Judges 1

Kirundi (Bibliya Yera 1951, 1967 (Burundi))

Jump to: Chapter 2 →

1Yosuwa amaze gupfa, Abisirayeli babaza Uhoraho, bati Muri twebge ni nde azobanza kuja gutera Abanyakanani ngw abarwanye?

2Uhoraho arishura, at’ Abayuda ni bo bazobanza gutera: kand’ ico gihugu ndakigabuye mu maboko yabo.

3Nukw Abayuda babarira ab’i wabo b’Abasimeyoni, bati Ni muze mufatanye natwe dutere Abanyakanani, dushikīre umugabane wacu twaheshejwe n’ubupfindo; natwe tuzofatanya namwe ngo mushikīre uwanyu. Nukw Abasimeyoni bajana na bo.

4Nukw Abayuda badūga gutera, maz’ Uhoraho agabura Abanyakanani n’Abaferizi mu maboko yabo, i Bezeki bahatsinda ibihumbi cumi mu ngabo zabo.

5Basanga Adoni‐bezeki i Bezeki nyene, baramurwanya, banesha Abanyakanani n’Abaferizi.

6Ariko Adoni‐bezeki arahunga, baramukinagiza, baramufata, bamuca intoke z’ibikumu n’amano manini.

7Adoni‐bezeki aravuga, at’Abami mirongwirindwi naciye ibikumu n’amano manini bāhora batoragura utwo barya musi y’ameza yanje: uko nabagiriye ni kw Imana inshubirije mu nkōko. Nuko bamujana i Yerusalemu, agwayo.

8Maz’ Abayuda batera Yerusalemu, barahatsinda, baharanduza inkota; ico gisagara bagiha impumbi.

9Maze baramanuka, batera Abanyakanani, uhereye ku baba mu mugamba n’ababa i bumanuko n’ababa mu gihugu c’ imisozi iciye bugufi.

10Baraheza baja gutera Abanyakanani baba i Heburoni; Heburoni kera hitwa Kiriyati‐Araba: maze bica Sheshayi na Ahimanu na Talumayi.

11Nuko bavayo, baja gutera ab’i Debira; Debira kera hitwa Kiriyati‐seferi.

12Kalebu aravuga, at’ Umuntu azotera i Kiriyati‐seferi akahanesha, nzomushingira umwana wanje Akisa.

13Otiniyeli mwene Kenazi, murumuna wa Kalebu, arahanesha; araheza amushingira umukobga wiwe Akisa.

14Maz’ agishika i w’umugabo wiwe, aramwinginga ngw asabe se itongo; Akisa ava ku ndogoba yiwe, Kalebu aramubaza, at’ Ugomba iki?

15Aramwishura, ati Ntabara ungabire: ko wandungitse mu gihugu cumye, mpa n’amariba y’amazi. Nuko Kalebu amuha amariba yo haruguru n’ayo hepfo.

16Maz’ abo mu ruvyaro rwa wa Munyakeni, muramu wa Mose, badūgana n’Abayuda bavuye mu gisagara co mu bigazi, baja mu bugaragwa bg’i Buyuda, ahahera i bumanuko bg’i Arada, babanayo na bene ho.

17Bukeye Abayuda bafatanya n’ab’i wabo b’Abasimeyoni, banesha Abanyakanani bāba i Sefati, barahageseza; ni kwo kwita ico gisagara Horuma.

18Abayuda banesha i Gaza n’impande zaho zose, na Ashikeloni n’impande zaho zose, na Ekuroni n’impande zaho zose.

19Uhoraho yari kumwe n’Abayuda; birukana ababa mu gihugu c’umugamba, ariko ntibashobora kwirukana ababa mu biyaya, kuko bari bafise imikogote y’ivyuma.

20Kalebu bamuha Heburoni nk’uko Mose yari yaravuze; ahirukana bene Anaki ukw ari batatu.

21Arikw Ababenyamini ntibirukanye Abayebusi bāba i Yerusalemu; nukw Abayebusi babana n’Ababenyamini i Yerusalemu gushitsa na bugingo n’ubu.

22Ab’ umuryango wa Yosefu na bo baradūga ngo batere i Beteli; kand’ Uhoraho yari kumwe na bo.

23Batuma abaja gutata i Beteli; ico gisagara kera citwa Luzi.

24Abo batasi babona umuntu avuye mur’ ico gisagara, baramubarira, bat’ Enda se twereke akanyuro twocamwo ngo dushike mur’ iki gisagara, natwe tuzokwibuka.

25Aca abereka aho baca ngo bagishikemwo; ni kwo kuranduza inkota ico gisagara, ariko wa mugabo n’abo mu rugo rwiwe bose barabareka.

26Uwo muntu araheza aragenda, aja mu gihugu c’Abaheti, yubakay’ igisagara, acita Luzi: ni ryo zina ryaco na bugingo n’ubu.

27Arikw Abamanase ntibirukanye ab’i Beti‐sheyani cank’ ab’i Tanaki cank’ ababa i Dori, cank’ ababa Ibuleyamu, cank’ ababa i Megido, cank’ abo mu dusagara twagenda tuhakūkira, kukw Abanyakanani bāgataye kuva mur’ ico gihugu.

28Maz’ Abisirayeli bamaze guhama, bashinga Abanyakanani ibikebere, ntibabirukana ngo babaherengeteze.

29Abefurayimu na bo ntibirukanye Abanyakanani baba i Gezeri, arikw Abanyakanani babana na bo ngaho nyene i Gezeri.

30N’Abazebuloni na bo ntibirukanye ababa i Kitironi cank’ ababa i Nahalolo; arikw abo Banyakanani babana na bo, bashingwa ibikebere.

31N’Abasheri na bo ntibirukanye ababa ahitwa Ako, cank’ ababa i Sidoni, cank’ ab’i Ahulaba, cank’ ab’i Akuziba, cank’ ab’i Heliba, cank’ ab’i Afeka, cank’ ab’i Rehobu;

32arikw Abasheri babana n’Abanyakanani, ben’ ico gihugu, ntibabirukana.

33N’Abanafutali na bo ntibirukanye ababa i Beti‐shemeshi, cank’ ababa i Beti‐anati, arikw Abanafutali babana n’Abanyakanani, ben’ ico gihugu; mugabo, ababa i Beti‐shemeshi n’i Beti‐anati bashingwa ibikebere.

34Abamori bagenda barasegenya, basunika Abadani gushitsa mu gihugu c’umugamba, ntibābakundira kumanuka mu kiyaya,

35arikw abo Bamori bāgataye kuva ku musozi Heresi n’i Ayaloni n’i Shalubimu; arikw ab’ inzu ya Yosefu bamaze gukomera bashinga abo Bamori ibikebere.

36Kand’ urubibe rw’Abamori rwāhēra ku mudūgo w’i Akurabimu rugashitsa i Sela rugasubiza amajaruguru.

Jump to: Chapter 2 →