Proverbs 13

Romani Sinte 2024 (O Debleskro Lab 2024 (Sinte-Manouche))

← Chapter 12 Jump to: Chapter 14 →

1I gosevo čavo shounell ap peskro dadeste, te penell yob leske, hoy lo gar mishto kras. I pre-phourdo sal oun shounell ninna gar, te vell lo trad dino.

2I lačo mensho djivell ko lačepastar, hoy dran leskre laba vella. I phoukepangre bokenna pal o kourepen.

3Kova kay ap peskro rakepen yak dell, kova dell yak ap peskro djipen. Koles i baro mouy hi, kova tserdell bibarht ap peste.

4Kova, hoy yek kamell, kay kamell gar te boudrell, vell les gar. Kolenge, kay boud boudrenn, hi doha koy.

5O rhorheno rakepen hi djoungeles glan i yaka kolestar, kay an o čačepen tardo hi. O čilačo krell praasedo koova oun vi-ladjedo koova.

6Lengro čačo koova anell kolen dran i bibarht vin, kay kek doosh ap lende hi. I doosh i čilačendar anell len an i bibarht.

7Kote hi yek, kay krell, har te vals lo bravelo. Oun les hi či. Oun kote hi yek, kay krell, har te vals lo čorvelo. Oun les hi boud bravlepen.

8I bravelo nay ginell peskro djipen vin. I čorveleste dell kek trad. Pash leste hi či te lell.

9Koon an o čačepen tardo hi, hi har i momeli, hoy barhteles rhačell, oun i čilačo har i momeli, hoy djal vin.

10Mank i pre-phourde hi hako tsiro čingepen. Te hal gosevo, moukeh touke čomone te penell.

11O bravlepen, hoy sik khetne lino vas, djal ninna sik pale krik. Kova, kay anell lokes peskre love khetne, lell boudeder oun boudeder.

12Te dikell yek i rah tsiro ap čomone, oun kova vell gar, vell leskro dji pharo. Te vell kova, ap hoy yek yaake rah dikas, palle djivell leskro dji pale pre.

13Koleske, kay i lačo lab i heryentsa stakrell, djal djoungeles. Koleske, kay rikrell pes ap ko lab, djal mishto.

14I laba, hoy i gosevo rakrell, hi har djipaskro pani, oun sikrenn havo drom yek hounte djal, te perell lo gar an o merepaskre shelle.

15Kol menshe, kay hayvenn, hoy hounte kerdo vell, hatsenn mala. I phoukepangre djan i drom, kay anell len an i bibarht.

16Hakeno, kay gosevo hi, krell či, te rakras lo gar peskro djiyeha pral kova. I dinelo mensho dell peskro narvlepen vin gole.

17I čilačo bičepaskro anell bibarht. I bičepaskro o labestar rakrell yaake, te vell lauter pale mishto.

18An čorvlepen oun ladj vell kova, kay moukell pes či te penell. An-diklo vell kova, kay shounell, te vell lo trad dino.

19Te vell kova, hoy yek yaake rah kamas, hi lo barhtelo. I dinele rhoyrenn pen, te hounte moukenn le pengro čilačo drom.

20Kova, kay khetne hi kolentsa, kay gosevo hi, kova vell ninna gosevo. Kova kay i maal hi i dinelentsa, kova vell bibarhtelo.

21Kolla, kay o Debleskro dromestar tele djan, kolen lell i bibarht palla oun taprell len. Kolla, kay an o čačepen tardo hi, lenn lačo koova.

22Kova, hoy i lačo morsh pale moukell, vell doureder dino leskre čavende oun čavengre čavende. O bravlepen kolestar, kay an o čilačepen djivas, lell kova, kay an o čačepen tardo hi.

23Boud djob vell bares ap i phoub i čorvelenge. Lengro čačepen lenn le gar, oun boud merenn i bokatar.

24I dad, kay peskro čaveste kek phagi dell, krell leske gar mishto. Koon les kamell o djiyestar, kova rikrell pes gar pale, te dell lo les i phagi.

25Koles, kay an o čačepen tardo hi, hi doha rhapaske. O per i čilačestar bokella.

← Chapter 12 Jump to: Chapter 14 →