2 Kings 19

Kirundi (Bibliya Yera 1951, 1967 (Burundi))

← Chapter 18 Jump to: Chapter 20 →

1Maz’ umwami Hezekiya avyumvise, yitantamurirakw impuzu ziwe, yambara amagunira, yinjira mu ngoro y’Uhoraho.

2Maz’ atuma Eliyakimu umuzezwarugo, na Shebuna umukarani, n’abakuru bo mu baherezi, bambaye amagunira, k’ūvugishwa n’Imana Yesaya mwene Amosi.

3Baramubgira, bati Hezekiya aradutumye, ng’ Uyu musi n’ umusi w’umubabaro n’ibihano n’ ugushinyagurirwa, ngo Kukw abana bagomba kuvuka, kandi nta nkomezi zo kubavyara.

4Ngo Kumbure Uhoraho Imana yawe yokwumva amagambo yose ya Rabushake, ayo shebuja umwami w’i Ashuri yamutumye gutuka Imana nzima, Uhoraho Imana yawe akamuhana kubg’ ayo magambo yumvise. Ngo Nuko rero, shirak’ usenge, usabire amasigarira agisigaye.

5Nukw abantu b’ umwami Hezekiya bashika kuri Yesaya.

6Yesaya arababgira, at’ Uku abe ari ko mubgira shobuja, mut’ Uku ni k’Uhoraho agize, ngo Ntutinye ayo magambo wumvise, abo baja b’umwami w’i Ashuri bamurogoseko.

7Ngo Rāba azomushiramw’ uwundi mutima, kand’ azokwumva impuha zitume asubira mu gihugu ciwe; kandi ngw Azomwicishiriza inkota mur’ ico gihugu ciwe nyene.

8Nuko Rabushake asubira inyuma, asanga umwami w’i Ashuri ateye i Libuna; ajayo kuko yari yumvise ko yavuye i Lakishi.

9Bukeye umwami w’i Ashuri yumvise bavuga Tiruhaka umwami w’i Etiyopiya, bat’ Araje kugutera; yongera gutuma intumwa kuri Hezekiya,

10mut’ Uku abe ari ko muzobgira Hezekiya umwami w’i Buyuda, mut’ Iyo Mana wishimiye ntiz’ iguhende, ngw I Yerusalemu ntihazotangwa mu maboko y’umwami w’i Ashuri.

11Muti Mbega ntiwumvise ukw abami b’i Ashuri bāgiriye ibihugu vyose, bakabirandura rwose? muti None wewe uzokira?

12Muti Mbeg’ imana z’amahanga, ayo ba sekuru bāranduye, zararokoye ab’i Gozani n’i Harani n’i Resefu n’ Abanyedeni baba i Telasari?

13Mut’ Umwami w’i Hamati ari hehe’ cank’ umwami w’i Arupadi, n’umwami w’umurwa w’i Sefaravayimu, n’uw’ i Hena n’uw’ i Iva?

14Bukeye Hezekiya ashikirizwa ico cete n’izo ntumwa, aragisoma; maz’ aradūga, aja mu ngoro y’ Uhoraho, arakigaranzura, agishira imbere y’Uhoraho.

15Nuko Hezekiya asengera imbere y’Uhoraho, at’ Ewe Uhoraho, Mana y’ Abisirayeli, uvyagiye ku bakerubi, ni wewe Mana wenyene y’ibihugu vy’abami bose bo mw isi, ni wewe waremye ijuru n’isi.

16Tega ugutwi Uhoraho, wumve; tereza inyonga zawe Uhoraho, witegereze; wumve amagambo ya Senakeribu yatumye ino kugutuka wewe Mana nzima.

17Uhoraho, n’ivy’ ukuri abami b’i Ashuri bārahoneje ayo mahanga n’ibihugu vyayo,

18bātereye imana zabo mu muriro; ariko ntizar’ imana nya mana, zar’ izakozwe n’intoke z’ abantu mu biti no mu mabuye; ni co catumye bazihonnya.

19Nuko none, Uhoraho Mana yacu, ndakwinginze udukize, udukūre mu maboko yiwe, kugira ngw ibihugu vy’abami bose bo mw isi bamenye kw ari wewe Mana wenyene, ewe Uhoraho.

