2 Kings 10

Kirundi (Bibliya Yera 1951, 1967 (Burundi))

← Chapter 9 Jump to: Chapter 11 →

1I Samariya hār’ abahungu mirongwirindwi bandurutse kuri Ahabu. Bukeye Yehu yandika ivyete, abirungika i Samariya ku bakuru b’igisagara no ku bashingantahe no ku bājejwe abo buzukuru ba Ahabu;

2ati Bene shobuja ko mubafise ngaho, mukaba muri n’imikogote y’intambara n’amafarasi, n’igisagara kizitijwe inzitiro z’amabuye, n’ibirwanishwa; ico cete ni cabashikīra,

3mutoranye uwo muri bene shobuja ashimwa kand’ abereye kurusha abandi, mube ari we musubiza ku ngoma ya se, murwanire inzu ya shobuja.

4Ariko baranduka umutima, baravugana, bat’ Abo bami bompi ko batāshoboye guhagarara imbere yiwe, none ni twebge twobishobora?

5Nuk’ umubgiriza wo mu rugo, n’umukuru w’umurwa, n’ abashingantahe bo n’abājejwe ba bana, batuma kuri Yehu, uti N’ abasavyi bawe; ut’ Ivy’ ubagera vyose ni vyo bazokora; uti Kandi nta n’umwe bazokwimika; ut’ Ugire uk’ ugomba.

6Yongera kubandikira icete ubga kabiri, at’ Asangwa muherereye ku ruhande rwanje, mukemera kunyumvira, ni muce amazosi bene shobuja, imitwe yabo muze muyinsanze i Yezireli ejo nk’iki gihe. Kand’ abo bana b’umwami ukw ari mirongwirindwi, bari kumwe n’abashingantahe bo ku murwa, ari bo nyene bāri bārabajejwe.

7Nukw ico cete kibashikiriye, bafata abo bana b’umwami, babica ukw ari mirongwirindwi; imitwe yabo bayishira mu bisimbo, bayimurungikira i Yezireli.

8Intumwa iraza iramubarira, iti Barazanye imitwe ya ba bana b’umwami. Aravuga, ati Ni muyirunde ibirundo bibiri kw irembo, iharāre gushitsa ejo.

9Bukeye mu gitondo arasohoka, arahagarara, abarira abantu bose, ati Mweho nta co muriko: jeho ni ko nagararije databuja, ndamwica, arikw aba bose bāhumbikiranijwe na ba nde?

10Nuko mumenye kw ata jambo na rimwe Uhoraho yavuze ku nzu ya Ahabu rizokorokera hasi; ereg’ Uhoraho ashikije ivyo yavugishije umusavyi wiwe Eliya.

11Maze Yehu ageseza abari basigaye bose mu b’ inzu ya Ahabu i Yezireli, bo n’ abamenyekana biwe bose n’abakunzi biwe n’abaherezi biwe, ntiyasigaza n’uwa kirazira.

12Araheza arahaguruka avayo, aja i Samariya; ari ku nzira, ashitse i Betekedi‐harowimu,

13ahūra n’ab’ i wabo wa Ahaziya umwami w’i Buyuda; arababaza, ati Mur’ aba hehe? Baramwishura, bati Tur’ ab’ i wabo wa Ahaziya, kandi tumanutse kuramutsa abana b’umwami n’abana b’umugabekazi.

14Abarira abari kumwe na we, ati Ni mubafate. Barabafata, babatsinda ku rwobo rw’i Betekedi; bose na bose bar’ abantu mirongwine na babiri, ntiyasiga n’ uwa kirazira.

15Avuye aho, ahūra na Yehonadabu mwene Rekabu aje kumusanganira; aramuramutsa, aramubaza, ati Mbeg’ urafatanije nanje bivuye ku mutima, nk’uko nanje numva mfatanije nawe? Yehonadabu aramwishura, at’ Ego me turafatanije. Na we at’ Asangw’ ari ko biri, mpa ukuboko kwawe. Arakumuha, araheza aramwuriza, amushira mu mukogote wiwe.

16Aramubarira, ati Ngo tujane, urābe ishaka mfitiye Uhoraho. Nukw amujana mu mukogote wiwe.

17Ashitse i Samariya, ageseza abāri basigaye bose kuri Ahabu bar’ i Samariya, gushitsa abaherengeteje, nk’ukw ijambo ry’Uhoraho ryavuze, iryo yabariye Eliya.

