Proverbs 18

Romani Sinte 2024 (O Debleskro Lab 2024 (Sinte-Manouche))

← Chapter 17 Jump to: Chapter 19 →

1Koon pes i vavarendar krik rikrella, rodell, hoy peske kokres shoukar hi, oun kamell gar dren te dikell, hoy lačo leske vals.

2I dinelo kamell či te hayvell, yob kamell te sikrell, hoy yob lauter djinell.

3Čilačepen oun ladj djan khetne. Oun kay ladj hi, koy i ninna praasepen.

4I laba i gosevo menshestar hi har telstoune panya, hoy nashenna an i phoub oun denn djipen.

5Hi gar mishto, te dell i čačepaskro morsh koles čačepen, kay i doosh ap peste anas, oun shounell gar ap koleste, kay an o čačepen tardo hi.

6Kova, hoy i dinelo rakrell, anell čingepen. Oun leskro mouy dell pal dava gole.

7O rakepen o dinelestar anell les an i bibarht. Oun yob taprell pes kokres an peskre laba.

8Te shounah djoungelo rakepen pral i vavarende, hi kova menge har shoukar rhapen, oun djal menge tele har djet.

9I či-moldo, kay kamell gar te boudrell, hi gar feteder har kova, kay marepen oun merepen anell.

10O baro Devel hi har i baro zorelo kheer. Kova, kay an o čačepen tardo hi, nashell pash leste oun khatrell pes pash leste.

11Glan i braveleskre yaka hi leskro bravlepen har i zorelo foro oun har i bari massouri troul leste.

12Pre-phourdepen vell glan o perepen. Kolenge, kay krenn pen gar bares, vell ko tsiro, kay sharenn len i vavar.

13Shoun! Oun palle rake! Te kreh vavarčandes, hal dinelo oun hounte ladjess tout.

14I mensho kay zorelo an peskro dji hi, nay hidjrell peskro nasslepen. Te hi leskro dji phagedo, har nay hidjrell lo peskro pharepen?

15I gosevo mensho kamell boud te djinell, oun krell peskre kanda pre, te hayvell lo, hoy čačo hi.

16I mensho, kay i vavaren shoukar koova dell, krell peske i voudya pre pash i pralstunende.

17An i čingepen dikell vin, har te vals koles čačo, kay glanstounes rakrell. Te vell palle o vavar, vell vin, kones čačepah čačes hi.

18Te čingrenn pen douy zorele, oun tikne kashta venn vitsedo, te vell diklo, kones čačo hi, djal o čingepen krik, oun yon moukenn pendar tele.

19I phraal, kay doukedo vas an peskro dji, moukell gar peha te rakrell, oun hi pandlo har i foro, kay hi i zoreli massouri troul leste. Oun o čingepen hi har ko kashteskro, hoy o foreskro voudar pandell.

20I morsh lell, hoy leskro mouy rakras. Dran leskre laba lell lo doha djipaske.

21Kol laba, hoy yek rakrell, nay anenn leske o merepen oun ninna o djipen. Oun kova, kay boud rakrell, dikella, hoy leskre laba leske dren anenn.

22Koon i romyat hatsas, hatsas i barht. O baro Devel dikas lačes ap leste.

23O čorvelo mangell o ropah, o bravelo rakrell pale i djiyeha, hoy hi har i bar.

24Dell mala, kay anenn tout an i bibarht. I čačo maal rikrell boudeder ap toute har i phraal.

← Chapter 17 Jump to: Chapter 19 →