bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Mossi
/
Mossi MPBU (WẼNNAAM SEBRE 2014)
/
Acts 15
Acts 15
Mossi MPBU (WẼNNAAM SEBRE 2014)
← Chapter 14
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 16 →
1
Neb kẽer yii Zʋʋde n wa Ãntiyoos n sɩng n zãmsd ba-biisã n yetẽ tɩ b sã n ka kẽ bãong wa sẽn zems a Moyiis tõogã, b ka tõe n paam fãagr ye.
2
A Poll ne a Barnabaas kɩɩs-b lame n wẽ nokoeem-kãseng ne-b bõn-kãng wɛɛngẽ. Rẽ, ba-biisã yãka yam t'a Poll ne a Barnabaas ne bãmb sʋkã neb kẽer na n kẽnga tẽn-tʋmdbã ne kãsem-dãmbã nengẽ Zeruzalɛm n tɩ ges yel-kãng yelle.
3
Dẽ, Kiris tẽedbã sẽn be Ãntiyoosã yãag-b lame. A Poll dãmb pɩʋʋga Fenisi la Samaari soolem la b togsda sẽn yɩ to-to tɩ bu-zẽmsã me sak Wẽnnaamã. La bõn-kãng kõo ba-biisã fãa sũ-no-kãsenga.
4
La a Poll dãmb sẽn ta Zeruzalɛm, a Zeezi tẽedbã ne tẽn-tʋmdbã ne kãsem-dãmbã reeg-b lame. La a Poll dãmb togs-b‑la bũmb nins fãa Wẽnnaam sẽn tall bãmb n maanã.
5
La Fariizẽ-dãmbã neb kẽer sẽn yaa Kiris tẽedbã yikame n yeel tɩ yaa tɩlɛ tɩ b kẽes bu-zẽmsã bãongo, la b kɩt tɩ b sak a Moyiis tõogã.
6
Tẽn-tʋmdbã ne kãsem-dãmbã tigma taab n na n ges yel-kãng yelle.
7
Bãmb sẽn wẽ nokoɛɛm wʋsg n kaoose, a Pɩyɛɛr yikame n yeel yaa: M ba-biisi, hal pipi wakat bala, Wẽnnaam yãka maam yãmb sʋk tɩ m moon koe-noogã bu-zẽmsã me tɩ b wʋme, la b tẽ.
8
La Wẽnnaam sẽn mi ninsaalbã fãa sũyã, b kõ-b‑la Sɩɩg-sõng wa b sẽn dag n kõ tõndã, tɩ yɩ kaset tɩ b sak n deeg-b lame.
9
Wẽnnaam ka welg tõnd toor ne bu-zẽmsã ye, bala b sẽn tẽ wã yĩnga, Wẽnnaam yɩlga b sũyã.
10
Dẽ moasã, yaa bõe tɩ y baood Wẽnnaam noor n zɩlgd karen-biisã zɩɩb tõnd yaab-rãmbã wall tõnd mens sẽn ka tõog n tʋke?
11
La tõnd tẽedame tɩ yaa Zu-soab a Zeezi barkã yĩng n kɩt tɩ tõnd paam fãagr wala bãmb me sẽn paam to-to wã.
12
Nebã sẽn tigmã fãa sĩndame n kelg a Barnabaas ne a Poll sẽn togsd Wẽnnaam sẽn tall bãmb n maan bõn-bãnã, la bõn-yɛɛsdsã fãa bu-zẽmsã sʋkã.
13
Bãmb sẽn gom n sɛ, a Zak gomame n yeel yaa:
14
M ba-biisi, kelg-y maam. A Sɩmo wilga yãmb Wẽnnaam sẽn geelg bu-zẽmsã to-to n sɩng n yãk neb be n maan b rẽndã.
15
La bõn-kãng zemsa ne Wẽnnaam no-rɛɛsdbã sẽn gomã. B gʋlsame n yeel yaa:
16
«Zu-soabã yetame yaa: ‹Rẽ poore, mam na n lebgame n wa mee a Davɩɩd doogã sẽn dag n lʋɩ wã. Mam na n leb n manega yẽnda raboogã n me, la m na n yik-a lame n yalse,
17
tɩ neb a taabã sẽn ketã bao Zu-soabã. La buud nins fãa sẽn pʋʋsd ne mam yʋʋrã me na n baoo maam.›
18
Ade, yaa Zu-soabã sẽn wilg bõn-kãens hal yʋʋm zãrã n yeel a woto.»
19
Yaa woto yĩng n kɩt tɩ mam togsdẽ t'a zemsame tɩ d da bao yell n kõ bu-zẽmsã sẽn sakd Wẽnnaamã ye.
20
La bɩ d gʋls-b n yeel-b tɩ b lak b mens ne wẽn-naandsã maand nemdo, la wɩɩbdo, la b ra wãb rũng sẽn sãrg nemdo, la b ra rɩ zɩɩm ye.
