2 Kings 20

Kirundi (Bibliya Yera 1951, 1967 (Burundi))

← Chapter 19 Jump to: Chapter 21 →

1Mur’ iyo misi Hezekiya ararwara agera hafi yo gupfa. Bukeye ūvugishwa n’Imana Yesaya mwene Amosi aza kuri we, aramubgira, at’ Uku ni k’Uhoraho agize, ngo Tunganya ivyo mu rugo rwawe, kuk’ ugira utange, utagikira.

2Maze Hezekiya ahindukiriza amaso ku rusika, asenga Uhoraho,

3ati Tegēra, Uhoraho we, ni wibuke ingene nagendera mu vy’ukuri imbere yawe n’umutima utunganye, ngakora ivyo ubona kw ari vyiza. Hezekiya ararira cane.

4Ariko Yesaya atararēngāna ngw ave mu nyubakwa, ijambo ry’Uhoraho riza kuri we,

5riti Subira inyuma, ubarire Hezekiya segaba w’abantu banje, ut’ Uku ni k’Uhoraho, Imana ya sogokuruza Dawidi, agize: uti Ngo Yumvise ugusenga kwawe, abonye n’amosozi yawe; ut’ Eh’ azogukiza; uti Maze ku musi ugira gatatu uzodūga uje mu ngoro yiwe.

6Uti Kandi ku misi yawe yongeyekw imyaka cumi n’itanu. Uti Kand’ azokurokorana n’iki gisagara, agukūre mu maboko y’umwami w’i Ashuri; uti Kand’ azozigama iki gisagara kubgiwe, no kubg’ umusavyi wiwe Dawidi.

7Maze Yesaya aravuga, ati Muzane intore ibumbabumbge mu nsukoni. Bayizanye bayomeka ku kivyimba, arakira.

8Hezekiya abaza Yesaya, at’ Ikimenyamenya kizoba iki, cerekana k’Uhoraho azonkiza, kandi ko nzodūga nkaja mu ngoro y’ Uhoraho ku musi ugira gatatu?

9Yesaya aramwishura, at’ Iki ni co kimenyamenya Uhoraho aguhaye, cemeza yukw azoshitsa ico avuze: uragomba kw igitūtu kija imbere intambuko cumi, canke ko gisubira inyuma intambuko cumi nyene?

10Hezekiya aramwishura, at’ Ereg’ igitūtu kuja imbere intambuko cumi n’icoroshe; copfuma gisubira inyuma intambuko cumi nyene.

11Nuk’ uwo muvugishwa Yesaya atakambira Uhoraho; na we ahēra ah’ igitūtu cari kigeze ku ntambuko z’urugero rwashinzwe na Ahazi, asubiza ico gitūtu inyuma intambuko cumi.

12Ico gihe Merodaki‐Baladani mwene Baladani umwami w’i Babuloni arungikira Hezekiya ivyete n’ingemurano, kuko yari yumvise ko yarwaye.

13Maz’ abātumwe Hezekiya abākīra neza, abereka hose mu nzu ah’ abīka ibintu vyiwe vy’igiciro, amafeza n’amazahabu n’imibavu n’amavuta y’igiciro kinini, no mu nzu ah’ abīka ivyo kurwanisha, n’ikintu cose co mu vyo atunze cariho. Nta kintu na kimwe co mu ngoro yiwe canke co mu gihugu ciwe cose Hezekiya atāberetse.

14Bukeye haza uwavugishwa n’ Imana Yesaya ku mwami Hezekiya, aramubaza, at’ Abo bantu bavuze iki, kandi baje i wawe bavuye hehe? Hezekiya aramwishura, ati Baje bavuye mu gihugu ca kure i Babuloni.

15Arongera aramubaza, ati Babonye ibiki mu ngoro yawe? Hezekiya aramwishura, at’ Ibiri mu ngoro yanje vyose bābibonye: nta kintu na kimwe co mu vyo ntunze ntāberetse.

16Maze Yesaya abarira Hezekiya, ati Ni wumve ijambo ry’Uhoraho.

17Eh’ imisi izoza, ibiri mu ngoro yawe vyose, n’ivyo ba sogokuruza bābītse bigashitsa n’ubu, bizosahurwa bijanwe i Babuloni; nta kintu na kimwe kizosigara, ni k’Uhoraho agize.

18Kand’ abahungu bawe uzoba wikūriye mu nda wavyaye bazobajana, bagirwe inkone zo kuba mu ngoro y’umwami w’i Babuloni.

19Maze Hezekiya yishura Yesaya, at’ Ijambo ry’Uhoraho uvuze ni ryiza. Yongera kuvuga, ati None si ko biri? Kazima hagiye kuba amahoro n’umutekano nkiriho.

20Nukw ibindi vyose vyadonzwe kuri Hezekiya, n’ivy’ ubuhizi bgiwe bgose, n’ingene yimvye ikidengeri, agaca umugende wo kuzana amazi mu gisagara, mbega ntivyanditswe mu gitabo c’ivyo ku ngoma z’abami b’i Buyuda?

21Maze Hezekiya ahamvya ba sekuruza, umuhungu wiwe Manase asubira ku ngoma yiwe.

← Chapter 19 Jump to: Chapter 21 →