Leviticus 13 — Mossi MPBU (WẼNNAAM SEBRE 2014)

1Sẽn-Ka-Saab yeela a Moyiis ne a Aarõ yaa:

2B sã n wa n mik tɩ ned n tar yũur a yĩn-gãongã zugu, ka rẽ bɩ a soabã gãong fʋkdame, wall a sã n yãk zĩig n pelge, n lebg wa wãood bãag gãongã zugu, bɩ b tall a soab n kẽng maan-kʋʋd a Aarõ nengẽ, sã n ka rẽ bɩ a Aarõ bi-ribl a yembr nengẽ.

3Maan-kʋʋdã na n maaga a meng n ges nodrã sẽn be yĩn-gãongã zugã. Sã n mikame tɩ yĩn-koabnengã sẽn be nodrã pʋgã lebga pɛɛlga, tɩ nodrã zĩig võd n kẽ pʋgẽ, wilgdame tɩ yaa wãood nodre. Bɩ maan-kʋʋdã ges a soaba, la a wilg t'a yaa rẽgdo.

4La sã n mikame tɩ bõn-pɛɛlg n be yĩn-gãongã zugu, t'a zĩigã ka võd n kẽ pʋgẽ, la tɩ yĩn-kõabnengã me ka lebg pɛɛlga, bɩ maan-kʋʋdã ning ned ning sẽn tar-a nodrã kɛɛnga rasem a yopoe.

5La rasem a yopoe wã daare, bɩ maan-kʋʋdã maag a meng n ges-a. Sã n mikame tɩ nodrã ka paasde, la a ka yalgd yĩn-gãongã zugu, bɩ maan-kʋʋdã leb n ning a soabã kɛɛng rasem a yopoe yɛsa.

6Rasem a yopoe-kãens sã n pidi, bɩ maan-kʋʋdã leb n ges-a naoor a yiibẽ soaba. Sã n mik tɩ nodrã boogame, n ka yalg yĩn-gãongã zugu, bɩ maan-kʋʋdã wilg t'a soabã yaa yɩlemde. Rẽ, rat n yeelame tɩ yaa yĩn-fʋkr bala, la bɩ a soabã pegs a futu, n lebg yɩlemde.

7La maan-kʋʋdã sẽn ges-a n yeel t'a yaa yɩlemdã poore, b sã n mik tɩ yĩn-fʋkrã yɛdga yĩn-gãongã zugu, bɩ a lebg n leb maan-kʋʋdã nengẽ naoor a yiibẽ soaba,

8tɩ maan-kʋʋdã leb n ges-a. Sã n mikame tɩ yĩn-fʋkrã yɛdga yĩn-gãongã zugu, bɩ maan-kʋʋdã wilg t'a yaa rẽgdo, bala, yaa wãoodo.

9Wãood sã n puk ned yĩn-gãong zugu, bɩ b tall a soabã n kẽng maan-kʋʋdã nengẽ,

10tɩ maan-kʋʋdã ges-a. Sã n mikame tɩ nod-pɛɛlg n be yĩn-gãongã zugu, la nodrã sã n kɩtame tɩ yĩn-kõabnengã pelge, la yĩn-nemdã sã n nudgame n yi nodrã pʋga,

11wilgdame tɩ yaa wãood sẽn paam pãng nin-kãng yĩn-gãongã zugu. Bɩ maan-kʋʋdã wilg t'a soabã yaa rẽgdo. B ka leb n baood n ning a soabã kɛɛng ye. Bala, a zoe n yaa rẽgdo.

12La wãoodã sã n yɛdg n kẽ ned ning sẽn tar-a nodrã yĩn-gãongã zĩig fãa, n sɩng ne a zugã n tall n tɩ tãag a naoã, tɩ maan-kʋʋdã tõe n yãnd tɩ yaa zĩigã fãa,

13bɩ maan-kʋʋdã maag a meng n ges-a. La sã n mikame tɩ wãoodã yɛdg n luda a yĩngã zãnga, bɩ maan-kʋʋdã wilg tɩ ned ning sẽn tar-a nodrã yaa yɩlemde. Bala, yẽnda mengã zãng lebga pɛɛlga, dẽ, a yaa yɩlemde.

