Leviticus 4

Mossi MPBU (WẼNNAAM SEBRE 2014)

← Chapter 3 Jump to: Chapter 5 →

1Sẽn-Ka-Saab goma ne a Moyiis n yeel-a yaa:

2«Gom ne Israyɛll nebã n yeel-b woto: Ned sã n maan kongr ne yĩdgu, n kɩɩs Sẽn-Ka-Saab tõ-bãmbã sẽn gɩdgã n maan tʋʋmd sẽn ka zemse, ad a sẽn tog maane:

3Sã n mikame tɩ yaa maan-kʋʋr kãsmã b sẽn pʋdg a zug kaamã n beege, n kɩt tɩ nebã lʋɩ kongr pʋgã, yẽnda tog n waa ne loalg sẽn ka tar zanga, tɩ b maan maoong n kõ Sẽn-Ka-Saab tɩ yẽnda tõe n paam a kongrã sugri.

4Yẽnda tog n talla loalgã n wa sɛk roogã noore, Sẽn-Ka-Saab taoore. La a rɩk a nug n palg loalgã zugu, n kodg-a Sẽn-Ka-Saab taoore.

5Maan-kʋʋr kãsma b sẽn pʋdg kaamã a zugã, na n dɩka loalgã zɩɩmã n tall n kẽ sɛk roogã pʋga.

6Yẽnda na n dɩka a nug-bil n tẽk zɩɩmã pʋga, n mes-a naoor a yopoe Sẽn-Ka-Saab taoore, n tees fu-lillidgã sẽn be zĩ-sõngẽ wã sẽnẽ.

7Maan-kʋʋr kãsma na n dɩka zɩɩmã n ning tẽn-kugr ninga zug b sẽn yõogd wisd sẽn tar yũ-noogã, sẽn be Sẽn-Ka-Saab taoorã, n be sɛk roogã pʋgã. La a tog n dɩka loalgã zɩɩmã sẽn kellã zãng n kiig tẽn-kugr ning b sẽn yõogd maand a zugã sɛɛgẽ, sẽn dabd sɛk roogã noorã sẽnẽ.

8Yẽnda tog n yãka loalgã kaamã b sẽn yãk n na n kõ kongrã sugr kosg yĩngã, yaa yãadã ne pʋ-teedã kaamã,

9n leb n paas ne yiim a yiibã ne kaam ning sẽn gãneg b zutã, la kaamã sẽn be gɛyã sʋkã, ne kaam ning yẽnda sẽn na n yãk sãoorã ne yiimã zutã.

10Yẽnda sã n yãk loalgã b sẽn maan zems-n-taar maoogã kaam, bɩ maan-kʋʋdã reeg n yõog bugum maoong tẽn-kugrã zugu.

11La sã n yaa ne loalgã gãongã, ne a nemdã fãa, ne a zugã la a karsã, la a pʋ-teedã ne a bĩndã,

12ne rũngã sẽn ketã fãa, a yita ne bõn-kãng sik zĩigẽ wã n kẽng zĩig ning sẽn welg toorã, b sẽn lobd tompeglmã n tɩ ning-a raad zut n yõog-a bugum. Bɩ b yõog-a zĩig ning b sẽn lobd kaamã tompeglmã zugu.

13Israyɛll nebã zãng sã n tudgi, n maan yell sẽn kɩɩsd Sẽn-Ka-Saab tõodã tõog a yembr ne yĩudg n ka bãnge, n beeg Sẽn-Ka-Saabo,

14tɩ bãmb kongrã wa n puki, bɩ nebã zãng bao loalg sẽn na n maan maoong b kongrã yĩng n tall n wa. La bɩ b tall-a n wa sɛk roogã noore.

15Bɩ Israyɛll nebã kãsem-dãmb kolg n dɩk b nus n palg loalgã zugã zug Sẽn-Ka-Saab taoore, la bɩ b kodg loalgã Sẽn-Ka-Saab taoore.

16La bɩ maan-kʋʋd ning b sẽn pʋdg kaam a zugã tall loalgã zɩɩm n kẽ sɛk roogã pʋga.

17Bɩ maan-kʋʋdã tẽk a nug-bil zɩɩmã pʋga, n mes-a naoor a yopoe Sẽn-Ka-Saab taoore, n tees fu-lillidgã.

18La a yãk zɩɩmã n ning tẽn-kugrã sẽn be Sẽn-Ka-Saab taoor sɛk roogã pʋgã yɩɩlã zutu. La bɩ a rɩk zɩɩmã sẽn kellã n kiig maoong sẽn yõogd bugum tẽn-kugrã sẽn be sɛk roogã noorã kɩrenga.

19La a tog n yãka loalgã kaamã zãng n yõog bugum tẽn-kugrã zugu.

