2 Kings 22

Kirundi (Bibliya Yera 1951, 1967 (Burundi))

← Chapter 21 Jump to: Chapter 23 →

1Yosiya yagiye ku ngoma amaze imyaka munani; ayimarakw imyaka mirongwitatu n’ umwe ar’ i Yerusalemu; nyina yitwa Yedida, umukobga wa Adaya w’i Bosikati.

2Akora ivyo Uhoraho abona kw ari vyiza, agendera mu ngeso nziza zose za sekuruza Dawidi, ntiyatambamira i buryo cank’ i bumoso.

3Mu mwaka ugira icumi n’ umunani umwami Yosiya ari ku ngoma, atuma umukarani Shafani mwene Asaliya, Asaliya wa Meshulamu, ngw aje mu ngoro y’Uhoraho,

4ati Dūga uje iyo Hilukiya ari, umuherezi mukuru, umubgire aharūre amahera azanwa mu ngoro y’Uhoraho, ayo abarinzi b’umuryango bamaze kwākīra mu bantu;

5bayahe abashinzwe gukoresha ibikorwa vyo ku ngoro y’Uhoraho, na bo bayahembe abakozi bakora iyo ngoro, kugira ngo basanure aho yahubaguritse,

6bayahe ababāji n’ abubatsi n’abubakisha amabuye; ayandi bayagure imbaho n’amabuye abāje vyo gusanura iyo ngoro.

7Mugabo, ayo mahera bahawe, ntimuzorinda kuyabasuzumira, kukw ar’ abizigirwa.

8Bukeye Hilukiya umuherezi mukuru abarira Shafani umukarani, ati Ntoye igitabo c’ivyagezwe mu ngoro y’Uhoraho. Hilukiya araheza agiha Shafani, aragisoma.

9Maz’ uwo mukarani Shafani asubira ku mwami, amudondera uko vyagenze, at’ Abasavyi bawe bābiriye amahera yari mu ngoro y’Uhoraho, bayashikirije abakoresha ibikorwa vyo kur’ iyo ngoro.

10Uwo mukarani Shafani yongera kubarira umwami, ati Kand’ umuherezi Hilukiya andungikanye igitabo. Nuko Shafani agisomera umwami.

11Maz’ umwami yumvise amajambo yo mur’ ico gitabo c’ivyagezwe, yitantamurirakw impuzu ziwe.

12Maz’ umwami atuma Hilukiya umuherezi na Ahikamu mwene Shafani na Akibori mwene Mikaya n’uwo mukarani Shafani nyene na Asaya umumenyekana wiwe,

13ati Ni mugende munsigurize Uhoraho, twe n’aba bantu n’abandi Bayuda bose, ivy’ amajambo yo mur’ iki gitabo batoye; kuk’ uburake bg’Uhoraho butuziriringiye ari bginshi, kubga ba sogokuruza batumviye amajambo yo mur’ iki gitabo, ngo bakore ivyanditswe muri co vyose twabariwe.

14Nuko Hilukiya umuherezi na Ahikamu na Akibori na Shafani na Asaya baragenda, baja k’ūvugishwa n’Imana Hulida muka Shalumu, Shalumu mwene Tikuva umwuzukuru wa Haluhasi, yajejwe ububīko bg’imyambaro, baramusiguza. Kand’ uwo mugore yaba i Yerusalemu mu gice caho ca kabiri.

15Arabishura, at’ Uku ni k’Uhoraho Imana y’Abisirayeli agize, ngo Murabarira uwo muntu yamubatumyeko,

16mut’ Uhoraho agize ngw Azotēza ivyago aha hantu, bo n’abahaba, ngo Nk’uko vyanditswe mu majambo yose yo mur’ ico gitabo wasomye, wewe nyene umwami w’i Buyuda;

17muti Kuko bāmuvuyeko, bakosereza imibavu izindi mana, muti Bakamutēza umwikomo ibikorwa vyose vy’intoke zabo; muti Ni co kizotuma uburake bgiwe bururumba kur’ aha hantu, ntihagire ikibuzimya.

18Kandi mubarire uwo mwami w’i Buyuda yabatumye gusiguza Uhoraho, mut’ Uku ni k’Uhoraho Imana y’Abisirayeli agize, ngo Ku vy’ayo majambo wumvise,

19ngo Kuko watsinzwe mu mutima wawe, ukicisha bugufi imbere yiwe, igihe wumva ivyo yavuze kur’ aha hantu bo n’abahaba, ingene hazocika imisaka n’ikivume, ukitantamurirakw impuzu zawe, ukaririra imbere yiwe, ngo Na we arakwumvise; ni k’Uhoraho agize.

20Ngo Nukw azoguha guhambga hamwe na ba sogokuruza, ushike mu mva yawe amahoro; ngo Kand’ amaso yawe ntazobona ivyo vyago vyose azotēza aha hantu. Nuko baraza, bagarukanira umwami ayo majambo.

← Chapter 21 Jump to: Chapter 23 →