Judges 11

Kirundi (Bibliya Yera 1951, 1967 (Burundi))

← Chapter 10 Jump to: Chapter 12 →

1Maze hāri Yefuta w’Umugileyadi, kandi yar’ umuhizi w’inkomezi; yari yavutse kuri maraya, yamuvyaweko na Gileyadi.

2Ariko muka Gileyadi bari baravyaranye abandi bahungu; abo bamaze gukura, bāri bārirukanye Yefuta, bati Nta co uteze mu vya data, kuko wavutse ku mugore w’ icangazi.

3Maze Yefuta aca ahunga bene se, aragenda aba mu gihugu c’i Tobu; abantu b’ imburakimazi bakoranira kuri we, bakagenda bambura abantu.

4Igihe kiragera, Abamoni ni kwo gutera Abisirayeli.

5Maze babateye, abakuru b’i Gileyadi baragenda ngo bakūre Yefuta mu gihugu c’i Tobu;

6baramubarira, bati N’uze ube umugabisha wacu, tubone kurwanya Abamoni.

7Yefuta yishura abakuru b’i Gileyadi, ati Mbega si mwebge mwanyanse, mukanyirukana mu rugo rwa data? None muhenga mugowe mukaza iyo ndi?

8Maz’ abakuru b’i Gileyadi baramwishura, bati Noneh’ igitumye tuza iy’ uri n’ukugira ng’ ujane natwe, urwanye Abamoni; uzoheza ube umukuru wacu, uganze ababa i Gileyadi bose.

9Yefuta arababaza, ati None ni mwansubiza i wacu kurwana n’Abamoni, Uhoraho akampa kubatsinda, nzoheza mbe umukuru wanyu koko?

10Abo bakuru b’i Gileyadi baramwishura, bat’ Uhoraho abaye icabona hagati yacu, yuko tuzoshitsa ivyo uvuze.

11Nuko Yefuta ajana n’abo bakuru b’i Gileyadi, abantu bamugira umugabisha wabo n’umukuru wo kubaganza; Yefuta asubira muri ya majambo yiwe yose imbere y’Uhoraho i Misipa.

12Maze Yefuta atuma intumwa ku mwami w’Abamoni, muti Ngo Mupfa iki, gitumye umukūriye hasi, ukaza gutera igihugu ciwe?

13Umwami w’Abamoni yishura intumwa za Yefuta, uti N’ukw Abisirayeli, bamaze kuva muri Egiputa, banyaze igihugu ciwe uhereye ku ruzi Arunoni ugashitsa kuri Yaboki no kuri Yorodani. Uti None rero, n’umusubize ivyo bihugu ku neza.

14Yefuta yongera gutuma intumwa ku mwami w’Abamoni,

15ziramubgira, ziti Yefuta ngw Abisirayeli si bo bānyaze igihugu c’i Mowabu cank’ igihugu c’Abamoni,

16ut’ Arikw Abisirayeli, igihe bādūga bava muri Egiputa, bāciye mu bugaragwa bashika ku Kiyaga Gitukura; hanyuma bashika i Kadeshi.

17Ut’ Abisirayeli baraheza batuma intumwa ku mwami wa Edomu kumwinginga ngw abareke bahite mu gihugu ciwe, arik’ umwami wa Edomu ntiyabakundira. Uti Batuma no ku mwami w’i Mowabu nk’uko nyene, na we nyene aranka. Uti Nukw Abisirayeli baguma i Kadeshi.

18Uti Hanyuma baca mu bugaragwa, bagendana urubibe rw’igihugu ca Edomu n’ic’ i Mowabu, bashika ku ruhande rw’i burasirazuba rw’igihugu c’i Mowabu, basagaza hakurya ya Arunoni; ut’ Ariko ntibārenze urubibe rw’i Mowabu, uti Kuko Arunoni ari rwo rwar’ urubibe rwaho.

19Uti Maz’ Abisirayeli batuma intumwa kuri Sihoni umwami w’Abamori yaba i Heshiboni, uti Kumwinginga ngw abareke bahite mu gihugu ciwe, baje mu cabo.

20Ut’ Ariko Sihoni ntiyabashirwako ngw abareke bahite mu gihugu ciwe; ut’ Arikw akoranya ingabo ziwe zose, abategera i Yahasi, arabarwanya.

