ra bool-a tɩ rẽgd ye.›

10Bõn-kãng maana hal naoor a tãabo. Dẽ, a fãa lebg n dʋʋ arzãna.

11La wakat-kãng bala, raop a tãab sẽn yi Sezaare b sẽn tʋm-b mam nengẽ wa n taa zak ning mam sẽn dag n be wã noore.

12Sɩɩg-sõng yeela maam tɩ m tũ-b n loog la m da sãmb ye. Ba-biis a yoobã sẽn be ka wã yãaga maam n ta Sezaare. La tõnd kẽ a Korney zakẽ wã.

13La a Korney togsa tõnd sẽn yɩ to-to tɩ yẽnda yãnd malɛɛkã sẽn wa yẽnda roogã pʋgẽ n yeel yẽnda t'a tʋm neb Zope tɩ b tɩ bool a Sɩmo Pɩyɛɛr t'a wa wã.

14T'a Pɩyɛɛr na n togsa yẽnda koees sẽn na n kɩt tɩ yẽnda ne a yirã rãmb fãa paam fãagre.

15La mam sẽn sɩng n gomdã, Sɩɩg-sõng siga bãmb zut wala b sẽn dag n sig tõnd zut sɩngrẽ wã.

16Dẽ, mam tẽega Zu-soabã goamã b sẽn dag n yeelã: ‹A Zã lisa ne koom la b na n lisa yãmb Sɩɩg-sõng pʋga.›

17Rẽ wã yĩnga, Wẽnnaam sẽn kõ-b kũun ning b sẽn dag n kõ tõnd d sẽn tẽ Zu-soab a Zeezi Kiris yĩngã, dẽ, mam yaa ãnda soab n tõe n kɩɩs Wẽnnaam?

18Bãmb sẽn wʋm bõn-kãnga, b sĩnda b noore. La b pẽga Wẽnnaam n yeel yaa: Rẽnd Wẽnnaam kɩtame tɩ bu-zẽmsã me tek yam n kos sugr n na n paam vɩɩm.»

19Namsg ning sẽn paam tẽedbã a Etɛn kũumã poorẽ wã kɩtame tɩ b sãeeg n kẽng hal Fenisi, la Sɩpr ne Ãntiyoos la b ka moon ned a to Wẽnnaam koɛɛga sã n ka Zʋɩf-rãmbã bal ye.

20Baoosgo, tẽedb kẽer sẽn yi Sɩpr la Sirɛn waa Ãntiyoos la b goma ne neb a taabã me n moon-b Zu-soab a Zeezi koe-noogã.

21Zu-soabã pãng dag n bee ne bãmba, la neb wʋsg tẽe Zu-soabã n kos sugri.

22A Zeezi tẽedbã sẽn be Zeruzalɛmã wʋma koe-kãnga, la b tʋma a Barnabaas Ãntiyoose.

23La yẽnda sẽn ta n yãnd Wẽnnaam sẽn ning tẽedbã bark to-to wã, a sũurã yɩɩ noogo. La a paasa b fãa raood n yet tɩ b kell n tũ Zu-soabã ne b sũyã fãa n da bas ye.

24Bala, a Barnabaas yaa nin-sõngo, n pid ne Sɩɩg-sõngo n tar tẽebo. La neb wʋsg tẽe Zu-soabã.

25Dẽ poore, a Barnabaas kẽnga Tars n na n tɩ bao a Solle.

26La yẽnda sẽn yãnd a Soll be, a peeg-a lame n wa Ãntiyoose. Bãmb paa be ne a Zeezi tẽedbã yʋʋmd tõre n zãms neb kʋʋngo. Yaa Ãntiyoos la b sɩng n bool a Zeezi karen-biisã tɩ Kiris nebã.

27La ra-kãense, Wẽnnaam no-rɛɛsdb yii Zeruzalɛm n wa Ãntiyoose.

28La bãmb ned a yembr yʋʋr sẽn boond t'a Agabuus yikame n togs ne Sɩɩg-sõng pãng tɩ wakat n wat tɩ kom-kãseng na n zĩnd dũniyã tɛk fãa. La komã sɩd zĩnda a rĩm a Sezaar Kolood sẽn wa n dɩt naam wakate.

29Dẽ, karen-biisã yãka yam tɩ ned kam fãa kɩs sõngr ning sẽn zems a pãng tɩ b tʋm n sõng ba-biisã sẽn dag n be Zʋʋde soolmã.

30La b maana a woto n dɩk n ning a Barnabaas ne a Soll nugẽ tɩ b tɩ kɩs kãsem-dãmbã sẽn be Zʋʋde wã.

← Chapter 10 Jump to: Chapter 12 →