bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
2 Samuel 18
2 Samuel 18
Quechuan QXO (Biblia en Quechua del sur de Conchucos)
← Chapter 17
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 19 →
1
Tsaypitanam soldädunkunata qoriskir capitankunata David churarqan cada waranqa (1,000) soldädukunapä y cada pachak (100) soldädukunapä.
2
Tsaypitam llapan soldädukunata kimsa batallonman rakirqan. Joabtam juk batallonpa mandaqnin kananpä churarqan. Joabpa wawqin y Sarviapa wamran Abisaitam juk batallonpa mandaqnin kananpä churarqan. Itaitanam juk batallonpa mandaqnin kananpä churarqan. Tsaypitanam soldädunkunata David nirqan: «Guërrachö yanapanäpä noqapis aywashä».
3
Niptinmi paykuna niyarqan: «Taytay, qamqa ama aywaytsu. Manam noqakunatatsu wanutsiyämänanpä ashiykäyäman, sinöqa qamtam. Qeshpiyaptïpis o pullan kaqta wanutsiyämarninpis qamtam imanöpapis wanutsiyäshunaykipä ashiyäshunki. Chunka waranqa (10,000) soldädukunata wanutsirpis qamta mana wanutsiyäshurnikiqa manam contentutsu kayanqa. Aywanaykipa rantinqa kay markallachö quëdakuy vinciyämaptinqa mas soldädukunata mandamunaykipä».
4
Davidnam nirqan: «Tsayöraqa niyanqaykinö katsun». Tsaynö nirmi markaman yaykuna jatun punku ñöpanman ichiskirqan. Tsaychö ichiraykaptinmi waranqanpa waranqanpa (1,000) y pachakninpa pachakninpa (100) soldädukuna yarquyarqan.
5
Rey Davidnam Joabta, Abisaita y Itaita yarquykäyaptin nirqan: «Noqa raykur tsurï Absalónta kuyapäyanki». Tsaynö ninqantam llapan soldädunkuna wiyayarqan.
6
Tsaymi Davidpa soldädunkuna Israel soldädukunawan pelyayänanpä aywayarqan. Tsay guërra Efraín munti kaqchömi karqan.
7
Tsaychö pelyarmi Israel soldädukunata Davidpa soldädunkuna vinciyarqan. Tsay junaqmi ishkay chunka waranqa (20,000) runakunata wanutsiyarqan.
8
Tsay munti rurinchö pelyarmi kuchu kuchu qatikachänakuyarqan. Runakunata espädawan soldädukuna wanutsiyanqanpitapis mas atska runakunam muntichö ushakäyarqan.
9
Absalónqa mulan muntashqa aywaykanqanchömi illaqpita tinkurqan Davidpa soldädunkunawan. Tsaymi mulan muntashqa qeshpir encina jacha rurinpa päsaykaptin aqtsanpita rämakuna tsariskirqan. Mulan päsaskiptinmi Absalónqa warkuraykar quëdaskirqan.
10
Tsaynö warkuraykaqta rikarmi juk soldädu aywar Joabta willarqan: «Absalónmi encina muntichö warkuraykan».
11
Niptinmi Joab nirqan: «Rikaykarqa ¿imanirtä jinallanchö wanutsirquykitsu? Wanutsiptikiqa chunka siclo qellayta y juk cinturontam pägäman karqan».
12
Tsay runam nirqan: «Reypa tsurin kaykaptinqa waranqa (1,000) siclo qellayta pägamaptikipis manam wanutsïmantsu. Absalónta kuyapäyänaykipämi qamta, Abisaita y Itaitapis rey David niyäshurquyki. Tsaytaqa llapäkunam wiyayarqü.
13
Imatapis ruranqantsiktaqa rey David imanöpapis musyanqam. Absalónta wanutsiptïqa kikïtapis wanutsimanmanchi. Wanutsimaptinqa manam ni qampis tsapämayta puëdinkitsu».
14
Tsaymi Joab nirqan: «Tiemputapis perdirmi qamwan parlaykä». Tsaynö nirmi kimsa puñalkunata aptakurkur aywar Absalónta encina muntichö warkuraykaqta shonquchö tuksiskirqan.
15
Tsaypitanam Joabpa yanapaqnin chunka jövinkuna Absalónta jirurupaykur wanuskatsiyarqan.
16
Tsaypitanam cornëtata Joab tukatsiptin Israel soldädunkunata qatikachäyarqannatsu.
