Acts 24

Mossi MPBU (WẼNNAAM SEBRE 2014)

← Chapter 23 Jump to: Chapter 25 →

1La rasem a nu sẽn looge, maan-kʋʋd kãsem a Hananiyaas waa Sezaare ne kãsem-dãmb kẽere, la gom-minim soab a yembr yʋʋr sẽn boond t'a Tertulli. Bãmb togsa b sẽn bʋʋd ne a Pollã yell Gʋvɛrneer a Feligs taoore.

2B boola a Poll t'a wa, la a Tertull sɩngame n dõd yẽnda n yeele: Yaa yãmb maasem yĩng tɩ tõnd paamd laafɩ hakɩɩka, la y maana yam tʋʋm n maneg soolem kãngã.

3Dẽ wã, Feligs sõngo, tõnd deegda bãmb bũmb fãa pʋgẽ, la zĩiga fãa n pʋʋsd d zaamẽ beoogo.

4La mam ka rat n dɩk yãmb weerã n kaoos ye. Yaa woto yĩng tɩ m kot-y tɩ y maan sũ-mar n kelg tõnd wakat bilfu.

5Tõnd mikame tɩ rao-kãngã yaa wẽnem soab n wat ne rãmbg Zʋɩf-rãmbã fãa sẽn be dũniyã zugã sʋka, la a yaa Nazarɛt dãmba kaoreng taoor soaba.

6La a makame meng n dat n paoog wẽnd doogã. Dẽ, tõnd yõk-a lame. [Tõnd dag n dat n kao a bʋʋd wa sẽn zems tõnd tõogã.

7La sodaas tusr naab a Liziyaas waa n deeg-a-la ne pãn-kãseng tõnd nusẽ.

8La a yeela a Poll rõatbã tɩ b wa yãmb nengẽ.] Yãmb meng tõe n sok-a lame n bãng bũmb nins fãa yĩng sẽn kɩt tɩ d bʋʋd ne-a wã.

9Zʋɩf-rãmbã paasa gomda pãng n yet tɩ yaa sɩda.

10Dẽ, Gʋvɛrneerã zẽka a nug n yeel a Poll t'a gome. Dẽ, a Poll dɩka koɛɛg n yeel yaa: Mam miime tɩ yãmb yaa soolem-kãngã bʋ-kaood hal yʋʋm wʋsgo. Dẽ, yaa ne kɩs-sɩd la mam na n gom yãmb taoor n yiis m meng yellẽ wã.

11Yãmb meng tõe n baoome n bãnge. Sẽn ka yɩɩd rasem piig la a yiibu, mam kẽnga Zeruzalɛm n na n tɩ pʋʋs Wẽnnaam.

12B ka yã maam tɩ m wẽed nokoeemd ne ned ba a yembr wẽnd doogã pʋga, wala m rãmbd neb kʋʋng karen-dot pʋse, bɩ tẽnga pʋg zĩig ba a yembr ye.

13La bãmb ka tõe n wilg yãmb tɩ bũmb ning b sẽn dõt maam moasã wã yaa sɩd ye.

14Baoosgo, mam togsda bõn-kãngã y taoore. Mam pʋʋsda m yaab-rãmbã Wẽnnaam n tũud so-paalg ningã bãmb sẽn boond tɩ yaa kaoreng a to wã. La mam tẽeda bũmb nins fãa sẽn gʋls tõogã sɛb pʋse, la Wẽnnaam no-rɛɛsdbã sɛbã pʋsã.

15Mam tara tẽeb pidsg gũudum‑kãnga, ne Wẽnnaam wa mam dõatbã mens sẽn tarã, n tẽed tɩ nin-sõamyã la nin-wẽns na n vʋʋgame n bas kũum.

16Yaa woto yĩnga, tɩ mam me maood n dat n paam sũur kaset sẽn yaa sõama Wẽnnaam la ninsaalb taoor daar fãa.

17Mam yii Zeruzalɛm n kaoos yʋʋm wʋsgo, la m lebg n waa be n na n kõ m nebã sõngre, la m maan maoong n kõ Wẽnnaam.

18La b yaool n yãnda maam wẽnd doogẽ wã tɩ m yɩlgd m meng la neb me ka tigme, la rãmbg ka zĩnd me ye.

19La Zʋɩf-rãmb kẽer sẽn yi Aazi soolem dag n bee be la b sã n da tarẽ yell ne maam yaa bãmb n dag tog n yals yãmb taoor n bʋ ne maam.

20Walla, nin-bãmbã sẽn be ka wã togse, b sã n yãnda mam sẽn maan wẽnga, mam sẽn yals kaoreng yɛl-bʋ-bʋʋdbã taoorã.

21Sã n ka bũmb a yembrã mam sẽn maanã, m sẽn yik n yals b sʋk n zẽk m koɛɛg n yeel tɩ: «Yaa mam sẽn tẽed tɩ kũum vʋʋgr beeme wã yĩng n kɩt tɩ yãmb bʋʋd ne maam dũndã.»

22A Feligs sẽn mi Kiris kaorengã yell neerã, a visga bʋʋdã daar n yeel nebã tɩ b kuil tɩ sodaas tusr naab a Liziyaas sã n wa n wa, a na yaool n ges b yellã.

23La yẽnda yeela sodaas koabg naabã t'a gũ a Polle, la a kõ-a lohorem bilfu, la a ra gɩdg a Poll zo-rãmbã sẽn dat n sõng-a wã ye.

24Rasem bilf sẽn paase, a Feligs ne a pag a Dursill sẽn yaa Zʋɩf poakã waame. La a tʋmame tɩ b bool a Poll t'a wa, la yẽnda kelga a Poll sẽn togs tẽeb ne a Zeezi Kirisã sẽn yaa bũmb ninga.

25La a Poll sẽn gom tɩrlmã vɩɩm la tõog-m-menga la bʋ-kaoor sẽn watã yellã, rabeem yõka a Feligs t'a yeel a Poll t'a loog moasã tɩ yẽnda sã n wa paam weere, a na leb n bool-a.

26A ra tẽedame me t'a Poll na n kõ-a-la ligdi, yaa rẽ yĩng n kɩt t'a bool a Poll naoor wʋsg n sõs ne-a.

27La yʋʋm a yiib sẽn looge, a Porkiuus Festuus reega a Feligs zĩig n yaa Gʋvɛrneere. La a Feligs sẽn dat n maan sẽn noom Zʋɩf-rãmbã, a ka kõ a Poll lohorem ye.

← Chapter 23 Jump to: Chapter 25 →