18Bukeye Yehu akoranya abantu bose, arababarira, ati Ahabu yasavye Bayali buhoro, ariko jewe Yehu nzomusaba bishimitse.

19None rero ni mumpamagarire ba kamenyi ba Bayali n’abamusenga bose n’abaherezi biwe bose; ntihaze hasigare n’umwe; kuko ngomba guha Bayali ikimazi gihambaye; ūzobura kuza wese azokabona. Ariko Yehu cār’ icenge, kugira ngw abone kugeseza abasenga Bayali.

20Maze Yehu aravuga, ati Mushinge ikoraniro ry’agahebuza rya Bayali. Nuko bararitāngāza.

21Nuko Yehu atuma mu Bgisirayeli hose; abasenga Bayali bose baraza, ntihagira umuntu n’umwe asigara ataje. Baraza binjira mu ngoro ya Bayali; iyo ngoro ya Bayali iruzura, ukūye ku mukondo ukageza ku muryango.

22Maz’ abarira uwajejwe ububīko bg’imyambaro, ati Zanira abasenga Bayali bose imyambaro. Nukw arayibazanira.

23Maze Yehu yinjirana na Yehonadabu mwene Rekabu mu ngoro ya Bayali, abarira abasenga Bayali, ati Ni musuzume murābe, ntihagire n’umwe mu bantu b’ Uhoraho yoba ari ngaha, atar’ abasanzwe basenga Bayali bonyene.

24Nukw arinjira ngw atange ibimazi, yōse n’ivy’ ukwoswa. Ariko Yehu yari yaregetse hanze abantu mirongumunani, arababarira, at’ Aba bantu mbagomoreye, ni haramuka hagize ūcika, uwo acikanye arasubira mu gishingo ciwe apfe.

25Maz’ ahejeje kwosa ibimazi, abarira abashibamyi n’abagabisha, ati Ni mwinjire mubice, ntihagire ūbasohokana n’ umwe. Nuko babaririkisha inkota. Maz’ abo bashibamyi n’abo bagabisha babakwegera hanze, baja hirya i budashikwa mur’ iyo ngoro ya Bayali.

26Inkingi zari mur’ iyo ngoro ya Bayali bazijana hanze, baraziturira.

27Maze bamenagura inkingi ya Bayali, basangangura iyo ngoro yayo, bayihindura umusarane gushitsa na bugingo n’ubu.

28Uko ni ko Yehu yahenebereje ya mana Bayali, akayikūra mu Bisirayeli.

29Ariko rero Yehu ntiyaretse gukurikira ivyaha vya Yerobowamu mwene Nebati, ivyo yakoze akabikwegeramwo n’Abisirayeli, n’ivy’ ibishushanyo vy’amamasa vyacuzwe mw izahabu, vyar’ i Beteli n’i Dani.

30Hanyuma Uhoraho abarira Yehu, ati Ko wakoze neza, ugakora ivyo mbona kw ari vyiza, ugashitsa imigabo yanje yose nari mfise ku nzu ya Ahabu, abana bawe bazokomeza ku ngoma mu Bisirayeli gushitsa ku mwuzukururuza wawe.

31Ariko Yehu ntiyababara kugendera mu vyagezwe vy’Uhoraho Imana y’Abisirayeli n’umutima wiwe wose; ntiyava mu vyaha vya Yerobowamu, ivyo yakoze akabikwegeramwo n’Abisirayeli.

32Mur’ ico gihe Uhoraho atangura kugabanya igihugu c’Ubgisirayeli; Hazayeli abanesha ku mbibe zose z’Ubgisirayeli,

33uhereye kuri Yorodani ugasubiza i burasirazuba, igihugu cose c’i Gileyadi, n’ic’ Abagadi n’ic’ Abareyubeni n’ic’ Abamanase, uhereye kuri Aroweri ho ku mwonga wo kuri Arunoni ukajana i Gileyadi n’i Bashani.

34Ibindi vyose vyadonzwe kuri Yehu, n’ivyo yakoze vyose, n’ivy’ ububasha bgiwe bgose, none ntivyanditswe mu gitabo c’ivyo ku ngoma z’abami b’Abisirayeli?

35Nuko Yehu ahamvya ba sekuruza, bamuhamba i Samariya; maz’ umuhungu wiwe Yehowahazi asubira ku ngoma yiwe.

36Igihe Yehu yamaze ku ngoma y’Abisirayeli yar’ imyaka mirongwibiri n’umunani.

← Chapter 9 Jump to: Chapter 11 →