Leviticus 22

Mossi MPBU (WẼNNAAM SEBRE 2014)

← Chapter 21 Jump to: Chapter 23 →

1Sẽn-Ka-Saab yeela a Moyiis yaa:

2«Wilg a Aarõ ne a kom-dibli wã tɩ mam yeelame: ‹Gũus-y y mens ne kũun sẽn welg toorã Israyɛll nebã sẽn wat n kõt maamã n da wa paoog mam yʋʋrã ye. Mam yaa Sẽn-Ka-Saabo.› »

3Bɩ f yeel-b yaa: «Zamaan woo zamaane, yãmb yagensã ned ning sẽn dat-a n kolg kũun ning Israyɛll nebã sẽn wa n kõ Sẽn-Ka-Saabã, n yaool n be rẽgd pʋga, bɩ b yiis nin-kãng mam taoor n tɩ kʋ. Mam yaa Sẽn-Ka-Saabo.

4A Aarõ yagensã sʋka, yĩn-gãong bãag bɩ taoor bãag sã n tar neda, a soabã tog n gũusame n da rɩ kũun sẽn welg toorã, hal t'a wa n lebg yɩlemde. A yaa woto me ne ned ning sẽn sɩɩs ned a to sẽn sɩɩs kũum n dẽgem a menga, wall a sẽn sɩɩs neda, a soab rogem bõn-buud koom sẽn daagd wakate,

5wall ned sã n sɩɩs bõn-saagdg n dẽgem a menga, wall a sẽn sɩɩs ninsaal sẽn lebg rẽgdo, n dẽgem a menga.

6Ned ning sẽn na n sɩɩs-a bõn-kãng na n yɩɩ rẽgd hal tɩ ta zaabre. La yẽnda ka tog n dɩ kũun ning sẽn welg toorã ye, la a tog n soo koom,

7la wĩntoogã kõom poore, a soabã na n yaool n lebga yɩlemde, la wakat-kãnga, a tõe n dɩɩ kũun ning sẽn welg toorã, bala, yaa yẽnda rɩɩbo.

8Maan-kʋʋd ka tog n dɩ rũng sẽn ki a toore, wall rũng a to sẽn kʋ n dẽgem a meng ye. Mam yaa Sẽn-Ka-Saabo.

9Bãmb tog n gũusa neer n sak mam tõogã n da wa paoog-a, tɩ yel-wẽnd lʋɩ b zug n kɩt tɩ b ki ye. Mam yaa Sẽn-Ka-Saab sẽn welg bãmb toore.

10Ned sã n ka maan-kʋʋda, a ka tog n dɩ kũun sẽn welg toorã ye. Nin-loaagdg sã n sig yãmba, wall yãmb sã n dɩk ned tʋʋmd n yaood-a, a soab ka tog n dɩ kũun sẽn welg toorã ye.

11La maan-kʋʋdã sã n da yamb ne ligdi, yambã tõe n dɩɩ kũun sẽn welg toorã. Sẽn paase, yamb sẽn dog zakã pʋg me tõe n dɩɩ kũun sẽn welg toorã. Bãmb tõe n dɩɩme tɩ bala, yaa b soaal rɩɩbo.

12Maan-kʋʋdã bi-pugl ning sẽn kẽ-a kãadem ne ned sẽn ka maan-kʋʋd ka tog n dɩ kũun sẽn welg toorã ye.

13La sã n mikame tɩ maan-kʋʋdã bi-pugl yaa pʋg-kõore, wall a yaa pag a sɩd sẽn base, t'a ka tol n paam biiga, t'a lebg n wa be a ba wã zakẽ wa yẽnda sẽn dag n be beenẽ a pʋg-sademd wakatã, yẽnda tõe n dɩɩ a ba wã rɩɩbo. La ned sã n ka maan-kʋʋda, a ka tog n dɩ-a ye.

14La ned sã n dɩ kũun sẽn welg toorã ne yĩdgu, bɩ a yao maan-kʋʋdã wa sẽn zems rɩɩbã yaoodo, la a paas yaoodã sẽn pʋɩ zĩis a nu pʋɩɩr a ye.

15Maan-kʋʋdbã ka tog n maan yaar ne nebã kũun sẽn welg toorã bãmb sẽn yãk n na n kõ Sẽn-Ka-Saabã ye.

