2 Kings 21

Kirundi (Bibliya Yera 1951, 1967 (Burundi))

← Chapter 20 Jump to: Chapter 22 →

1Manase yagiye ku ngoma amaze imyaka cumi n’ibiri; ayimarakw imyaka mirongwitanu n’itanu ar’ i Yerusalemu; nyina yitwa Hefusiba.

2Akora ivyo Uhoraho abona kw ari bibi, aja mu bizira vy’ubuyobe vy’abanyamahanga, abo Uhoraho yari yarirukanye imbere y’Abisirayeli.

3Yongera gutabisha ibitabo ku mpinga z’imisozi, ivyo se Hezekiya yari yarasibanganije, yubakira Bayali ibicaniro, abāza igishushanyo ca Ashera, nk’uko Ahabu umwami w’Abisirayeli yagize; asenga ingabo zose zo kw ijuru, ari zo nyenyeri, arazisaba.

4Yubaka n’ibicaniro mu ngoro y’Uhoraho, ari ho Uhoraho yari yaravuze, at’ I Yerusalemu ni ho nzoshira izina ryanje.

5Kandi yubakira izo ngabo zose zo kw ijuru ibicaniro mu ntangaro no mu nyubakwa vyo ku ngoro y’Uhoraho.

6Atanga umuhungu wiwe kw ikimazi ngo yoserezwe mu muriro, agapfumuza, agatera amabara, akaja kuraguza abahamagara imizimu, n’ abamenyi; yakora ibibi vyinshi imbere y’Uhoraho, bimutera umwikomo.

7Ca gishushanyo ca Ashera yabāje agishinga mu ngoro y’Uhoraho, iyo Uhoraho yari yarabariye Dawidi na Salomo umuhungu wiwe, ati Mur’ iyi ngoro, bo n’i Yerusalemu, ni ho natoranije mu miryango yose y’Abisirayeli ko nzohashira izina ryanje ngo rihabe ibihe vyose.

8Kand’ ati Sinzosubira guturatuza Abisirayeli ngo bave mu gihugu nahaye ba sekuruza, ni bitondera ivyo nabageze vyose, n’ivyagezwe vyose umusavyi wanje Mose yabageze.

9Yamara ntibaruha bavyumva; ariko Manase abakwegera mu bibi kuruta ivyo amahanga yakora, ayo Uhoraho yaranduye imbere y’Abisirayeli.

10Bukeye Uhoraho avugira mu basavyi biwe yavugisha,

11ati Manase umwami w’i Buyuda ko yakoze ivyo bizira vyose vy’ubuyobe, agakora ibibi kuruta ivyo Abamori bāmubanjirije bākoze vyose, agacumurisha Abayuda ibishushanyo vyiwe;

12ni co gitumye jewe Uhoraho Imana y’Abisirayeli mvuze, nti Ngira ntēze i Yerusalemu n’i Buyuda ivyago bikomeye, bitume ūzovyumva wese iminzerere imuvuga mu matwi.

13Kand’ umugozi nageresheje i Samariya ni wo nzogeresha i Yerusalemu, mpagereshe na karisho nageresheje inzu ya Ahabu; kandi nzohanagura Yerusalemu, nk’uk’ umuntu ahanagura isahani, agaheza akayubika.

14Kandi nzoshiburira hirya amasigarira yo mw ishamvu yanje, mbagabure mu maboko y’abansi babo, bahinduke inyagano n’isahu ku bansi babo bose;

15kuko bākoze ibibi imbere yanje, bakantera umwikomo bakandatsa, uhereye ku musi ba sekuruza bāviriye muri Egiputa gushitsa na bugingo n’ubu.

16Kandi Manase yavishije amaraso menshi y’aberanda, araruha yuzuza Yerusalemu amaraso uhereye ku ruhande rumwe ugashitsa ku rundi; ivyo abigereka ku caha ciwe yakwegeyemw’ Abayuda, ngo bakore ivyo Uhoraho abona kw ari bibi.

17Nukw ibindi vyose vyadonzwe kuri Manase, n’ivyo yakoze vyose, n’ivyaha yakoze, mbega ntivyanditswe mu gitabo c’ivyo ku ngoma z’abami b’Abayuda?

18Nuko Manase ahamvya ba sekuruza, ahambga mu murima wo ku rugo rwiwe, war’ umurima wa Uza; maz’ umuhungu wiwe Amoni asubira ku ngoma yiwe.

19Amoni yagiye ku ngoma amaze imyaka mirongwibiri n’ibiri; ayimarakw imyaka ibiri ar’ i Yerusalemu; nyina yitwa Meshulemeti umukobga wa Harusi w’i Yotuba.

20Akora ivyo Uhoraho abona kw ari bibi, nk’uko se Manase yakora.

21Yagendana ingeso zose za se, agasaba ibishushanyo se yasaba, akabisenga.

22Ava k’Uhoraho Imana ya ba sekuruza, ntiyagendera mu nzira ziwe.

23Bukeye abanyarugo b’ umwami Amoni baramugarariza, bamutsinda mu ngoro yiwe.

24Maz’ abantu bo mu gihugu bica abo bantu bose bāgararije umwami Amoni, baraheza bimika Yosiya umuhungu wiwe, bamusubiza ku ngoma yiwe.

25Ibindi vyose vyadonzwe kuri Amoni, mbega ntivyanditswe mu gitabo c’ivyo ku ngoma z’abami b’i Buyuda?

26Nukw ahambga mu mva yiwe yari yarimbishije muri wa murima war’ uwa Uza; maz’ umuhungu wiwe Yosiya asubira ku ngoma yiwe.

← Chapter 20 Jump to: Chapter 22 →