bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
2 Samuel 16
2 Samuel 16
Quechuan QXO (Biblia en Quechua del sur de Conchucos)
← Chapter 15
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 17 →
1
Tsaypita aywar Olivos jirkanta David päsaskiptinmi Mefi-bosetpa sirviqnin Siba tariparqan ishkay sillashqa ashnunkuna qatishqa. Tsay ashnukunaman chaqnashqam Davidpä aparqan ishkay pachak (200) tantakunata, päsasllan atipashqa pachak (100) tantakunata, pachak (100) frütakunata y vïnu puritsikuna qarawan vïnuta.
2
Rey Davidnam Sibata tapurqan: «¿Imapätä kaykunata apamurquyki?» Sibanam nirqan: «Taytay, qam y qamwan aywaykaq castaykikuna muntakuyänaykipämi ashnukunata apamurqü. Tantakunata frütakunatam soldäduykikuna mikuyänanpä apamurqü. Vïnutanam desiertuman aywar pishipaqkuna upuyänanpä apamurqü».
3
Davidnam tapurqan: «¿Maytä patronnikipa willkan Mefi-bosetqa?» Tsaynö niptinmi Siba nirqan: «Jerusalénchömi kaykan. Payqa yarpaykan awilun Saúlta rey kananpä Israel runakuna churayanqannö paytapis kanan junaq churayänanpä kanqantam. Tsayta yarparmi Jerusalénchö quëdamushqa».
4
Davidnam nirqan: «Tsaynö kanqanpitam Mefi-bosetpa llapan imaykankunapis qampana kanqa». Niptinnam Davidpa puntanman qonqurikuykur Siba nirqan: «Taytay rey, qampa podernikichömi kaykällä».
5
Tsaypitanam Bahurim markaman David chaykuptin Saúl casta runa Gerapa tsurin Simei aywarqan Davidta imaykata qayaparnin.
6
Allinnin kaq soldädunkunapa chawpinchö rey David aywaykaptinmi Simeiqa paykunata saqmar
7
nirqan: «¡Runa mayinta wanutsiq! ¡Imatatä ashinki, mana alli ruraq runa! Rikaytapis manam munayätsu. ¡Kaypita aywakuy!
8
¡Qammi rey kayman yaykunayki raykur Saúlta y castankunata wanutsirquyki! ¡Tsaypitam Tayta Dios castigashurniki tsuriki Absalóntana rey kananpä churashqa! ¡Tsaykuna päsashunaykipä kikikim jutsayuq kanki, sin vergüenza runa wanutsiq!»
9
Tsaynö niptinmi Sarviapa wamran Abisai rey Davidta nirqan: «Taytay, ¿imanirtä taqay mana väliq allqu tsayläya qayapäshunki? ¡Dëjaykamay kanan höra päsar umanta roquskamunäpä!»
10
Niptinmi Abisaita y Joabta rey David nirqan: «Sarviapa wamrankuna, ¿imanirtä problëmäman mëtikayämunki? Kikin Tayta Dios munaptinchi tsaynö qayapäman. Tsaynö kaykaptinqa ¿imapätä michäshunpis?»
11
Tsaypitanam Abisaita y llapan yanapaqninkunata David nirqan: «Kikïpa tsurïpis wanutsimayta yarpaykaptinqa rasunnachi kay Benjamín trïbu runaqa qayapäman. Tayta Dios munaptinqa jina tsaynöpis qayapämätsun.
12
Capazchi llakikunqäta rikar Tayta Dios kuyapämar runakuna qayapäyämanqanpita bendicionninta qaramanqa».
13
Tsaynö nirmi yanapaqninkunawan David aywakuyarqan. Simeinam wak tsimpanpa aywarqan ashlliraykar, saqmaraykar y allpatapis junishpa jicharaykar.
14
Jordán mayu kuchunman chaykurmi ajyanashqa kar yanapaqninkunawan David jamapäyarqan.
15
Absalónnam llapan Israel runakunawan y Ahitofelwanpis Jerusalénman yaykuyarqan.
16
Davidpa amïgun Husainam chaskinanpä ras aywar qayaykacharnin nirqan: «¡Viva rey Absalón! ¡Viva rey Absalón!»
17
Tsaynö niptinmi Absalón nirqan: «Kananqa ¿amïguyki Davidpa contrannaku kaykanki? ¿Tsaynöku alli amïgu kay? ¿Imanirtä paywan aywarquykitsu?»
18
Niptinnam Husai nirqan: «Tayta Dios y Israel runakuna akranqan reywanmi noqa quëdashä.
19
Pitapis sirvirqa amïgüpa tsurintam sirvishä. Papänikita sirvinqänömi qamtapis sirvishayki».
20
Tsaypitanam Ahitofelta Absalón tapurqan: «Kanan ¿imata ruranäpätä yätsimanki?»
21
Tsaymi Ahitofel nirqan: «Palaciuta cuidayänanpä papäniki churanqan concubïna warminkunawan punuy. Tsaynöpam llapan Israel runakuna tantiyayanqa papäniki pasaypa rabyakur imaypis manana chaskishunaykipä kanqanta. Tsayta musyaykurmi yanapashuqnikikunapis masrä favorniki kayanqa».
22
Tsaynö niptinmi llapan Israel runakuna rikayänanpä palaciu jananchö juk tolduta Absalónpä rurayarqan. Tsaychömi papänin Davidpa concubïna warminkunawan Absalón punurqan.
23
Tsay witsanmi llapan runakuna yarpäyarqan Ahitofel imatapis yätsinqan kikin Tayta Dios yätsiykaqnö kanqanta. Tsaymi Ahitofel yätsinqanta David ruranqannö Absalónpis Ahitofel yätsinqanta rurarqan.
← Chapter 15
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 17 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24