Acts 14

Mossi MPBU (WẼNNAAM SEBRE 2014)

← Chapter 13 Jump to: Chapter 15 →

1A Poll ne a Barnabaas tũu taab n kẽ Zʋɩf-rãmbã karen-doog a yembr pʋg sẽn be Ikoniyom, la b gomame n tõog tɩ Zʋɩf-rãmbã wʋsg ne Gɛrk-rãmbã lebg tẽedbã.

2La Zʋɩf-rãmb nins sẽn ka tẽ wã kɩtame tɩ bu-zẽmsã yik beem ne karen-biisã.

3A Poll ne a Barnabaas paa Ikoniyom n kaoose. A Poll dãmb dag n kɩsa sɩd ne Zu-soabã n gomd ne pɛl-kɛgenga. La Zu-soabã kɩsa bãmb bark goamã a Poll dãmb sẽn moondã kaseto n kõ bãmb pãn-tõog tɩ b maan bãna, la bõn-yɛɛsds ne b nusi.

4La tẽngã nebã welga taaba, tɩ kẽer ra be Zʋɩf-rãmbã poorẽ, tɩ kẽer be tʋmtʋmdbã poorẽ.

5La bu-zẽmsã ne Zʋɩf-rãmbã la b nanambsã sɩngame n segl b mens n na n maan a Poll dãmb wẽnga, la b lob bãmb kug n kʋ.

6La a Poll ne a Barnabaas sẽn bãnge, b zoeeme n kẽng Listr ne Dɛrb tẽmsã, sẽn be Likaoni soolmã, la tẽms a taab sẽn pẽ be.

7La b moona koe-noogã beenẽ.

8Dao a ye n da be Listr t'a nao ki t'a ka tõe n yik ye. Yẽ sẽn dogã tɛka, a yaa põore la a zɩ n tõog n kẽn ye.

9Yẽnda ra kelgda bũmb ning a Poll sẽn togsdã. La a Poll ges-a lame n bãng t'a tara tẽeb n tõe n paam maagre.

10A Poll zẽka a koɛɛg n yeel raoã t'a yik n yals a naoã zugu. La raoã yɩɩ yagbg n yik n sɩng kẽna.

11Neb kʋʋngã sẽn yãnd bũmb ning a Poll sẽn maanã, b zẽka b koees n yeel ne Likaoni-rãmbã goam tɩ yaa Wẽnnaam dãmb n dɩk yĩng n sig n wa bãmb sʋka.

12B pʋda a Barnabaas yʋʋr t'a Zeese, la b pʋd a Poll t'a Ɛrmees sẽn dag n yaa yẽndã n gomdã yĩnga.

13Wẽnnaam ning b sẽn boond tɩ zeesã pʋʋsgã roog rag n bee tẽngã noore, la zees maan-kʋʋdã baoo tɩ-puud n wʋg n pid lols yubli n tall-b n wa tẽnga noy n dat tɩ neb kʋʋngã lagem yẽnda tɩ b maan maoong n kõ a Poll ne a Barnabaase.

14La tʋmtʋmdb a yiibã sẽn wʋm bõn-kãnga, b kẽesa b fut n wudg n kẽ kʋʋngã sʋk n kelem n yeel yaa:

15Daopa, yaa bõe tɩ y maand a woto? Tõnd me yaa ninsaalb wa yãmb bala. Tõnd moonda yãmb koe-noog n yet-y tɩ y bas wẽn-naan-kãens sẽn ka tar yõodã la y wẽnemd n sak Wẽnnaam ning sẽn vɩ wã la sẽn naan yĩngr la tẽngã, la ko-kãsengã ne bũmb nins fãa sẽn be a pʋgẽ wã.

16Yʋʋm sẽn looge, Wẽnnaam sẽn vɩ wã basa buudã fãa tɩ b maan b yam daabo.

17La baoosgo, Wẽnnaam maana kaset n wilg-b tɩ bãmb beeme. Bãmb maana neere, n kõ yãmb saag t'a niid tɩ sẽoog ne bõn-bɩʋʋng beẽ, tɩ rɩɩb sekd yãmb n pids y sũyã ne sũ-noogo.

18Baa ne gom-kãensã, yɩɩ toog ne tʋmtʋmdbã tɩ b tõog tɩ nebã ra maan maoong n waoog-ba.

19La Zʋɩf-rãmb n yi Ãntiyoos ne Ikoniyom n wa rãmb nebã tɩ b lob a Poll kuga. La b sẽn tẽed t'a kiime wã, b vuuga yẽnda n yiis tẽngã pʋga.

20La tẽedbã gũbga a Poll la a leb n yikame n kẽ tẽngã pʋga. La vẽkembeoogo, a Poll ne a Barnabaas kẽnga tẽng a yembr sẽn boond tɩ Dɛrbe.

21La bãmb sẽn moon koe-noogã tẽngã pʋga, b paamame tɩ neb wʋsg lebg karen-biisi. La a Poll ne a Barnabaas lebg n leba Listr ne Ikoniyom la Ãntiyoos yɛsa.

22Bãmb belsa tẽedbã sũyã n paas-b raood n sagl-b tɩ b yals tẽebã pʋg kãenkãe n yeel-b yaa: Yaa tɩlɛ tɩ tõnd paam namsg wʋsg n yaool n tõog n kẽ Wẽnnaam soolmẽ wã.

23A Zeezi tẽedbã sẽn be zĩig ninsã fãa, a Poll dãmb yãka kãsem-dãmb n kõ-ba. La bãmb loee noor n pʋʋs n dɩk-b n bas Zu-soab ningã bãmb sẽn tẽ a soabã nugẽ.

24La a Poll ne a Barnabaas pɩʋʋga Pisidi soolem n kẽng Paamfili soolem.

25Bãmb moona Wẽnnaam koɛɛgã Pɛrz n yaool n kẽng Atali.

26Bãmb kẽe koom-koglg tẽn-kãng n leb Ãntiyoose, yaa tẽng ning b sẽn dag n ning b zut bark tɩ b maan tʋʋmd ning bãmb sẽn maanã.

27La b sẽn ta Ãntiyoose, b tigma a Zeezi tẽedbã fãa n togs-b Wẽnnaam sẽn tall bãmb n maan bũmb nins fãa wã. La sẽn yɩ to-to tɩ Wẽnnaam pak sor tɩ bu-zẽmsã me tõe n tẽ wã.

28La a Poll dãmb paa be ne Kiris tẽedbã n kaoose.

← Chapter 13 Jump to: Chapter 15 →