14La daar ninga b sẽn na n mik tɩ yĩn-nemdã nudgame wã, yaa badaar la b na n yeel t'a soabã yaa rẽgdo.

15Maan-kʋʋdã sã n yãnd tɩ yĩn-nemdã nudgame, bɩ a wilg t'a soabã yaa rẽgdo. Nodr yaa rẽgdo. Bala, yaa wãood buud a to.

16La yĩn-nemdã sẽn nudgã sã n tek n lebg pɛɛlga, bɩ nodrã soab kẽng maan-kʋʋdã nengẽ,

17t'a ges-a. Dẽ, nodrã sã n yaa pɛɛlga, bɩ maan-kʋʋdã wilg tɩ ned ning sẽn tar-a nodrã yaa yɩlemde, a ka leb n yaa rẽgd ye.

18Yĩn-gãong bãag sã n yõk ned n lebg n maage,

19tɩ b wa n mik tɩ yũur n puk zĩig ning nodrã sẽn dag n zĩndã, n tẽgs-tẽgs pɛɛl-pɛɛla, la miid-miidu, bɩ a soabã kẽng tɩ maan-kʋʋdã ges-a.

20Bɩ maan-kʋʋdã maag a meng n ges a zĩigã. B sã n mik tɩ nodrã zĩigã võd n kẽe pʋgẽ, tɩ yĩn-kõabnengã lebg pɛɛlga, bɩ maan-kʋʋdã wilg t'a soabã yaa rẽgdo. Rat n yeelame tɩ yaa wãood n puk nodrã zugu.

21La maan-kʋʋdã sã n mik tɩ yĩn-kõaben-pɛɛlg ka tol n be tẽgsem-tẽgsmã zugu, la a ka võd n kẽ pʋgẽ, la a pʋs n maagdame, bɩ a ning a soabã kɛɛng rasem a yopoe.

22La rẽ zugẽ, tẽgsem-tẽgsmã sã n yɛdg n kẽ yĩn-gãongã zugu, bɩ maan-kʋʋdã wilg t'a soabã yaa rẽgdo. Wilgdame tɩ yaa wãoodo.

23La b sã n mik tɩ tẽgsem-tẽgsmã ka teke, la a ka yɛdge, wilgdame tɩ yaa nod-rãoongo. Bɩ a wilg t'a soabã yaa yɩlemde.

24Bugum sã n dag n yõog neda, tɩ b wa n mik tɩ bugmã nodrã tẽgsa pɛɛl-pɛɛla, wall pɛɛl ne miidu,

25bɩ maan-kʋʋdã maag a meng n ges a soabã. B sã n mik tɩ yĩn-kõabnengã sẽn be tẽgsmã pʋgã lebga pɛɛlga, la a zĩigã sã n võdame, wilgdame tɩ yaa wãood n puk bugmã nodr zugu. Bɩ maan-kʋʋdã wilg tɩ nin-kãng yaa rẽgdo. Bala, yaa wãoodo.

26Maan-kʋʋdã sã n ges n mik tɩ yĩn-kõaben-pɛɛlg ka be tẽgsmã zugu, la nodrã sã n ka võde, la sã n mik t'a maagame, bɩ maan-kʋʋdã ning a soabã kɛɛng rasem a yopoe.

27La rasem a yopoe wã daar sã n ta, bɩ maan-kʋʋdã ges-a. A sã n mik tɩ nodrã yɛdga yĩn-gãongã zugu, bɩ maan-kʋʋdã wilg t'a soabã yaa rẽgdo. Bala, yaa wãoodo.

28La nodrã sã n kell n pa zĩ-yɛnga, la a sã n ka yɛdg yĩn-gãongã zugu, la sã n mik t'a maagame, wilgdame tɩ yaa bugum nodr bala. Bɩ maan-kʋʋdã wilg t'a soabã yaa yɩlemde, bala, yaa bugum nod-rãoongo.

