Acts 12

Mossi MPBU (WẼNNAAM SEBRE 2014)

← Chapter 11 Jump to: Chapter 13 →

1La wakat-kãng sasa, rĩm a Erood sɩngame n nams a Zeezi tẽedbã kẽere.

2Yẽnda kɩtame tɩ b kʋ a Zã ba-biig a Zak ne sʋʋga.

3La yẽnda sẽn yã tɩ bõn-kãng taa Zʋɩf-rãmbã yam, a kell n kɩtame tɩ b yõk a Pɩyɛɛre. Rag n yaa bur sẽn ka rã-bɩll tigr daare.

4Rĩm a Erood sẽn yõk a Pɩyɛɛr n kẽes bi-bees roogẽ, a kɩtame tɩ sodaas piig la a yoob gũ a Pɩyɛɛr n dees taab naas-naase, n dag n tagsdẽ tɩ Pakã tigr sã n loog bɩ a yiis-a n kao a bʋʋd nebã nifẽ.

5Dẽ, bi-bees roogã pʋgẽ b ra gũuda a Pɩyɛɛre. La a Zeezi tẽedbã rag n pʋʋsda Wẽnnaam ne b sũur fãa a Pɩyɛɛr yĩnga.

6Yʋng ning sẽn deng rĩm a Erood sẽn na n yiis a Pɩyɛɛr n kao a bʋʋdã, gũudbã rag n bee bi-bees roogã noor n gũudẽ, la b ra balga a Pɩyɛɛr ne bãens a yiib t'a gãe pʋgẽ, Sodaas a yiib tẽn-sʋka.

7Tao-tao bala, Zu-soabã malɛɛk puka a menga la vẽenem n yãg bi-bees roogã pʋgẽ. Malɛɛkã wẽe a Pɩyɛɛr lʋgr n nek-a n yeel-a yaa: Yik tao-tao. La bãensã lʋɩɩme n bas a Pɩyɛɛr nusã.

8Dẽ, malɛɛkã yeela yẽnda t'a sẽb a sẽbdgã la a wid a neooda. A Pɩyɛɛr maana a woto. La malɛɛkã yeel-a lame t'a rɩk a fuugã n yeelg n tũ yẽnda.

9A Pɩyɛɛr tũu malɛɛkã n yi, la a ra ka tagsd tɩ bũmb ningã malɛɛkã sẽn maandã yaa sɩd ye. A ra tagsdame tɩ yẽnda yãnda vẽnegre.

10La bãmb sẽn loog pipi gũudã ne yiib soabã n ta kʋɩleng ning sẽn teesd tẽngã n pag ne kutã, kʋɩlen-kãng paka a toor bãmb taoore. La b yiime n kẽng n dɩk sorã, la tao-tao bala, malɛɛkã loog n basa yẽnda.

11Dẽ, a Pɩyɛɛr yam vẽnegame t'a bãng bũmb ning sẽn maanã. La a yeelame yaa: Moasã, mam bãnga sɩd-sɩd tɩ yaa Zu-soabã n tʋm malɛɛk t'a fãag maam rĩm a Erood nugẽ la ne bũmb ning fãa Zʋɩf-rãmbã sẽn da rat n maan maamã.

12A Pɩyɛɛr sẽn tagse, a kẽnga a Maari yiri. Yaa a Zã b sẽn boond t'a Markã ma. La neb wʋsg n dag n tigim taab beenẽ n pʋʋsdẽ.

13A Pɩyɛɛr wẽe rignoor ning b sẽn kẽedã kʋɩlenga, la tʋmtʋmd poak a yembr yʋʋr sẽn boond t'a Rood kolgame n na n kelge.

14La yẽnda bãnga a Pɩyɛɛr koɛɛgã la a sũurã yɩɩ noog t'a bas kʋɩlengã pakr n wudg n leb pʋgẽ n tɩ togs t'a Pɩyɛɛr n wa n be rignoorẽ wã.

15Bãmb yeela yẽnda t'a zugã lebgame. La tʋmtʋmd-poakã kell n baas n yeelame tɩ yẽnda sẽn yetã yaa sɩda.

16Dẽ, b yeelame tɩ yaa a Pɩyɛɛr malɛɛka. La wakat kãnga, a Pɩyɛɛr dag n ket n wẽeda kʋɩlengã. La b sẽn yaool n pake, b yãnda a Pɩyɛɛre, la b yɛɛsame.

17A Pɩyɛɛr zãasa bãmb ne nug n na n kɩt tɩ b sĩndi. La a Pɩyɛɛr togs-b-la Zu-soabã sẽn maan to-to n yiis yẽnda bi-beesã roog pʋgẽ. La a yeel tɩ b tɩ togs a Zak ne ba-biis a taabã bõn-kãnga. Dẽ, yẽnda yiime n kẽng zĩig a to.

18La beoogã sẽn vẽege, rãmbg kãseng n yik sodaasã sʋka, b sẽn dag n dat n bãng a Pɩyɛɛr sẽn be zĩig ningã yĩnga.

19Rĩm a Erood kɩtame tɩ b bao a Pɩyɛɛre, la b ka yãnd-a ye. Dẽ, rĩm a Erood kɩtame tɩ b kao gũudbã bʋʋdo, la a kõ noor tɩ b kʋ-ba. Rẽ zugẽ, rĩm a Erood yii Zʋʋde n kẽng Sezaare n tɩ pa be wakat bilfu.

20Rĩm a Erood sũur puuga wʋsg ne Tɩɩr la Sɩdõ nebã. Nin-kãensã zemsa taab n na n kẽng rĩm a Erood nengẽ. Bãmb yõga zood ne sõgen ning sẽn manegd rĩmã roogã, la b wa rĩm a Erood nengẽ n na n bao tɩ laafɩ zĩnd bãmb ne rĩmã sʋka, bala rĩmã soolmã n dag n dɩlg bãmb tẽngã.

21Daar ning rĩm a Erood sẽn yãkã sẽn ta, a yeelga a naam fut n zaoond a naam geer zug n gom gom-bɛd nebã taoore.

22La nebã dag n kelemdame n yetẽ: Ka ninsaal n gomd ye, yaa Wẽnd meng n gomde.

23Wakat-kãng bala, Zu-soabã malɛɛk wẽe rĩm a Eroode, yẽ sẽn dɩk Wẽnnaam waoogrã n kõ a mengã yĩnga. La zũnzũy n dɩ-a t'a ki.

24Wẽnnaam koɛɛgã rag n saagdame n yɩɩd pĩnda.

25La a Barnabaas ne a Soll sẽn maan b tʋʋmd Zeruzalɛm n sɛ, b peega a Zã b sẽn boond t'a Mark n lebg n wa Ãntiyoose.

← Chapter 11 Jump to: Chapter 13 →