21
Bala, hal kʋdem wẽndẽ tɩ ta moasã, b moonda a Moyiis tõogã tẽmsã pʋse, la b karemd-a karen-dotã pʋs vʋʋsg daar fãa.
22
Dẽ, tẽn-tʋmdbã ne kãsem-dãmbã la tẽedbã fãa yãka yam n na n tũus neb kẽer bãmb sʋkã n tʋm-b tɩ b tũ a Poll ne a Barnabaas n kẽng Ãntiyoose. Bãmb yãka a Zʋʋd b sẽn boond t'a Barsabaas la a Sɩlaase. Bãmb b yiibã fãa yaa neb ba-biisã sẽn waoogda.
23
B kɩs‑b‑la sebrã, la b sẽn gʋlsã yeelame yaa: Tẽn-tʋmdbã ne kãsem-dãmbã, la ba-biisã pʋʋsda ba-biis nins sẽn be bu-zẽmsã sʋk n be Ãntiyoos la Siiri ne Silisi soolmã.
24
Tõnd wʋmame tɩ neb kẽer n yi tõnd nengẽ n wa n dãmbd yãmb la b yuusd yãmb yam ne b goamã. La ka tõnd n kõ-b noor ye.
25
Yaa woto yĩnga, tɩ tõnd tigim taab n yãk yam a yembr n yãk neb n tʋm-b tɩ b na n yãag d zo-nongds a Poll ne a Barnabaas n wa yãmb nengẽ.
26
A Poll dãmb ra gẽnega b yõy tõnd Zu-soab a Zeezi Kiris tʋʋmdã yĩnga.
27
Rẽnda yĩng la d tʋm a Zʋʋd ne a Sɩlaas yãmb nengẽ. La b mens na n togs-y‑la bõn-kãense.
28
Bala, Sɩɩg-sõng ne tõnd me gesame tɩ yaa neere tɩ d da zɩlg-y zɩɩb sã n ka bũmb nins sẽn yaa tɩlɛ wã ye. La yaa tɩ yãmb ka tog n wãb nemd
29
b sẽn maan maoong n kõ wẽn-naands ye. La y ka tog n dɩ rũng sẽn sãrge, la y da rɩ zɩɩm ye, la y ra maan wɩɩbd ye. Yãmb sã n lak y mens ne bõn-kãense, y maana sẽn yaa neere. Wẽnd na sõng yãmba.
30
Dẽ, b basa b sẽn tʋm-b rãmbã tɩ b loog n kẽng Ãntiyoose. La b tigma Kiris tẽedbã fãa beenẽ n kɩs-b sebrã.
31
B sẽn kɩt tɩ b karem sebrã n sɛ, b fãa sũyã yɩɩ noogo, b sẽn paas bãmb raoodã yĩnga.
32
A Zʋʋd ne a Sɩlaas mens sẽn dag n yaa Wẽnnaam no-rɛɛsdbã, b goma ne ba-biisã n kaoose, n paas-b raood la pãnga.
33
La b sẽn pa Ãntiyoos n kaoos bilfu, ba-biisã pʋʋs-b lame tɩ Wẽnd na kuils-b laafɩ, n bas-b tɩ b lebg n leb neb nins sẽn tʋm-b bãmbã nengẽ.
34
[La a Sɩlaas yãka yam n na n pa Ãntiyoose.]
35
La baoosgo, a Poll ne a Barnabaas paa Ãntiyoose. La bãmb ne neb a taab wʋsg ra zãmsda nebã la b moond-b koe-noogã sẽn yaa Zu-soabã goamã.
36
Rasem bilf sẽn paase, a Poll yeela a Barnabaas t'a wa tɩ b leb n kẽng tẽms nins fãa bãmb sẽn dag n moon Zu-soabã koɛɛgã n tɩ ges ba-biisã n bãng b kibar sẽn yaa to-to.
37
A Barnabaas rag n dat n peega a Zã b sẽn boond t'a Mark t'a tũ-ba.
38
La a Poll tagsame tɩ yaa neer tɩ b ra peeg a Zã-Mark ye. Tɩ bala, a rag n lebg n basa bãmb Paamfili soolem n ka leb n yãag-b n maan tʋʋmdã ye.
39
La b kɩɩsa taab wʋsg yel-kãng wɛɛngẽ hal n welg taaba. La a Barnabaas peega a Mark n kẽ koom-koglg n na n kẽng Sɩpre.
40
La a Poll yãka a Sɩlaase, la ba-biisã pʋʋsame tɩ Zu-soabã ning-b barka, la b loogame.
41
A Poll pɩʋʋga Siiri ne Silisi soolem n paas a Zeezi Kiris tẽedbã pãnga.
← Chapter 14
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 16 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28