21Uti Maz’ Uhoraho Imana y’ Abisirayeli agabura Sihoni n’ ingabo ziwe zose mu maboko y’Abisirayeli, barabatsinda. Uti Nukw Abisirayeli bashikīra igihugu cose c’Abamori bāba mur’ ico gihugu.

22Bashikīra igihugu cose c’Abamori, uhereye kuri Arunoni ugashitsa kuri Yaboki, uhereye no mu bugaragwa ugashitsa kuri Yorodani.

23Uti Non’ Uhoraho Imana y’Abisirayeli, ko yasohoye Abamori ngo babise abantu biwe b’Abisirayeli, uti None ni wewe wohabāka?

24Uti Non’ igihugu imana yawe Kemoshi yoguha, ntiwocegukira? Uti Na bo n’uko, igihugu Uhoraho Imana yabo yasohoyemwo bene co bose ngo bababise, bāracegukiye.

25Uti Mbeg’ uraruta Balaki mwene Sipori umwami w’i Mowabu? Uti Har’ aho yigeze aja impaka n’Abisirayeli? Uti Har’ aho yarwanye na bo?

26Ut’ Abisirayeli ko bamaze imyaka amajana atatu baba i Heshiboni no mu dusagara tuhakūkira, n’i Aroweri no mu dusagara tuhakūkira, no mu bisagara vyose vyo kuri Arunoni; uti None n’iki cababujije kubisubirana mur’ ico gihe cose?

27Uti We nta co agukoreye, ni wewe umugiriye nabi k’uje kumutera. Ut’ Uhoraho Umucamanza uyu musi ni yerekane Abisirayeli n’Abamoni abatsinze ab’ ari bo.

28Arik’ umwami w’Abamoni ntiyaruha yumva amajambo Yefuta yamutumyeko.

29Maze Mpwemu w’Uhoraho aza kuri Yefuta, na we anyuranganya i Gileyadi no mu bg’aba Manase, aca i Misipe h’i Gileyadi, avay’ aragenda ngw aje mu Bamoni.

30Maze Yefuta asezeranira Uhoraho isezerano, ati Ni wagabura Abamoni mu maboko yanje,

31ngatabaruka amahoro mvuye kurwana na bo, ūzobanza gusohoka mu nzu yanje kunsanganira, azoba uwawe, Uhoraho, nanje nzomutanga kw ikimazi c’ukwoswa.

32Nuko Yefuta ajabuka mu Bamoni, arabatera; Uhoraho abagabura mu maboko yiwe.

33Arabatikiza uhereye i Aroweri ugashitsa i Miniti, atsinda ibisagara mirongwibiri, arinda ashitsa i Abeli‐keramimu; kaba agatikizo gakomeye. Uko ni kw Abamoni bāmazwe igabo n’Abisirayeli.

34Maze Yefuta aratabaruka, aja i Misipa; ashitse i we, umwana wiwe w’umwigeme asohoka kumusanganira afise udushāko tw’ ingoma, arikw aratamba, atārīka. Kand’ uwo mwana wiwe yar’ ikinege: nta muhungu nta mwigeme wundi yar’ afise, atar’ uyo gusa.

35Amubonye, yitantamurirakw impuzu ziwe, ati Mbonye ibara, mwana wanje! Urambabaje, ungiriye nabi! Kuko navyīkūriye mu kanwa, nkabibarira Uhoraho, none sinshobora kwivuguruza.

36Aramwishura, ati Data, ko vyakwīvīriye mu kanwa ukabibarira Uhoraho, n’ungenze nk’uko wavuze; kazima Uhoraho yaguhaye kwīhōra abansi bawe b’Abamoni.

37Kand’ abarira se, ati Mugabo har’ ico ngusaba: ube urandetse amezi abiri, ngende ku misozi, twe na bagenzi banje, ndirire ubukumi bganje.

38Se aramwishura, ati Genda. Aramusezera ngw aje kumara amezi abiri. Ajana na bagenzi be, aririra ubukumi bgiwe mu misozi.

39Maz’ amezi abiri ashize, agaruka kwa se, na we amugenza nk’ukw isezerano yasezeranye riri; kandi ntiyari yarīgeze kumenya icitwa umugabo. Bica biba umugenzo mu Bisirayeli, uk’ umwaka utashe:

40abigeme b’Abisirayeli bama bagenda kwibuka uwo mukobga wa Yefuta w’Umugileyadi, bamuririra imisi ine mu mwaka mu mwaka.

← Chapter 10 Jump to: Chapter 12 →