Judges 2

Kirundi (Bibliya Yera 1951, 1967 (Burundi))

← Chapter 1 Jump to: Chapter 3 →

1Umumarayika w’Uhoraho ava i Gilugali aradūga, aja i Bokimu. Arababarira, ati Nabadūganye mbakūye muri Egiputa, mbashikana mu gihugu nasezeraniye ba sogokuruza, nkavuga, nti Nta ho nzova mw isezerano nabasezeraniye;

2nti Namwe ntimuze musezerane na ben’ iki gihugu, ariko muze musangangure ibicaniro vyabo. Yamara ntimwanyumviye. N’iki catumye mukora murtyo?

3None nanje hinge ndababarire: Abo sinzobirukana ngo bababise, ariko bazobabera ibibahanda mu mbavu, n’imana zabo zizobabera umutego.

4Maz’ umumarayika w’Uhoraho amaze kubgira Abisirayeli bose ayo majambo, abantu baraturikisha bararira.

5Aho hantu baca bahita i Bokimu; bahatangira ibimazi, babishikanira Uhoraho.

6Kandi Yosuwa igihe yar’ amaze gusēzera abantu, umuntu wese aja mw ishamvu yiwe, ngo begukire ico gihugu.

7Yosuwa akiriho, abantu bāgumye k’Uhoraho, no mu gihe cose c’abakuru bāsigaye Yosuwa amaze gupfa, abāri bārabonye ibikorwa vyose bihambaye Uhoraho yakoreye Abisirayeli.

8Yosuwa mwene Nuni umusavyi w’Uhoraho ahwera amaze imyaka ijana n’icumi.

9Bāmuhamvye mw ishamvu yiwe bgite i Timunati‐sera mu mugamba w’Abefurayimu, ku ruhande rw’i burārūko rw’ umusozi Gashi.

10Hanyuma ab’ urwo runganwe bose na bo barapfa, bahamvya ababo; bakurikirwa n’urundi runganwe, abo bo bakura batazi Uhoraho, canke ngo bamenye igikorwa yakoreye Abisirayeli.

11Maz’ Abisirayeli bakora ivyo Uhoraho abona kw ari bibi, basaba za Bayali;

12bava k’Uhoraho Imana ya ba sekuruza yabakūye mu gihugu ca Egiputa, bakurikira izindi mana zo mu mana z’abanyamahanga babakikije, bakazūnamira, bakaratsa Uhoraho.

13Uko ni ko bātaye Uhoraho, bagasaba Bayali na Ashitaroti.

14Uburake bg’ Uhoraho buca buziriringira Abisirayeli, abagabura mu maboko y’ abanyazi, barabanyaga, abatanga mu maboko y’abansi babo babakikije, bituma batagishobora guhagarara imbere y’abansi babo.

15Aho bāja gutera hose, Uhoraho yarabarwanya, nk’uko yari yaravuze akabarahira; bituma baja mu vyago bikomeye.

16Maz’ Uhoraho akabahagurukiriza abacamanza, bakabakiza bakabakūra mu maboko y’abābanyaga.

17Ariko bakanka kwumvira abo bacamanza babo, bakagenda bahurumbira izindi mana nk’ibimaka, bakazūnamira, bagata vuba inzira ba sekuruza bāhora bagenderamwo, ntibumvira ivyagezwe vy’ Uhoraho nk’ukw abo bāvyumvira.

18Kand’ uk’ Uhoraho yabaha umucamanza, yaba kumwe n’uwo mucamanza, akabakiza, akabakūra mu maboko y’abansi babo igihe cose uwo mucamanza akiriho, kuko vyamutera akagongwe kwumva iminiho yabo banihishwa n’ababahahaza bakabacuranguza.

19Ariko hanyuma, uwo mucamanza amaze gupfa, bagasubira inyuma, bagakora ibibi birengeye ivya ba sekuruza, bagakurikira izindi mana bakazisaba, bakazūnamira; mu ngeso zabo mbi bakanka kugira n’imwe bata, canke ngo bareke no gukomantaza imitima.

20Maz’ uburake bg’Uhoraho buziriringira Abisirayeli, akavuga, at’ Iri hanga ko ryishe isezerano ryanje nasezeranye na ba sekuruza, ntibanyumvire,

21nanje guhēra ubu sinzokwongera kwirukana ihanga na rimwe ngo ribabise, mu yo Yosuwa yasizeho igihe yapfa,

22kugira ngw Abisirayeli ndabageragereshe ayo mahanga, ndābe ko boruha bakagumya inzira yanje, bakayigenderamwo, nk’uko ba sekuruza bāyigenderamwo, canke ko bazokwanka.

23Ni co catumye Uhoraho areka ayo mahanga, ntayirukane n’ingoga na n’ingoga; kandi ntiyayagomoreye Yosuwa.

← Chapter 1 Jump to: Chapter 3 →