Acts 19

Mossi MPBU (WẼNNAAM SEBRE 2014)

← Chapter 18 Jump to: Chapter 20 →

1A Apoloos sẽn wa n be Korẽntã wakate, a Poll pɩʋʋga soolem nins sẽn be zugẽ wã n kẽng Efɛɛse. A Poll yãnda karen-biis kẽer be,

2n sok-b tɩ b sẽn tẽ wã, b paama Sɩɩg-sõngo? La b leoka yẽnda tɩ bãmb zɩɩ n wʋm tɩ b gomd tɩ Sɩɩg-sõng n be ye.

3T'a Poll sok-b tɩ rẽ wã lisg ning b sẽn deegã yaa bʋgo? Tɩ b leok tɩ yaa a Zã lisgã.

4Dẽ, a Poll yeel-b lame yaa: A Zã rag n lisda neb nins sẽn tek-b yam n kos sugrã, la b rag n yeta Israyɛll nebã tɩ b tẽ ned ningã sẽn na n pʋgl‑a yẽnda n wa wã. Sẽn dat n togs t'a Zeezi.

5Bãmb sẽn wʋm a woto, b kɩtame tɩ b lis-b koomẽ ne Zu-soab a Zeezi yʋʋre.

6A Poll tika bãmb ne a nusi, la Sɩɩg-sõng siga b zutu. Bãmb sɩngame n gom gom-zẽn n togs bãngr goamã.

7Nin-kãens fãa sõorã ra kolga piig la a yiibu.

8A Poll kẽe karen-doogẽ wã n gom ne Pɛl-kɛgenga, la yẽnda moona Wẽnnaam soolem koɛɛgã kiis a tãabo n maood n dat n wilg sẽn kelgd-b yẽnda wã tɩ yaa sɩda.

9La neb kẽer riglma b sũyã n tõdg tɩ b ka na n tẽ ye. La b gom Zu-soabã sor wẽng neb wʋsgã taoore. Dẽ, a Poll yii bãmb sʋka, n peeg karen-biisã toor n kẽng a Tiranuus kaorengã roog pʋg n zãms-b daar fãa.

10Bõn-kãng kaoosa yʋʋm a yiibu, hal tɩ Zʋɩf-rãmbã ne Gɛrk-rãmbã la neb nins fãa sẽn be Aazi soolmã wʋm Zu-soabã koɛɛgã.

11La Wẽnnaam maana bõn-bãn-kãsems ne a Poll nusi.

12Hal tɩ b rɩgs pɛɛla, wala fut sẽn da sɩɩsd a Poll yĩngã n ningd bãad-dãmbã zut la b paamda maagre, la sɩ-wẽnsã yit n basd-b lame.

13Tɩt rãmb kẽer sẽn dag n yaa Zʋɩf buud n yaa gõaadb makame n na n tall Zu-soab a Zeezi yʋʋrã n dig zĩn-dãmb tɩ b yi n bas bãad-dãmba. Tɩtã rãmb yeela sɩ-wẽnsã yaa: Ne a Poll sẽn moond Zeezi ningã wã yʋʋre, mam yeta yãmb tɩ y yi.

14Neb nins sẽn dag n maand a woto wã yaa Zʋɩf-rãmbã maan-kʋʋdbã kãsem a yembr yʋʋr sẽn boond t'a Seeva kom-dibli a yopoe.

15La sɩ-wẽngã leok-b lame yaa: Mam mii a Zeezi, la mam mii a Poll sẽn yaa ned ninga. La yãmba, yãmb yaa ãnda rãmba?

16La sɩ-wẽngã sẽn tar ned ningã yikame n yẽeg-b n zab ne-b n tõog-b fãa ne pãng hal tɩ b zoe n yi ro-kãng pʋg bɛɛl la ne sãmpoaga.

17La Zʋɩf-rãmbã ne Gɛrk-rãmbã sẽn da be Efɛɛs fãa wʋma bõn-kãnga: La rabeem yõka b fãa, la Zu-soab a Zeezi yʋʋrã paama waoogre.

18Neb nins sẽn tẽ wã wʋsg dag n wat n togsda b sẽn da maan bũmb ninsã nebã taoore.

19La neb wʋsg sẽn da be bãmb sʋkã n yaa bag-bʋgdbã talla b sɛbã n wa n yõog bugum nebã fãa taoore. La b geela sɛbã ligd n mik tɩ taa wanzuri ligd tus pis‑nu.

20Woto kɩtame tɩ Zu-soabã koɛɛg saag ne pãnga, la tõogre.

21Bõn-kãens zugẽ, a Poll yãka yam n na n pɩʋʋg Masedoan ne Akayi n kẽng Zeruzalɛm, la a yet tɩ yẽnda sã n ta beenẽ, yaa tɩlɛ t'a kẽng Rom tẽng me.

