Judges 10

Kirundi (Bibliya Yera 1951, 1967 (Burundi))

← Chapter 9 Jump to: Chapter 11 →

1Hanyuma ya Abimeleki haza Tola mwene Puwa, Puwa wa Dodo, wo mu muryango wa Isakari, arahaguruka akiza Abisirayeli. Yaba i Shamiri mu mugamba w’Abefurayimu.

2Amara imyaka mirongwibiri n’itatu ar’ umucamanza mu Bisirayeli; apfuye, bamuhamba i Shamiri nyene.

3Hanyuma yiwe hahaguruka Yayiri w’Umugileyadi; amara imyaka mirongwibiri n’ibiri ar’ umucamanza mu Bisirayeli.

4Kandi yar’ afise abahungu mirongwitatu, bagendera ku ndogoba mirongwitatu nyene, kandi bari bafise ibisagara mirongwitatu vyitwa Havoti‐yayiri, kandi ni ko bicitwa na bugingo n’ubu; biri mu gihugu c’i Gileyadi.

5Yayiri apfuye, bamuhamba i Kamoni.

6Maz’ Abisirayeli bongera gukora ivyo Uhoraho abona kw ari bibi, basaba za Bayali na za Ashitaroti, n’imana z’i Siriya n’iz’ i Sidoni n’iz’ i Mowabu n’iz’ Abamoni n’iz’ Abafilisitiya; bata Uhoraho, ntibaba bakimusaba.

7Uburake bg’ Uhoraho buziriringira Abisirayeli, abagabura mu maboko y’Abafilisitiya no mu y’ Abamoni.

8Mur’ uwo mwaka bacuranguza Abisirayeli, barabahahaza; bamara imyaka cumi n’umunani bagirira nabi Abisirayeli bose bo hakurya ya Yorodani mu gihugu c’Abamori i Gileyadi.

9Hanyuma Abamoni bajabuka Yorodani baja gutera n’Abayuda na bo n’Ababenyamini n’ab’ umuryango w’Abefurayimu, bituma Abisirayeli babura epfo na ruguru.

10Maz’ Abisirayeli batakambira Uhoraho, bati Twagucumuyeko, kuko twakuvuyeko ari wewe Imana yacu, tugasaba za Bayali.

11Uhoraho yishura Abisirayeli, ati Mbega si jewe nagenda mbakiza Abanyegiputa n’Abamori n’Abamoni n’Abafilisitiya?

12Kandi hamwe Abasidoni n’Abamaleki n’Abamayoni bābahahaza, mukantakambira, nagenda mbarokora nkabakūra mu maboko yabo.

13Yamara, ko mwamvuyeko, mukaja gusaba izindi mana, ni co gituma ntongera kubakiza.

14Ni mugende mutakambire za mana mwitoranirije, abe ari zo zibakiza mu gihe c’amagorwa yanyu.

15Abisirayeli bishura Uhoraho, bati Twaracumuye koko, none n’utugire uk’ ugomba: mugabo, wemere kudukiza iri rimwe gusa.

16Baraheza bakūraho izo mana z’inyamahanga, basubira gusaba Uhoraho, na we aca agira ikigumbagumba mu mutima kubgo kubona imibabaro y’Abisirayeli.

17Maz’ Abamoni bakoranira hamwe, basagaza i Gileyadi, Abisirayeli na bo barakorana, basagaza i Misipa.

18Abantu baravugana, ari bo bakuru b’i Gileyadi, bati Ni nde yotangura gusomboroza Abamoni? Uwoboneka azohabga ubukuru mu b’i Gileyadi bose.

← Chapter 9 Jump to: Chapter 11 →