17
Tsaypitam Absalónpa ayanta juk uchkuman jitarpur tsay jananman atska rumikunata qotuyarqan. Davidpa contran Israel soldädukunanam qeshpir wayinkunaman kutikuyarqan.
18
Puntatanam Absalónqa Reypa Pampan ninqanchö juk monumentuta ruratsirqan: «Manam tsurïpis kantsu jutïta apananpä». Tsaymi tsay monumentupa jutinta churarqan Absalónta. Tsaymi kananyaqpis tsay monumentuta «Absalónpa monumentun» niyan.
19
Absalón wanushqana kaptinmi Sadocpa tsurin Ahimaas Joabta nirqan: «Chikishuqnikipa poderninpita Tayta Dios salvashurquykinam, papä» nir willanäpä rey Davidman jinallachö aywashä».
20
Peru Joabnam nirqan: «Tsurin wanunqan mana alli noticia kaykaptinqa manam qamtsu rey Davidta willaq aywankiman, sinöqa juk willatsun. Alli noticia kaptinmi sïqa willaq aywankiman».
21
Tsaypitam Etiopía runata Joab nirqan: «Llapan rikanqaykikunata willaq rey David kaqman ayway». Tsaynö niptinmi Joabpa puntanman qonqurikuskir cörrilla aywarqan willananpä.
22
Tsaypitanam Sadocpa tsurin Ahimaas Joabta yapay nirqan: «Imanö kaptinpis tsay Etiopía runapa qepanta aywashä». Tsaynö niptinmi Joab nirqan: «Hïju, ¿imanirtä aywayta munaykanki? Willanqaykipita manam imatapis pägashunkitsu».
23
Tsaynö niptinmi Ahimaas nirqan: «Imanö kaptinpis willanäpä aywashä». Tsaymi Joab nirqan: «Aywayta munarqa ayway». Tsaynö niptinmi Ahimaasqa pampaman aywaq chaki nänipa cörrilla aywar Etiopía runata llalliskirqan.
24
Markaman yaykuna ruri kaq punkuchömi David jamaykarqan. Marka cuidaq runanam punku janan altuman yarkurkur rikachakuykanqanchö rikaskirqan juk runa cörrilla shamuykaqta.
25
Tsaymi qayakur rey Davidta willaptin nirqan: «Kikillan shamurqa alli noticiatam apamunqa». Tsay runa yaykuykaptinnam
26
marka cuidaq runa yapay rikarqan juk runa cörrilla aywaykaqta. Tsaymi punku cuidaq runaman qayakurqan: «¡Mas juk runanam cörriykämun!» Niptinmi David nirqan: «Paypis alli noticiatam may apaykämun».
27
Tsaymi marka cuidaq runa nirqan: «Puntata cörrimuq kaqmi Sadocpa tsurin Ahimaasnö cörriykämun». Niptinmi David nirqan: «Ahimaas karqa alli willakuytam may apaykämun. Payqa alli runam».
28
Chaykurmi rey Davidta Ahimaas saludarnin puntanman qonqurikuykurqan urkunpis patsaman töpanqanyaq. Tsaypitanam nirqan: «Tayta Dios alabashqa kaykullätsun. Paymi llapan chikishuqnikikunata ushakätsishqa».
29
Tsaymi rey David tapurqan: «Tsurï Absalónqa ¿alliku kaykan?» Niptinnam Ahimaas nirqan: «Yanapashuqniki Joab mandamanqan höram runakuna büllata ruraykaqta wiyarqü. Peru manam musyätsu ima päsanqantapis».
30
Tsaymi rey David nirqan: «Washaläman witiy». Niptinmi washaläninman witiykur shuyararqan.
31
Tsaypitanam Etiopía runa chaykur nirqan: «Tayta David, alli noticiatam apamurqü. Kanan junaqmi llapan chikishuqnikikunapita Tayta Dios salvashurquyki».
32
Tsaymi rey David nirqan: «Tsurï Absalónqa ¿alliku kaykan?» Niptinmi Etiopía runa nirqan: «Taytay, qamta chikishuqnikikunaqa llapanpis ojalä tsay jövinnö ushakanman».
33
Tsayta wiyaykurmi rey Davidqa marka yaykuna punku jananchö kaq cuartuman ikikyaypa ikikyar waqaraykar yarkurnin nirqan: «¡Ay Absalónllay, Absalón! ¡Qam wanunaykipa rantin noqa wanuküman karqan, hïju! ¡Ay Absalónllay, Absalón!»
← Chapter 17
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 19 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24