29Yĩn-gãong bãag sã n yõk rao bɩ pag zugu, ka rẽ bɩ a lemde,

30bɩ maan-kʋʋdã maag a meng n ges bãagã sẽn beẽ wã. Sã n mikame t'a zĩigã võdame n kẽ, tɩ yĩn-koabnengã yaa kõodre, wilgdame t'a soabã yaa rẽgdo. Woto yaa sẽn wilgd tɩ yaa rasempʋɩɩga. Rẽndã yaa zug bɩ lemd wãoodo.

31La maan-kʋʋdã sã n mik tɩ rasempʋɩɩgã ka võd n kẽ pʋgẽ, la a ges tɩ yĩn-koabnengã ka sablga, bɩ a ning rasempʋɩɩgã sẽn tar a soabã kɛɛng rasem a yopoe.

32La rasem a yopoe wã daare, bɩ maan-kʋʋdã maag a meng n ges nodrã. La a sã n mik tɩ rasempʋɩɩgã ka yalge, la yĩn-kõabnengã sã n ka kõodr-kõodre, la nodrã zĩig sã n ka võd n kẽ pʋgẽ,

33bɩ a soabã põng a zugu, la a põng n gil rasempʋɩɩgã zĩig n base. La bɩ maan-kʋʋdã leb n ning a soabã kɛɛng rasem a yopoe yɛsa.

34La rasem a yopoe kãens sã n pidi, bɩ maan-kʋʋdã maag a meng n ges rasempʋɩɩgã zĩigã. La sã n mikame tɩ rasempʋɩɩgã ka yalg yĩn-gãongã zugu, la a zĩigã sã n ka võd n kẽ pʋgẽ, bɩ maan-kʋʋdã wilg t'a yaa yɩlemde. La a soabã tog n pegsa a futu, n lebg yɩlemde.

35La sã n mikame tɩ b sẽn wilg t'a yaa yɩlemdã loogr zugẽ, rasempʋɩɩgã yalga yĩn-gãongã zugu,

36bɩ maan-kʋʋdã leb n maag a meng n leb n ges-a yɛsa, la sã n mik tɩ rasempʋɩɩgã yalga yĩn-gãongã zugu, ka leb n yaa tɩlɛ tɩ maan-kʋʋdã bao n bãng yĩn-koabnengã sã n teka kõbg ye. Wilgdame bal t'a soabã yaa rẽgdo.

37La sã n wẽnda wa rasempʋɩɩgã ka yalg n paase, la sã n mik tɩ yĩn-kõabnen-sabl n yita, wilgdame tɩ rasempʋɩɩgã maagame. A soabã yaa yɩlemde. Bɩ maan-kʋʋdã wilg t'a soabã yaa yɩlemde.

38Rao bɩ pag sã n wa n tar tẽgsem-pɛɛl a yĩn-gãongã zugu,

39bɩ maan-kʋʋdã maag a meng n ges a soabã. Sã n mikame tɩ zĩ-pɛɛlgã ka pɩnda, wilgdame tɩ yaa yũy n puk a soabã yĩng zugu. Dẽ, yẽnda soab yaa yɩlemde.

40Ned zoobd sã n sʋʋg t'a soab lebg zu-kõogo, yẽnda yaa yɩlemde.

41Ned rĩir zoobd sã n sʋʋge, yẽnda soab yaa dĩirẽ zu-kõogo. A soab yaa yɩlemde.

42La nodr sẽn tẽgs pɛɛl-pɛɛl miid-miid sã n puk dĩirã sẽn kõogã zugu, wall kãarã sẽn kõogã zugu, wilgdame tɩ yaa wãood n puk a soabã zugu.

43Wakat-kãnga, maan-kʋʋdã tog n maaga a meng n ges a soabã. Dẽ, b sã n mik tɩ bãagã zĩigã lebga nodre, n tar pɛɛl la miid rĩirẽ wã bɩ kãarẽ wã, n wẽnd wa wãood sẽn yaa to-to yĩn-gãong zugã,

44rat n togsame t'a soabã yaa wãoore, la a yaa rẽgdo. Bɩ maan-kʋʋdã wilg t'a soabã yaa rẽgdo. Bala, wãood n yõk a soabã zugu.

