Judges 17

Kirundi (Bibliya Yera 1951, 1967 (Burundi))

← Chapter 16 Jump to: Chapter 18 →

1Kandi hār’ umuntu wo mu mugamba w’Abefurayimu yitwa Mika.

2Abarira nyina, ati Za shekeli z’ifeza igihumbi n’ijana wari wibge, nkumva uvumana, ni jewe nazitwaye, ndazifise. Nyina aravuga, at’ Uragahezagirwa n’ Uhoraho, mwana wanje!

3Nukw asubiza nyina izo shekeli z’ ifeza igihumbi n’ijana; nyina aravuga, at’ Izi feza ndazēguriye Uhoraho ngo zibe izera, kugira ng’ uzironderemw’ igishushanyo kibājwe n’igishushanyo kivugutiye mu nkero, mwana wanje: none rero ndaziguhaye.

4Nukw amaze gusubiza nyina izo feza, nyina ahitanamw’ amajana abiri, aziha umucuzi, azikūramw’ igishushanyo kibājwe n’igishushanyo kivugutiye mu nkero; babishira mu nzu ya Mika.

5Uwo mugabo Mika yar’ afise akanyabugoro k’ibigirwamana; arondeza umwambaro witwa efodi na terafimu, yirobanurira umwe mu bahungu biwe ngw amubere umuherezi.

6Mur’ iyo misi Abisirayeli nta mwami bāribgagire: umuntu wese yakora ico yigombeye.

7Kandi hārih’ umusore w’i Betelehemu h’i Buyuda wo mu muryango wa Yuda w’Umulewi, yari yaje ngaho.

8Yari yaravuye mur’ ico gisagara c’i Betelehemu h’i Buyuda, aja kurondera ah’ aba; akirikw arāngāra mu mugamba w’Abefurayimu aserukira ku rugo rwa Mika.

9Mika aramubaza, at’ Uva hehe? Aramwishura, ati Nd’ Umulewi w’i Betelehemu h’i Buyuda: ngenda ndondera aho mba.

10Mika aramwishura, at’ Igumire ngaha i wanje, umbere umuvyeyi umbere n’umuherezi, nanje nzoguhemba shekeli cumi mu mwaka, n’impuzu n’ivyo kurya. Nuk’ uwo Mulewi aca arinjira,

11yemera kubana na we; uwo musore amuhindukira nk’ umwe mu bana biwe.

12Nuko Mika arobanura uwo Mulewi, ahinduka umuherezi wiwe, yībēra mu rugo rwiwe.

13Maze Mika aravuga, ati Noneho mmenye yuk’ Uhoraho azongirira neza, kuko mfise Umulewi k’umuherezi.

← Chapter 16 Jump to: Chapter 18 →