Proverbs 10

Romani Sinte 2024 (O Debleskro Lab 2024 (Sinte-Manouche))

← Chapter 9 Jump to: Chapter 11 →

1Kalla hi i goseve laba o Salomestar. I gosevo čavo krell peskro dades oun peskri dat barhtelo. I dinelo čavo krell, te vell lenge ropaske.

2Čoredo bravlepen hi čičeske. O čačepen lell tout dran o merepen vin.

3O baro Devel moukell i lačes gar te bokell. Krik pestar tradell lo ko čilačes, koles bok pral boud koova hi.

4Koon peskre vasta an i gali čiddo moukell, kova vell čorvelo. Koon boud boudrell, kova vell bravelo.

5Koon niyaleske peskro djob dren anell, hi i gosevo čavo. Koon sovell an ko tsiro, kay o djob dren anlo vell, kova hi i čavo, koleske peskro dad pes hounte ladjell.

6O Debleskri barht hi čiddo ap koleste, kay an o čačepen tardo hi. An o rakepen i čilačendar hi lengro djoungelo koova khatedo.

7Lače menshe venn gar bistedo. Kova, hoy le kran, hi o Debleskro lačepen. I čilače venn bistedo.

8Koles, kay i gosevo dji hi, rikrell pes ap kol laba, hoy leske penlo van. yek, kay dinelo koova rakrell, nashrell halauter.

9Kova, kay an o čačepen djivell, hounte darell gar. Kova, kay ap bange dromma djal, vell tapedo.

10Kova, kay i yakentsa dell, doukrell i vavaren. Kova, kay dinelo koova rakrell, nashrell halauter.

11Har i brounna dran kolate djido pani nashell, yaake hi i laba kolestar, kay an o čačepen tardo hi. Pal i laba i čilačendar hi lengro djoungelo koova khatedo.

12Dran rholi vell čingepen. Koon o vavares o djiyestar kamell, bistrell leskro tselo čilačo koova.

13Kova, kay hayvell, hoy mishto oun gar mishto hi, rakrell goseve laba. Koles, kay či an o shero hi, kova lell dava.

14Goseve menshe rodenn pal kova, te djinenn le boud koova. O rakepen i dinelestar anell sik an i bibarht.

15O bravlepen i bravelestar hi leske har i zorelo kheer. I bibarht o čorvelestar hi leskro čorvlepen.

16I boudi kolestar, kay an o čačepen tardo hi, anell leske doha djipaske. I rhorheno kras peskro bravlepah čilačo koova.

17Kova, kay shounell ap koleste, kay dell les trad, kova djal ap o drom, hoy anell o djipen. Kova, kay kamell gar te shounell, hi ap i drom, kay djal lo nashedo.

18Koles hi i rhorheno mouy, kay peskri rholi ap i vavareste khatrell. Oun kova, kay rhorhepen pral i vavareste rakrell, hi i dinelo.

19Koon boud laba krell, anell ninna doosh ap peste. Koon peskro mouy rikrell, hi gosevo.

20O rakepen kolestar, kay an o čačepen tardo hi, hi har kouč roup. Kova, hoy i čilačes an o shero hi, hi či moldo.

21O rakepen kolestar, kay an o čačepen tardo hi, dell boud menshen nevi zoor. Kolen či an o shero hi, kolla merenn dran ko dinelo koova, hoy le kran.

22Te čivell o baro Devel peskri barht ap toute, veh tou bravelo. Oun kova, hoy tou koy pashel kreh, hi čičeske.

23O dineleske hi shoukar, te krell lo vi-ladjedo koova. O gosevo morsheske hi shoukar, te hayvell lo gomme boudeder.

24Kolestar i čilačo darell, kova vell pral leste. Oun kova, hoy i lače mangenna, kova vell lenge dino.

25Har i zorelo dourho pral i phoub phourdas, his o čilačo bouder gar koy. Kova, kay an o čačepen tardo hi, ačell hako tsireske.

26Har shout i dandenge, oun yagakro dourho i yakenge, yaake hi o či-moldo, kay kamell gar te boudrell, kolenge, kay les ap i boudi bičran.

27Kova, kay djivell o baro Debleha, djivell boud bersha. O djipen o čilačestar vell tikneder.

28Kova, kay i lače pre dikenna, te vell len, kova vell lenge dino; oun yon venn barhtelo. Kova, kay i čilače pre dikenn, te vell len, kova vell gar.

29O drom o baro Deblestar hi har i zorelo kheer kolenge, kay an o čačepen tardo hi. I čilačen anell lo an o merepen.

30Kova, kay an o čačepen tardo hi, ačell hako tsiro zoreles tardo. I čilače ačenn gar an o them.

31Dran o mouy kolestar, kay an o čačepen tardo hi, venn goseve laba. I rhorheni čip vell tele činlo.

32O rakepen kolestar, kay an o čačepen tardo hi, krell barhtelo. O rakepen i čilačendar doukrell.

← Chapter 9 Jump to: Chapter 11 →