45Sã n wa n yaa a woto, bɩ wãoorã yeelg fu-kʋdse, la a ra leb n sãas a zug ye. Bɩ a lud a no-kõbdã n kelem n yeele: Rẽgdo! Rẽgdo!

46La bãagã sẽn na n tall yẽnda wã tɛka, a na n yɩɩ rẽgdo. A soabã sẽn lebg rẽgdã yĩnga, a tog n vɩɩmda a yembre. Yẽnda tog n yii sik zĩigã pʋg n tɩ vɩɩmd kɛɛnga.

47B sã n mik tɩ wãood n puk fuug sẽn wʋg ne pe-kõbd zugu, sã n ka rẽ bɩ fuug sẽn wʋg ne lamd gĩsg zugu,

48a sã n bee pãnd zugu, wall gĩs-lobr zugu, wall a sã n bee gãong zugu, bɩ zapd teed zugu,

49bãagã sẽn puk zĩig ningã sã n lebg kẽega, bɩ miuug fuugã zugu, wall gãongã zugu, sã n ka rẽ bɩ pãndã bɩ gĩs-lobrã zugu, wall zapdã teed zugu, wilgdame tɩ yaa wãood bãaga. Bɩ b tall-a n tɩ wilg maan-kʋʋdã.

50Bɩ maan-kʋʋdã maag a meng n ges-a, la a rɩk bũmb nins wãoodã sẽn tarã n ning kɛɛng rasem a yopoe.

51La rasem a yopoe wã daare, bɩ a gese. Sã n mik tɩ bãagã yalga fuugã zugu, bɩ pãnda, wall gĩs-lobrã zugu, sã n ka rẽ bɩ zapdã teed zugu, wilgdame tɩ yaa wãood sẽn sɩd yaa wẽnga. Dẽ, bõn-kãng lebga rẽgdo.

52Dẽ, bɩ maan-kʋʋdã rɩk bãmb n yõog bugum. Sã n yaa fuugu, bɩ pãnde, wall gĩs-lobre, bɩ pe-kõbdo, wall lamd gĩsga, wall sã n leb n yaa zapd teed zug la bãagã be, yaa wãood sẽn yaa wẽnga. Sẽn yaa teed nins fãa, bɩ b yõog-a bugum.

53La maan-kʋʋdã sã n mik tɩ bãagã ka yalg fuugã bɩ pãndã zugu, wall a ka yalg gĩs-lobrã bɩ zapdã teed zugu,

54bɩ a kɩt tɩ b pek bũmb ning bãagã sẽn yõkã, t'a reeg-a n leb n ning kɛɛng rasem a yopoe.

55B sã n pek bũmbã n sɛ, bɩ maan-kʋʋdã reeg-a n maag a meng n ges-a. Bãagã sã n ka tek yalẽ, la baa a sã n ka yalge, bũmbã ket n yaa rẽgdo, la a tog n yõog-a-la bugum. Bãagã sã n bee bũmbã nen-lebendẽ tɩ yaa a nen-sõngẽ, ka rẽ la yellã ye.

56La maan-kʋʋdã sã n mik tɩ pekrã poore, bãagã boogame, bɩ maan-kʋʋdã wolg gĩsgã, wall zapdã teoogã zĩ-kãngã.

57La bãagã sã n leb n puk fuugã zugu, sã n ka rẽ bɩ pãndã zugu, wall zapdã teoog zugu, wilgdame tɩ yaa wãoodo. Wakat-kãng bɩ b yõog bũmb ning bãagã sẽn yõkã bugum.

58La b sã n pek fuugã, bɩ pãndã, sã n ka rẽ bɩ zapdã teoogã, n mik tɩ bãagã yi n bas-a lame, bɩ b leb n pek-a naoor a yiibẽ soaba, n kɩt t'a lebg yɩlemde.

59Woto yaa tõogo, wãood wɛɛngẽ, sẽn kẽed ne fuugu, pãnde, gĩsga, wall zapd teed wɛɛngẽ. Tõ-kãngã kɩtdame tɩ b bãng bũmb ning b sẽn yeel tɩ yaa yɩlemde, wall yaa rẽgdo.