20Maze Yesaya mwene Amosi atuma kuri Hezekiya, ut’ Uku ni k’Uhoraho Imana y’Abisirayeli agize, ngw Ivyo wamutakambiye ku vya Senakeribu umwami w’i Ashuri, yavyumvise.

21Ut’ Iri ni ryo jambo Uhoraho yamuvuzeko, at’ Umukobga w’inkumi w’i Siyoni aragukēngereye, agutwengeye mw ijigo; umukobga w’i Yerusalemu akuzungurije umutwe.

22Uwo watonganije ukamurogotako ni nde? Ni nde wirahiye akararamango ukamurābana agakēngērwe? Erega ni jewe Uwera wa Isirayeli.

23Watumye intumwa zawe kuntuka, jewe Umwami Imana, uravuga, ng’ Udūganye igitero cinshi c’imikogote yawe y’intambara, ushitse mu mpinga z’imisozi, no mu dushōka tw’i Lebanoni; ngo Wiciye ibiti vy’amasederi vyaho birebire, n’ivy’ akajwari vyaho vyiza‐vyiza; ngo Wahanyuragiye ushika mu bgigobeko bgaho hirya cane, no mu biti vyo mw itongo ryaho rimera cane.

24Ngo Wimvye amazi mu mahanga, urayanywa; wakamishije inzūzi zo muri Egiputa ubgōro bg’ibirenge vyawe.

25Mbega ntiwumvise uko nabigenjeje kera, mbigabiye mu bihe vyashize? None narabishikije, kugira ng’ uhonnye ibisagara vyubakiwe inzitiro, ubihindure ibirundo vy’amasakamburira.

26Ni co catumye abābibamwo baba imburamaboko, bagacika ivutu, bakamāramāra; bagacika nk’ubgatsi bgo ku gahinga, nk’ubgatsi bg’urumerera, nk’ivyatsi vyimejeje ku nzu, nk’ingano zirumvye zikir’ ibironge.

27Ariko ndazi imyicarire yawe, n’amaja n’amaza yawe, n’ingene wanshangashiriwe.

28None rero kubg’ ubushangashirwe wangiriye, n’uko numvise ivy’ agashamango kawe, nzogutūngīra umurinda wanje mu mazuru, n’umujiginya wanje mu kanwa, ngusubize mu nzira wazananye.

29Ut’ Ariko weho Hezekiya, iki ni co kizokubera ikimenyamenya: uyu mwaka muzorya ivyimejeje ubgavyo, mu mwaka ugira kabiri muzorya utunagano twavyo, mu mwaka ugira gatatu muze mubibe, mwimbure, mutere inzabibu, muziryeko.

30Kand’ amasigarira arokotse yo mu nzu ya Yuda bazokwongera gushōra imizi hasi, ahahera hejuru bahūrike ivyamye.

31Kuko muri Yerusalemu hazosokoroka amasigarira, no ku musozi Siyoni have abārokotse: ishaka ry’Uhoraho rizoshitsa ivyo.

32Uti Ni co gitumye Uhoraho avuga ivy’ umwami w’i Ashuri, ati Ntazoruha agera mur’ iki gisagara, canke ngw aharase n’umwampi, canke ngw ahatumbereze n’inkinzo, canke ngw aharunde ikirundo co kwūririrako.

33Ut’ Inzira yazananye ni yo nyene izomusubizayo; ntazoruha agera mur’ iki gisagara, ni k’Uhoraho agize.

34Ngw Azozigama uyu murwa kugira ngw awukize, abikoze kubgiwe no kubg’ umusavyi wiwe Dawidi.

35Maze mur’ iryo joro nyene umumarayika w’Uhoraho arasohoka, atera mu nsago z’Abashuri, yicamw’ ingabo ibihumbi ijana na mirongumunani na bitanu: abantu bavyutse mu gatondo basanga ingabo zose ar’ imihindigiti y’ imivyimba.

36Nuko Senakeribu umwami w’i Ashuri aca arataha, asubira inyuma, aja kuba i Ninewe.

37Umusi ur’ izina, arikw arasenga ari mu ngoro y’ikigirwamana ciwe citwa Nisiroki, Adurameleki na Sharezeri bamwicisha inkota; baca bahungira mu gihugu c’i Ararati. Maz’ umuhungu wiwe Esarihadoni asubira ku ngoma yiwe.

← Chapter 18 Jump to: Chapter 20 →