2 Kings 15

Kirundi (Bibliya Yera 1951, 1967 (Burundi))

← Chapter 14 Jump to: Chapter 16 →

1Mu mwaka ugira mirongwibiri n’indwi Yerobowamu umwami w’Abisirayeli ari ku ngoma, Uziya mwene Amaziya umwami w’i Buyuda ni ho yima.

2Yagiye ku ngoma amaze imyaka cumi n’itandatu, ayimarakw imyaka mirongwitanu n’ibiri i Yerusalemu; nyina yitwa Yekoliya w’i Yerusalemu nyene.

3Akora ivyo Uhoraho abona kw ari vyiza, nk’ivyo se Amaziya yakoze vyose.

4Mugabo ibitabo vyo ku mpinga z’imisozi ntivyakūrwaho; abantu bari bagitangira ibimazi mur’ ivyo bitabo, bakahosereza imibavu.

5Hanyuma Uhoraho atēza umwami imibembe, arinda atanga akir’ umunyamibembe, aba mu nzu ya wenyene; maze Yotamu umwana wiwe ni we yagaba ivyo mu rugo, agacira abantu bo mu gihugu imanza.

6Nukw ibindi vyose vyadonzwe kuri Uziya, n’ivyo yakoze vyose, none ntivyanditswe mu gitabo c’ivyo ku ngoma z’abami b’Abayuda?

7Nuko Uziya ahamvya ba sekuruza, bamuhamba hamwe na bo ku murwa wa Dawidi; maz’ uwo muhungu wiwe Yotamu asubira ku ngoma yiwe.

8Mu mwaka ugira mirongwitatu n’umunani Uziya umwami w’i Buyuda ari ku ngoma, ni ho Zekariya mwene Yerobowamu yima i Samariya mu Bisirayeli; amara amezi atandatu ari ku ngoma.

9Akora ivyo Uhoraho abona kw ari bibi, nk’uko ba sekuruza bākora, ntiyava mu vyaha vya Yerobowamu mwene Nebati, ivyo yakwegeyemw’ Abisirayeli ngo bacumure.

10Maze Shalumu mwene Yabeshi aramugarariza, amugurukirakw imbere y’abantu, aramwica, asubira ku ngoma yiwe.

11Nukw ibindi vyose vyadonzwe kuri Zekariya vyanditswe mu gitabo c’ivyo ku ngoma z’abami b’Abisirayeli.

12Vyabaye nk’ukw ijambo Uhoraho yari yarabariye Yehu ryāvuze, rit’ Abana bawe bazokomeza ku ngoma mu Bisirayeli gushitsa ku mwuzukururuza wawe. Nuko birashika.

13Mu mwaka ugira mirongwitatu n’icenda Uziya umwami w’i Buyuda ari ku ngoma, ni ho Shalumu mwene Yabeshi yima; amara ukwezi kumwe i Samariya ari ku ngoma.

14Maze Menahemu mwene Gadi ava i Tirusa, aradūga aja i Samariya, amutsindaho aramwica, asubira ku ngoma yiwe.

15Ibindi vyose vyadonzwe kuri Shalumu, n’ingene yagararije, vyanditswe mu gitabo c’ivyo ku ngoma z’abami b’Abisirayeli.

16Menahemu araheza atera i Tifusa, arahatsinda, ageseza n’ abari mur’ ico gisagara bose, anesha n’intara yaco uhereye i Tirusa nyene; icatumye ahageseza n’uko banse kumwugururira amarembo; nukw afomoza abagore bose bafise inda bari muri co.

17Mu mwaka ugira mirongwitatu n’icenda Uziya umwami w’ Abayuda ari ku ngoma, ni ho Menahemu mwene Gadi yima mu Bisirayeli; amara imyaka cumi i Samariya ari ku ngoma.

18Akora ivyo Uhoraho abona kw ari bibi, ntiyigeze ava mu vyaha vya Yerobowamu mwene Nebati, ivyo yakwegeyemw’ Abisirayeli ngo bacumure.

19Bukeye Puli umwami w’i Ashuri atera igihugu; maze Menahemu amuhongera italanto z’ifeza igihumbi, kugira ngo buzure, amuhagarikire, ahangame ku ngoma yiwe.

