Proverbs 26

Romani Sinte 2024 (O Debleskro Lab 2024 (Sinte-Manouche))

← Chapter 25 Jump to: Chapter 27 →

1Har gib an i niyal oun har depen an ko tsiro, kay anenn le o djob dren, yaake djal gar, te vell o dinelo sharedo!

2Har i čirklo, hoy hadell pes an o bolepen, oun vell gar tele pash i mensheste, yaake hi o praasepen, hoy vas vin rakedo pral yekeste, kay kek doosh ap peste anas. Ko praasepen taprell les gar.

3I čoupni o grayeske, oun i ledertikri rima troul i meen i eslatar, oun i kasht ap o doumo i dinelestar.

4Ma rake dinlepen ap i dineleste pale, te vess gar har yob!

5Rake i dineleha, kay rakrell dineles ap toute, yaake te hayvell lo, har dinelo yob hi.

6Kova, kay i dinelo bičepaskres bičrell, kova hi har yek, kay dell peske kokres i herya tele oun rhal dava.

7Har i herya i bango menshestar kek zoor an lende hi, yaake hi i gosevo lab an o mouy i dinelestar.

8Yek, kay sharell o dineles hi har yek, kay pandell i bar yaake zoreles an i vitsepaskri, te nay vitsrell lo les gar.

9I soubyengro kasht an o vast kolestar, kay mato hi, yaake hi i gosevo lab an o mouy i dinelestar.

10Har yek, kay troul peste karye dell, oun hakenes doukrell, yaake hi kova, kay lell i dineles, te boudrell lo leske, oder saven, kay djan ap o drom.

11Har i djouklo, hoy pale rhal, hoy lo vin čadas, yaake hi o narvelo, kay krell pale te pale dinelo koova.

12I dinelo nay vell sikeder gosevo har yek, kay pestar kokres patsell, te hi lo gosevo.

13Ko či-moldo, kay kamell gar te boudrell, kova penell: Vin hi i levo, ava, mashkral ap o drom hi i levo.

14Yaake har i voudar rissrell pes an i rikepangre, yaake rissrell pes an peskro čiben ko či-moldo, kay kamell či te boudrell.

15I či-moldo, kay kamell či te krell, čivell peskro roy an o čaro, oun anell peskro vast gar pash o mouy.

16I či-moldo, kay kamell gar te boudrell, hi an peskre yaka gosveder har efta, kay djinenn, hoy mishto oun čačo hi.

17Kova, kay pes dren moukell an i vavarengro čingepen, kova hi har yek, kay taprell i djoukles pash i kanda.

18Har i baro dinelo, kay troul peste karye dell oun menshen moulo karye dell,

19yaake hi ko morsh, kay peskro males rhorhell, oun palle penell: Hoy krom, his sapaske.

20Kote, kay bouder kek kasht hi, kote djal i yag vin, oun kote, kay kek bouder hi, kay rhorhepen ap vavarende pre anell, kote djal o čingepen krik.

21Yaake har krell o kasht, te rhačell i yag doureder, yaake krell i morsh, hoy čingepen rodell, te djal o čingepen doureder.

22Kol laba kolestar, kay rhorhepen ap vavarende pre anell, hi har lačo rhapen, oun djan tele har djet.

23Har čare dran rhačedi čik, pral kolende roup maklo vas, yaake hi o mouy, hoy shoukar laba rakrella, hoy venn dran i čilačo dji.

24I midjak mensho hi pherdo rhorhepen. Kova khatrell lo pal shoukar laba.

25Te rakrell lo ninna yaake kamles, ma pats leske! Les hi efta bengeskro koova an leskro dji.

26Ninna te khatrell lo peskri rholi ap i vavarende pal shoukar laba, vell ko dives, kay dikell hakeno leskro čilačepen.

27Kova, kay i vavareske i grouba vin hadas, kova perell kokres dren. Oun yek, kay vitsrell i bar, ap koleste perell lo pale tele.

28Kova, kay rhorhepen rakrell, kamell o vavareske čilačepen te krell oun les doukrell. Oun kova, kay goudle labentsa rakrell, anell i bibarht.

← Chapter 25 Jump to: Chapter 27 →