2 Kings 24

Kirundi (Bibliya Yera 1951, 1967 (Burundi))

← Chapter 23 Jump to: Chapter 25 →

1Ku ngoma ya Yehoyakimu, Nebukadineza umwami w’i Babuloni arabatera; Yehoyakimu aramwisaba, amara imyaka itatu aganzwa na we; araheza aramuhinduka, aramugarariza.

2Maz’ Uhoraho amutēza ibitero vy’Abakaludaya n’ivy’ Abasiriya n’ivy’ Abanyamowabu n’ivy’ Abamoni, abagomorera i Buyuda ngo baharandure, nk’ukw ijambo ryiwe riri, iryo yavugiye mu basavyi biwe yavugisha.

3Ayo yose Abayuda bāyabonye kubg’ icagezwe c’Uhoraho gusa, kugira ngw abakūre imbere yiwe, abahōye ivyaha Manase yakoze vyose,

4n’amaraso y’aberanda yavishije; kuko yujuje i Yerusalemu amaraso y’aberanda; nukw ivyo Uhoraho ntiyemera kubiharira.

5Ibindi vyose vyadonzwe kuri Yehoyakimu, n’ivyo yakoze vyose, mbega ntivyanditswe mu gitabo c’ivyo ku ngoma z’abami b’i Buyuda?

6Nuko Yehoyakimu ahamvya ba sekuruza; maz’ umuhungu wiwe Yehoyakina asubira ku ngoma yiwe.

7Arik’ umwami wa Egiputa ntiyongeye kuva mu gihugu ciwe, kuk’ umwami w’i Babuloni yari yāmunyujije ivyar’ ivyiwe vyose, uhereye ku mugezi wa Egiputa ugashitsa ku ruzi Efurate.

8Yehoyakina yagiye ku ngoma amaze imyaka cumi n’umunani; ayimarakw amezi atatu i Yerusalemu; nyina yitwa Nehushita, umukobga wa Elunatani w’i Yerusalemu.

9Akora ivyo Uhoraho abona kw ari bibi, nk’ivyo se yakoze vyose.

10Ico gihe ingabo za Nebukadineza umwami w’i Babuloni ziradūga, zitera i Yerusalemu, bugariza ico gisagara.

11Bukeye Nebukadineza umwami w’i Babuloni arīyizira ubgiwe, ashika kur’ ico gisagara ingabo ziwe zikicugarije.

12Maze Yehoyakina umwami w’i Buyuda ava mu gisagara, bo na nyina n’ abantu biwe n’abo mu nda y’ ingoma n’abamenyekana biwe, aja kwisaba uwo mwami w’i Babuloni, na we aramufata; ico gihe umwami w’i Babuloni yar’ amaze imyaka munani ari ku ngoma.

13Asahura ibitunzwe vyose mu ngoro y’Uhoraho, bo n’ivyo mu ngoro y’umwami, amenagura n’ ibintu vyose vy’imbombovu vy’ izahabu vyari mu rusengero rw’ Uhoraho, ivyo Salomo umwami w’Abisirayeli yari yaracurishije, nk’uk’ Uhoraho yavuze.

14Ajana ab’i Yerusalemu bose ar’ inyagano, hamwe n’abo mu nda y’ ingoma bose, n’abahizi bose; abāfashwe bose na bose bār’ ibihumbi cumi, hamwe n’ababāji n’abacuzi bose; nta wasigaye mur’ ico gihugu atari ba nyarucari bo hanyuma y’abandi.

15Nukw ajana Yehoyakina i Babuloni, ajana n’ umugabekazi, n’abamikazi biwe, n’abamenyekana biwe, n’abaganwa bo mur’ ico gihugu, abakūra i Yerusalemu abajana i Babuloni ar’ inyagano.

16Kand’ abantu bose b’abahizi, bashika ibihumbi ndwi, bo n’ababāji n’abacuzi igihumbi, bose b’abanyenkomezi bazi kurwana, bose umwami w’i Babuloni abajana i we i Babuloni ar’ inyagano.

17Maz’ umwami w’i Babuloni yimika Mataniya se wabo wa Yehoyakina mu gishingo ciwe, ahindura izina ryiwe amwita Zedekiya.

18Zedekiya yagiye ku ngoma amaze imyaka mirongwibiri n’ umwe; ayimarakw imyaka cumi n’umwe i Yerusalemu; nyina yitwa Hamutali umukobga wa Yeremiya w’i Libuna.

19Akora ivyo Uhoraho abona kw ari bibi, nk’ivyo Yehoyakimu yakoze vyose.

20Kukw ivyabaye i Yerusalemu n’i Buyuda vyavuye ku burake bg’ Uhoraho, gushitsa ah’ amaramarije kubirukana imbere yiwe. Hanyuma Zedekiya agarariza umwami w’i Babuloni.

← Chapter 23 Jump to: Chapter 25 →