16Bãmb sã n bas tɩ Israyɛll nebã rɩ kũun sẽn welg toorã tɩ yaool n ka zemse, bãmb rogenda yell Israyɛll nebã zugu. Mam yaa Sẽn-Ka-Saabo, la yaa maam n welg maan-kʋʋdbã toore.»

17Sẽn-Ka-Saab yeela a Moyiis yaa:

18«Gom ne a Aarõ ne a kom-dibli wã, la ne Israyɛll nebã fãa n yeel-b yaa: Israyɛll ned bɩ sãan sẽn be Israyɛll tẽngã sã n dat n maan maoong sẽn yõogd bugum n kõ Sẽn-Ka-Saabo, sã n ka rẽ bɩ a sã n dat n pids a pʋlengo, wall sã n yaa yamleoog kũuni, baa sẽn yaa kũun ning fãa,

19bɩ a bao rũm-daoog sẽn ka tar zang rũmsã sʋka, sã n yaa naafo, bɩ pesgo wall bʋʋga, tɩ mam yaool n sak n deege.

20Bɩ y ra wa ne rũng sẽn tar zang n na n wa kõ maam ye. Bala, mam ka na n sak n deeg-a ye.

21Ned sã n dat n wa ne rũm-bedr bɩ rũm-bil n maan zems-n-taar maoong n kõ Sẽn-Ka-Saabo, sã n yaa pʋleng pidsgu, wall sã n yaa yamleoog kũuni, tog n yɩɩ rũng sẽn ka tol n tar zanga, tɩ Sẽn-Ka-Saab yaool n deege. Rũngã ka tog n tar zang ye.

22Yãmb ka tog n kõ Sẽn-Ka-Saab rũng sẽn yaa zoanga, nao-fiuungu, sẽn pogle, wall sẽn tar nodre, wall burguudu bɩ nod-pags sẽn tar ye. Yãmb ka tog n dɩk rũng a woto n maan maoong sẽn yõogd bugum tẽn-kugrã zug n kõ Sẽn-Ka-Saab ye.

23Fo tõe n dɩka loalg bɩ pe-ribl sẽn tar nao-wogd n maan yamleoog kũun maoongo, la b ka tõe n dɩk-a n maan pʋleng pidsg maoong ye.

24Da rɩk-y rũng lan-biis sẽn pogle, wall sẽn kudi, sã n ka rẽ bɩ sẽn kɩsge, wall b sẽn fiuugi, n maan maoong y tẽngã pʋg n kõ Sẽn-Ka-Saab ye.

25Baa sãan sã n wa ne rũng a woto buud bɩ y ra reeg-a tɩ yɩ rɩɩb kũun yãmb Wẽnnaamã yĩng ye. Bala, yaa rũng sẽn tar zanga, n ka sõama ye. Dẽ, Wẽnnaam ka na n sak n deeg yãmb kũun-kãng ye.»

26Sẽn-Ka-Saab yeela a Moyiis yaa:

27«Naafo, bɩ pesgo, wall bʋʋg sã n doge, b kambã tog n paa ne b ma wã rasem a yopoe. La rasem a nii wã tɛk n tar n dabdã, a tõe n yɩɩ maoong sẽn yõogd bugum Sẽn-Ka-Saab waoogr yĩnga.

28Bɩ y ra kʋ nag-yãanga, pe-yãanga wall bʋ-yãang ne a biig daar a yembr ye.

29Yãmb sã n na n maan maoong n pʋʋs Sẽn-Ka-Saab barka, bɩ y maan-a wa sẽn segde, tɩ bãmb deeg yãmba.

30B tog n wãba rũngã nemd zãng maoongã daar bala, la b ka tog n bas-a t'a vẽeg beoog ye. Mam yaa Sẽn-Ka-Saabo.

31Bɩ y sak mam tõodã, n maan wa b sẽn yeelã. Mam yaa Sẽn-Ka-Saabo.

32Bɩ y ra paoog mam yʋʋrã sẽn welg toorã ye. Kɩt-y tɩ m yʋʋrã paam pẽgr Israyɛll nebã sʋka. Mam yaa Sẽn-Ka-Saab sẽn welg yãmb toore,

33la m yiisa yãmb Ezɩpt tẽngã n na n yɩ yãmb Wẽnnaam. Mam yaa Sẽn-ka-Saabo.»

← Chapter 21 Jump to: Chapter 23 →

Recommended Reading

Commentary Leviticus Commentaries → Devotional Leviticus Devotional Guide → Get This Bible Mossi MPBU (WẼNNAAM SEBRE ) Study Bible →