20Bɩ yẽnda maan lol-kãng wa b sẽn maand kongr loalgã to-to wã. Yaa woto la maan-kʋʋdã na n maane, tɩ b paam yel-manegre, la b na n kõ-b-la b yel-wẽnã sugri.

21Yẽnda na n talla loalgã n yi n bas sik zĩigã n kẽng kɛɛng n tɩ yõog-a bugum wa yẽnda sẽn dag n yõog pipi loalgã to-to wã. Rẽndã na n yɩɩ nebã fãa kongr maoongo.

22Taoor soab sã n tudg n maan yel-wẽnd ne yĩdgu, n kɩɩs Sẽn-Ka-Saab sẽn yaa yẽnda Wẽnnaamã tõodã tõog a yembre, tɩ lebg kongr ne yẽnda,

23yẽnda sã n wa n bãng t'a beegame, bɩ a wa ne kũun sẽn yaa boɛɛg sẽn ka tar zang tɩ b maan maoongo.

24Bɩ taoor soabã rɩk a nug n palg boɛɛgã zugu, la a kodg-a Sẽn-Ka-Saab taoore, zĩig ning b sẽn kodgd maoong sẽn yõogd bugmã rũngã. Woto n yaa kongr maoongo.

25Bɩ maan-kʋʋdã tẽk rũng ning b sẽn kõ tɩ yɩ kongrã maoongã zɩɩm ne a nug-bila, n tẽgs maoong sẽn yõogd bugum tẽn-kugrã yɩɩla, la a rɩk zɩɩmã sẽn kellã n kiig tẽn-kugr ninga b sẽn yõogd maoong bugmã sɛɛga.

26Bɩ a rɩk kaamã n yõog bugum tẽn-kugrã zugu, wa b sẽn minim n maand zems-n-taar maoongã to-to wã. Yaa woto la maan-kʋʋdã tog n maan taoor soabã yĩnga, a kongrã yiisg yĩnga.

27La Israyɛll nebã ned a yembr sã n maan bũmb ne yĩdgu, tɩ kɩɩsd Sẽn-Ka-Saab tõodã tõog a yembre, a lebga bɛɛgda.

28La yẽnda sã n bãng t'a beegame, bɩ a tall bʋ-yãang n wa tɩ yɩ kũuni, a kongrã yĩnga. La tog n yɩɩ bʋʋg sẽn ka tar zanga.

29Bɩ a palg a nugã kongr bʋʋgã zugu, la a kodg-a zĩig ning b sẽn kodgd maoong sẽn yõogd bugmã rũngã.

30Bɩ maan-kʋʋdã tẽk rũng ning b sẽn maan maoongã zɩɩm ne a nug-bila, n tẽgs maoong sẽn yõogd bugum tẽn-kugrã yɩɩla, la a rɩk zɩɩmã sẽn kellã zãng n kiig maoong sẽn yõogd bugmã tẽn-kugr sɛɛga.

31La bɩ a yãk rũngã kaam, wa b sẽn yãkd zems-n-taar maoongã rũng kaam to-to wã, n yõog bugum tẽn-kugrã zugu. La bõn-kãng na n yɩɩ yũ-noog Sẽn-Ka-Saab yĩnga. Yaa woto la maan-kʋʋdã na maan nin-kãng kongrã yĩnga, la a na n paama a kongrã sugri.

32La sã n mikame tɩ bɛɛgdã waa ne peosg n na n maan maoong n kos a kongrã sugri, bɩ a wa ne pe-yãang sẽn ka tar zanga.

33Bɩ a rɩk a nug n palg rũngã b sẽn kõ yel-wẽnã maoong yĩngã zugu, la bɩ a kodg-a zĩig ning b sẽn maand maoong sẽn yõogd bugmã noore.

34Bɩ Maan-kʋʋdã tẽk rũngã zɩɩmã ne a nug-bila, n ning maoong sẽn yõogd bugmã tẽn-kugr yɩɩlã zutu, la a rɩk zɩɩmã sẽn kellã n daag tẽn-kugrã sɛɛga.

35Bɩ maan-kʋʋdã yãk kaamã zãng wa b sẽn yãkd zems-n-taar maoongã peosg kaamã to-to wã, n dɩk-a n dogl maoongã nemd zug tẽn-kugrã zugu, n yõog bugum Sẽn-Ka-Saab taoore. Yaa woto la maan-kʋʋdã na n maan n yiis ned ning sẽn kongã kongrã a sẽn dag n maana, la a na paama a kongrã sugri.»

← Chapter 3 Jump to: Chapter 5 →

Recommended Reading

Commentary Leviticus Commentaries → Devotional Leviticus Devotional Guide → Get This Bible Mossi MPBU (WẼNNAAM SEBRE ) Study Bible →