2 Kings 14

Kirundi (Bibliya Yera 1951, 1967 (Burundi))

← Chapter 13 Jump to: Chapter 15 →

1Mu mwaka ugira kabiri Yehowasi mwene Yehowahazi umwami w’Abisirayeli ari ku ngoma, ni ho Amaziya mwene Yowasi umwami w’i Buyuda yima.

2Yar’ amaze imyaka mirongwibiri n’itanu igihe yaja ku ngoma, amara imyaka mirongwibiri n’ icenda i Yerusalemu ari ku ngoma; nyina yitwa Yehowadina w’i Yerusalemu nyene.

3Akora ivyo Uhoraho abona kw ari vyiza, ariko ntiyashikīra sekuruza Dawidi; yakoze nk’ivyo se Yowasi yakoze vyose.

4Mugabo ibitabo vyo ku mpinga z’imisozi ntivyakūrwaho; abantu bāri bagitangira ibimazi mur’ ivyo bitabo, bakahosereza imibavu.

5Hanyuma amaze kubona kw ahangamye ku ngoma, yica ba banyarugo bāri barishe umwami se wiwe.

6Arikw abana b’abo bicanyi ntiyabica, nk’uko vyanditswe mu gitabo c’ivyagezwe vya Mose, ivyashinzwe n’Uhoraho, ngw Abavyeyi ntibaze bicwe bazize abana babo, kand’ abana ntibaze bicwe bazize abavyeyi: ngw Arik’ umuntu wese az’ azire iciwe caha.

7Kandi yishe mu Banyedomu abantu ibihumbi cumi, abatsinze mu Kiyaya c’Umunyu; atera n’i Sela, arahatsinda, ahahindura izina ahita i Yokiteli na bugingo n’ubu.

8Hanyuma Amaziya atuma intumwa kuri Yehowasi mwene Yehowahazi, Yehowahazi mwene Yehu, umwami w’Abisirayeli, muti N’uze muhangane.

9Yehowasi umwami w’Abisirayeli atuma kwishura Amaziya umwami w’i Buyuda, mut’ Igitovu c’i Lebanoni catumye kw isederi y’i Lebanoni nyene, ut’ Umukobga wawe n’umushingire umuhungu waco. Bukeye igikōko caba i Lebanoni kihahise gikandagira ca gitovu.

10Nka ko waratsinze Abanyedomu, uraheza wishira hejuru mu mutima wawe: ego ni wihaye, arik’ ugume i muhira; n’iki gituma ugomba kwikwegera akaziri, mugapfa mwe n’ Abayuda?

11Ariko Amaziya ntiyaruha amwumvira. Nuko Yehowasi umwami w’Abisirayeli ni kwo kudūga, bahanganira na Amaziya umwami w’i Buyuda i Beti‐shemeshi h’i Buyuda nyene, bararumana.

12Maz’ Abayuda baneshwa n’Abisirayeli, umuntu wese ahungira i we.

13Maze Yehowasi umwami w’Abisirayeli afata mpiri Amaziya umwami w’i Buyuda, mwene Yowasi, Yowasi mwene Ahaziya, amufatira i Beti‐shemeshi nyene; aca aja i Yerusalemu, asangangura uruzitiro rwaho rw’amabuye, uhereye kw irembo ry’Abefurayimu ugashitsa kw irembo ryo ku mfuruka, hose har’ amatambge amajana ane y’ ukuboko uciriye mu nkokora.

14Asahura amazahabu n’amafeza yose, n’ibintu vyose vy’imbombovu bāsanze mu ngoro y’Uhoraho n’ivyo bāsanze mu bubīko bgo mu ngoro y’umwami, afata n’abantu abajana bari mu bugōmbe, araheza asubira i Samariya.

15Ibindi vyose vyadonzwe kuri Yehowasi, n’ivy’ ubuhizi bgiwe, n’ingene yarwanye na Amaziya umwami w’i Buyuda, none ntivyanditswe mu gitabo c’ivyo ku ngoma z’abami b’Abisirayeli?

16Nuko Yehowasi ahamvya ba sekuruza, ahambga i Samariya hamwe n’abami b’Abisirayeli; maz’ umuhungu wiwe Yerobowamu asubira ku ngoma yiwe.

17Yehowasi mwene Yehowahazi umwami w’Abisirayeli amaze gutanga, Amaziya mwene Yowasi umwami w’i Buyuda amara iyindi myaka cumi n’itanu.

18Ibindi vyose vyadonzwe kuri Amaziya, none ntivyanditswe mu gitabo c’ ivyo ku ngoma z’abami b’i Buyuda?

19Bukeye ab’i Yerusalemu baramugarariza, ahungira i Lakishi; barungika abamukurikirana i Lakishi, bamutsindayo.

20Umuvyimba wiwe bawuremēka amafarasi, bawuzana i Yerusalemu, bamuhamba hamwe na ba sekuruza ku murwa wa Dawidi.

21Maz’ abantu bose bahitana Uziya baramwimika, bamusubiza ku ngoma ya se Amaziya; Uziya yar’ amaze imyaka cumi n’itandatu.

22Ni we yasanasannye i Elati, ahagarura i Buyuda, umwami Amaziya amaze guhamvya ba sekuruza.

23Mu mwaka ugira icumi na gatanu Amaziya mwene Yowasi umwami w’i Buyuda ari ku ngoma, ni ho Yerobowamu mwene Yehowasi umwami w’Abisirayeli yima i Samariya; amara imyaka mirongwine n’umwe ari ku ngoma.

24Akora ivyo Uhoraho abona kw ari bibi; ntiyava mu vyaha vyose vya Yerobowamu mwene Nebati, ivyo yakwegeyemw’ Abisirayeli ngo bacumure.

25Mugabo asubiza urubibe rw’i Bgisirayeli aharwo, uhereye ahafata i Hamati ugashitsa ku kiyaga co mu kiyaya Araba, nk’ukw ijambo ry’Uhoraho Imana y’Abisirayeli ryavuze, iryo yavugiye mu musavyi wiwe Yona mwene Amitayi w’i Gati‐heferi, uwo yavugisha.

26Kuk’ Uhoraho yabonye amagorwa y’Abisirayeli iyo bava bakagera ingen’ ari menshi, kand’ ata mutabazi ariho wo kubatabara.

27Arik’ Uhoraho ntiyari yaravuze kw azozimanganya izina ry’Abisirayeli musi y’ijuru, nuko rero, abakirisha Yerobowamu mwene Yehowasi.

28Nukw ibindi vyose vyadonzwe kuri Yerobowamu, n’ivyo yakoze vyose, n’ivy’ ubuhizi bgiwe, n’ingene yarwanye intambara, n’uburyo yagaruriye Ubgisirayeli i Damasiko n’i Hamati, ahanyaze Abayuda, none ntivyanditswe mu gitabo c’ivyo ku ngoma z’abami b’Abisirayeli?

29Maze Yerobowamu ahamvya ba sekuruza, ari bo bami b’Abisirayeli; umuhungu wiwe Zekariya asubira ku ngoma yiwe.

← Chapter 13 Jump to: Chapter 15 →