20Kand’ ayo mahera Menahemu yari yayatoje mu Bisirayeli, mu bantu b’abatunzi, umuntu wese yari yamutoje shekeli mirongwitanu, ngw ayahe umwami w’i Ashuri. Nuk’ uwo mwami w’i Ashuri arahindukira, ntiyaguma mur’ ico gihugu.

21Non’ ibindi vyose vyadonzwe kuri Menahemu, n’ivyo yakoze vyose, mbega ntivyanditswe mu gitabo c’ivyo ku ngoma z’abami b’Abisirayeli?

22Nuko Menahemu ahamvya ba sekuruza, maz’ umuhungu wiwe Pekahiya asubira ku ngoma yiwe.

23Mu mwaka ugira mirongwitanu Uziya umwami w’Abayuda ari ku ngoma, ni ho Pekahiya mwene Menahemu yima i Samariya mu Bisirayeli; amara imyaka ibiri ari ku ngoma.

24Akora ivyo Uhoraho abona kw ari bibi, ntiyava mu vyaha vya Yerobowamu mwene Nebati, ivyo yakwegeyemw’ Abisirayeli ngo bacumure.

25Bukeye Peka mwene Remaliya, umugabisha wiwe, afatanya n’ Abanyegileyadi mirongwitanu, aramugarariza, amwicana na Arugobi na Ariyeha, abatsinda i Samariya mu munara wo mu rugo i bgami; nukw amaze kumwica asubira ku ngoma yiwe.

26Nukw ibindi vyose vyadonzwe kuri Pekahiya, n’ivyo yakoze vyose, vyanditswe mu gitabo c’ivyo ku ngoma z’abami b’Abisirayeli.

27Mu mwaka ugira mirongwitanu na kabiri Uziya umwami w’i Buyuda ari ku ngoma, ni ho Peka mwene Remaliya yima i Samariya mu Bisirayeli; amara imyaka mirongwibiri ari ku ngoma.

28Akora ivyo Uhoraho abona kw ari bibi, ntiyava mu vyaha vya Yerobowamu mwene Nebati, ivyo yakwegeyemw’ Abisirayeli ngo bacumure.

29Kandi ku ngoma ya Peka umwami w’Abisirayeli, Tigulati‐pileseri umwami w’i Ashuri araza, atera ahitwa Iyoni n’i Abeli‐beti‐mayaka, n’i Yanowa n’i Kedeshi, n’i Hasori n’i Gileyadi, n’i Galilaya n’igihugu cose c’i Nafutali; abantu baho abajana i Ashuri ar’ inyagano.

30Hanyuma Hosheya mwene Ela agarariza Peka mwene Remaliya, amutsindaho aramwica, asubira ku ngoma yiwe; hāri mu mwaka ugira mirongwibiri Yotamu mwene Uziya ari ku ngoma.

31Ibindi vyose vyadonzwe kuri Peka, n’ivyo yakoze vyose, vyanditswe mu gitabo c’ivyo ku ngoma z’abami b’Abisirayeli.

32Mu mwaka ugira kabiri Peka mwene Remaliya umwami w’Abisirayeli ari ku ngoma, ni ho Yotamu mwene Uziya, umwami w’i Buyuda, yima.

33Yar’ amaze imyaka mirongwibiri n’itanu igihe yima; amara imyaka cumi n’itandatu i Yerusalemu ari ku ngoma. Nyina yitwa Yerusha, umukobga wa Sadoki.

34Akora ivyo Uhoraho abona kw ari vyiza, nk’ ivyo se Uziya yakoze vyose.

35Mugabo ibitabo vyo ku mpinga z’imisozi ntivyakūrwaho; abantu bāri bagitangira ibimazi mur’ ivyo bitabo, bakahosereza imibavu. Yotamu ni we yubatse ikirimba co haruguru ku ngoro y’ Uhoraho.

36Nukw ibindi vyose vyadonzwe kuri Yotamu, n’ivyo yakoze vyose, none ntivyanditswe mu gitabo c’ivyo ku ngoma z’abami b’i Buyuda?

37Mur’ ico gihe ni ho Uhoraho yatangura kugomora Rezini umwami w’i Siriya na Peka mwene Remaliya kurwanya Abayuda.

38Maze Yotamu ahamvya ba sekuruza, ahambga hamwe na bo ku murwa wa sekuruza Dawidi; maz’ umuhungu wiwe Ahazi asubira ku ngoma yiwe.

← Chapter 14 Jump to: Chapter 16 →