Judges 13

Kirundi (Bibliya Yera 1951, 1967 (Burundi))

← Chapter 12 Jump to: Chapter 14 →

1Maz’ Abisirayeli bongera gukora ivyo Uhoraho abona kw ari bibi; Uhoraho abatanga mu maboko y’Abafilisitiya kumara imyaka mirongwine.

2Kandi hār’ umuntu w’i Sora wo mu muryango w’Abadani, yitwa Manowa. Umugore wiwe yar’ ingumba itigeze kuvyara.

3Umumarayika w’Uhoraho yiyereka uwo mugore, aramubarira, ati Rāba ur’ ingumba, ntiwigeze kuvyara; arik’ uzosama inda, uvyare umwana w’umuhungu.

4None rero, uz’ uzire akaziri ntunywe vino cank’ ikiboreza na kimwe, kandi ntuz’ urye ikintu na kimwe gihumanya;

5kukw ehe rāba, ugiye gusama inda, uvyare umwana w’umuhungu; kandi ntihaze hagire urupfuhe rumugera ku mutwe; kuk’ uwo mwana azoba Umunaziri ku Mana uhereye akiva mu nda; kandi ni we azotangura kurokora Abisirayeli, abakūre mu maboko y’Abafilisitiya.

6Uwo mugore aragenda, abibarira umugabo wiwe, at’ Umuntu w’Imana yaje aho ndi; kandi mu maso hiwe hāsa n’ah’ umumarayika w’Imana, kandi hateye ubgoba cane. Ariko sinamubajije iy’ avuye, na we ntiyambgiye izina ryiwe.

7Ariko yambariye ngo nzosama inda, mvyare umuhungu; kandi ngo none nze nzire akaziri sinze nnywe vino cank’ ikiboreza na kimwe canke ngo ndye ikintu na kimwe gihumanya, ngo kuk’ uwo mwana azoba Umunaziri ku Mana uhereye akiva mu nda ngo gushitsa ku musi azopfirako.

8Maze Manowa yinginga Uhoraho, ati Bgirukiro, ndakwinginze, wa muntu wawe wadutumako ni yongere agaruke kuri twebge, atubarire uko tuzogenza uwo mwana azovuka.

9Nukw Imana yemerera Manowa; maz’ uwo mumarayika w’Imana asubira kugaruka aho wa mugore ari, amusanga aho yari yicaye mu murima; ariko Manowa umugabo wiwe ntiyari kumwe na we.

10Nuk’ uwo mugore aca aranyaruka, arirukanga, abibgira umugabo wiwe, ati Wa muntu yaza bga bundi yongeye kunyiyereka.

11Maze Manowa ava hasi, akurikira umugore wiwe; ashikiriye uwo muntu aramubaza, ati Mbega ni wewe wavuganye n’uyu mugore? Na we ati Ni jewe.

12Manowa aramubaza, at’ Ivyo wavuze ni vyashika, uwo mwana tuzomurera dute? Azokora iki?

13Uwo mumarayika w’Uhoraho yishura Manowa, at’ Ivyo nabariye uyu mugore vyose, az’ avyirinde:

14ntaz’ arye ku kintu na kimwe kivuye ku muzabibu, ntaz’ anywe vino cank’ ikiboreza na kimwe, canke ngw arye ikintu na kimwe gihumanya; ivyo namubariye vyose az’ avyitondere.

15Maze Manowa abarira uwo mumarayika w’Uhoraho, ati Ndakwinginze, banza uhagarare, tukubāgire agasuguru.

16Uwo mumarayika w’Uhoraho aramwishura, ati Nah’ umpagaritse nta co ndiburye ku vyo kurya vyawe; ariko namb’ ugomba kubāga ikimazi co kwosa, ugishikanire Uhoraho. Ariko Manowa ntiyaribgamenye kw ar’ umumarayika w’Uhoraho.

17Maze Manowa abaza uwo mumarayika w’Uhoraho, ati Witwa nde, kugira ngw ivyo wavuze ni vyashika tuze tugushemagize?

18Uwo mumarayika w’Uhoraho aramwishura, at’ Umbariza iki izina ryanje, kw ar’ izina ritangaje?

19Nuko Manowa yābīra iyo suguru y’impene n’ishikanwa ry’ifu, abishikanirira Uhoraho hejuru ku gitandara; haca haba igitangaza, Manowa n’umugore wiwe babirorēra:

20umuriro wo ku gicaniro ukiriko urarabagiza uja hejuru, wa mumarayika w’Uhoraho adūga mur’ uwo muriro wo ku gicaniro, Manowa n’umugore wiwe babirorēra; baca barapfukama, barūnama.

21Kuva ubgo, uwo mumarayika w’Uhoraho ntiyongeye kwiyereka Manowa cank’ umugore wiwe ukundi. Nuko Manowa amenya kw ar’ umumarayika w’Uhoraho.

22Maze Manowa abarira umugore wiwe, ati Nta kabuza turapfuye, kuko tubonye Imana!

23Arik’ umugore wiwe aramwishura, at’ Iyaba Uhoraho yagomba kutwica, ntaba yātwākīriye ikimazi cacu coshejwe bo n’ishikanwa ryacu ry’ifu, kandi ntaba yātweretse ivyo vyose, canke ngw atubarire amajambo ameze nk’ayo.

24Hanyuma uwo mugore avyara umwana w’umuhungu, amwita Samusoni; uwo mwana arakura, Uhoraho amuha umugisha.

25Maze Mpwemu w’Uhoraho atangura kumucānīra ar’ i Mahane‐dani, hagati y’i Sora n’i Eshitayoli.

← Chapter 12 Jump to: Chapter 14 →