Acts 6

Mossi MPBU (WẼNNAAM SEBRE 2014)

← Chapter 5 Jump to: Chapter 7 →

1Wakat-kãnga, karen-biisã ra lebgda wʋsgo. Zʋɩf-rãmb nins sẽn vɩ-b tẽn-taasã yẽgma ne Zʋɩf-rãmb nins sẽn vɩ-b Zeruzalɛmã, b sẽn da ka kõt bãmb pʋg‑kõapã b daar fãa pʋɩɩrã wa sẽn zemsã yĩnga.

2Dẽ, tẽn-tʋmdbã piig la a yiibã tigma karen-biisã fãa n yeel-b yaa: «A ka zems tɩ tõnd bas Wẽnnaam koɛɛgã mooneg n pʋɩt neb rɩɩb ye.

3Ba-biisi, woto yĩngã, bɩ y yãk raop a yopoe yãmb sʋkã sẽn tar kaset sõngo, n pid ne Sɩɩg-sõng la yam, tɩ tõnd ning tʋʋm-kãngã bãmb zutu.

4La tõnd na n kell n kẽnga taoor ne pʋʋsgo la Wẽnnaam koɛɛgã moonego.»

5La neb kʋʋngã fãa sũur yɩɩ noog ne koe-kãnga. Dẽ, bãmb yãka a Etɛn sẽn pid ne tẽeb la Sɩɩg-sõngã, la a Filip ne a Porkoore, la a Nikanoor ne a Tɩmo, la a Parmenaas ne a Nikola sẽn yit Ãntiyoos n dag n kẽ Zʋɩf-rãmbã kaorengo.

6B talla bãmb n wa tẽn-tʋmdbã nengẽ, la b pʋʋsame n tik-b ne b nusi.

7La Wẽnnaam koɛɛgã rag n saagdame n yɩɩd pĩnda, la karen-biisã sõor dag n paasda wʋsg Zeruzalɛm. La maan-kʋʋdb wʋsg rag n sakda tẽebã.

8A Etɛn sẽn pid ne bark la pãnga, a maana bõn-yɛɛsds kãsemse, la bãn nebã sʋka.

9La karen-doog ning sẽn boond tɩ neb sẽn paam lohorem karen-doogã neb kẽer sẽn yit Sirɛn la Alegsãndri n paas ne Zʋɩf-rãmb sẽn yit Silisi la Aazi soolem sɩngame n wẽ nokoeemd ne a Etɛn.

10La a Etɛn sẽn da gomd ne yam la Sɩɩg-sõng pãngã, b ka tõog n leok yẽnda ye.

11Dẽ, b maana zãmb n paam neb tɩ b yeel tɩ bãmb wʋmame t'a Etɛn tʋʋd a Moyiis ne Wẽnnaam.

12La b rãmba nebã ne kãsem-dãmbã la ne gʋlsdbã. La b waame n yõk a Etɛn ne pãng n tall-a n kẽng Kaoreng yɛl-bʋ-bʋʋdbã taoore.

13Bãmb waa ne zĩrẽ kaset dãmb tɩ b yet t'a Etɛn tʋʋda zĩ-sõngã la tõogã n ka basdẽ ye.

14Bala, bãmb wʋma a Etɛn sẽn yeel tɩ Nazarɛt dao a Zeezi na n sãama zĩ-kãngã la b tek minind nins a Moyiis sẽn da kõ bãmbã.

15Neb nins sẽn da zĩ bʋ-kaoorã zĩigẽ wã fãa ra geta a Etɛn la b yãame tɩ yẽnda nengã wẽnda wa malɛɛk nenga.

← Chapter 5 Jump to: Chapter 7 →