22A Poll tʋma a sõangdb a yiib tɩ b kẽng Masedoan, yaa a Tɩmote ne a Eraste. La yẽnda meng leb n paa Aazi soolem n kaoos bilfu.

23Wakat-kãnga, rãmb-kãsems n yik Zu-soabã sor wɛɛngẽ.

24Yõak a yembr n da be t'a yʋʋr boond t'a Demetiryuusi, yẽnda ra maanda wẽn-poak a Artemi pʋʋsg ro-bãooneg ne wanzuri. A maanda a woto t'a tʋmtʋmdbã paamd ligd wʋsgo.

25Yẽnda tigma nin-bãmb ne neb nins sẽn yaa yõgsã n yeel-b yaa: Raopa, yãmb fãa miime tɩ yaa ne nug-tʋʋm‑kãngã la tõnd tʋmd n paamd ligdi.

26La yãmb yãtame la y wʋmd bũmb nins rao a Pollã sẽn maandã. Bala, yẽnda yetame tɩ nebã nus sẽn maan wẽnnaam-dãmb ninsã ka wẽnnaam-dãmb ye, la a tõogame n tek neb wʋsg yam. La ka Efɛɛs soolem bal ye, yaa sẽn kolg Aazi fãa gilli.

27Sã n ka gũusi, bõn-kãngã na n sãama tõnd tʋʋmdã, la sẽn paase, a na n maaname tɩ wẽn-poak kãseng a Artemi pʋʋsgã roog ka leb n tar waoogr ye. Dẽ, Aazi soolem nebã fãa ne dũniyã fãa sẽn da pʋʋsd wẽn-poak ningã ka na n leb n paam pẽgr ye.

28B sẽn wʋm gom-kãensã, b sũyã yikame tɩ b kelem n yeel yaa: Efɛɛsẽ-rãmbã Artemi wã yaa kãsenga.

29La tẽngã fãa rãmbame. Bãmb yõga a Gayuus ne a Aristark sẽn yaa Masedoan nebã n yaa a Poll tũud-n-taasã, n naag taab n wudg tao-tao n kẽ reemã zĩigẽ.

30A Poll dag n dat n kẽnga neb kʋʋngã taoore, la karen-biisã gɩdg-a lame.

31Kãsem-dãmb kẽer meng sẽn be Aazi soolem n yaa a Poll Zo-rãmb tʋmame tɩ b kos-a t'a ra kẽng reemã zĩigẽ ye.

32La wakat-kãnga, neb kẽer kelemdame n yet tɩ woto, tɩ neb kẽer kelem n yeel bũmb a to. Bala, neb kʋʋngã rãmbdame, hal tɩ neb kẽer meng rag n ka mi bũmb ning yĩng sẽn kɩt tɩ b tigma ye.

33La b kɩtame t'a Alegsãndr yi kʋʋngã sʋka, tɩ Zʋɩf-rãmbã tus-a t'a kẽng nebã taoore. La a Alegsãndr zẽka a nug n na n gom nebã taoore.

34La nebã sẽn bãng t'a Alegsãndr yaa Zʋɩfã, b fãa naaga taab n kelem hal tɩ kolg lɛɛr a yiib n yetẽ tɩ Efɛɛsẽ-rãmbã wẽn-poak a Artemi yaa kãsenga.

35Baoosgo, tẽnga seb-gʋlsdã tõogame tɩ nebã sĩndi, la a yeel yaa: Efɛɛs nebã, ãnda soab n ka mi tɩ yaa Efɛɛs tẽngã n yaa Artemi kãsenga pʋʋsg roog gũuda, la Artemi naandã sẽn yi yĩngr n lʋɩ wã gũuda?

36La ned ka tõe n kɩɩs bõn-kãng ye. Rẽ wã yĩnga, y tog n maaga y mense n da maan bũmb baa fʋɩ ne yãgb ye.

37Bala, rap kãens yãmb sẽn tall n wa ka wã, b ka paooge, wala b tʋʋs tõnd wẽn-poakã ye.

38Rẽ wã yĩnga, a Demetiryuus ne a tʋmd-n-taasã sã n tar yell ne neda, bʋʋd ray beeme, la bʋ-kaoodb beeme. Bɩ b tɩ bʋ ne taab be.

39Yãmb sã n ket n tar yɛl a taaba, bʋ-kaoodbã sã n wa tigim wa sẽn zems ne tõogã, b na ges yel-kãng yelle.

40La sɩdã, b tõe n dõda tõnd n yet tɩ d rãmbda tẽngã, bũmb ning sẽn maan dũndã wã yĩnga. Bala, tõnd ka tar bũmb sẽn wilgd tɩ d tara noor tɩ tigim a woto ye. La yẽnda sẽn gom a woto n sɛ, a kɩtame tɩ nebã looge.

← Chapter 18 Jump to: Chapter 20 →