Proverbs 30

Romani Sinte 2024 (O Debleskro Lab 2024 (Sinte-Manouche))

← Chapter 29 Jump to: Chapter 31 →

1Kolla hi laba, hoy rakras o Agour, koleskro dad o Yake his, dran Massa. Kava morsh penas: Me marom man tele, mo Devel, me marom man tele, mo Devel, oun djinau gar bouder doureder.

2Har i firho hom, oun menshengro gosvepen hi man kek.

3Kek sikras man har te vap gosevo, oun djinau či o Deblestar.

4Koon djas pre an o bolepen oun pale tele? Koon las o phourdepen an peskre vasta? Koon pandas i tsele panya an i baya? Koon penas, har dour i phoub te djal? Har kharell lo? Har kharell leskro čavo? Djineh tou kova?

5O Devel rikrell hako lab, hoy das lo. Yob rikrell peskre vasta pral kolende, kay venn pash leste, te dell lo yak ap lende.

6Čip kek lab pash kova pashel, hoy yob penas, te dell lo tout gar trad, oun hakeno dikell, kay hal i rhorheno.

7Mo Devel, douy koova mangau me toutar. De len mande yaake rah har djivau:

8Rike man pale, te rhorhap! Oun ma kre, te vap čorvelo oun vitar gar, te vap bravelo. De man kokres, hoy man hounte vell o djipaske.

9Te vals man boudeder har man hounte vell, nay penaus: “Koon hi o baro Devel?” Oun te vals man gar doha, nay čoraus oun anaus ladj ap miro Debleste.

10Ma an rhorhepen pre ap i boudepaskro pash leskro rayeste, te rakrell yob kek bibarht pral toute vin, oun tou hounte playsress koleske.

11Hi menshe koy, kay rakrenn pral pengro dad bibarht vin, oun penenn kek lačo lab pral pengri date.

12Hi menshe koy, kay an pengre yaka djoudjo hi, oun lengro djoungelo koova vas gar tele thodo.

13Hi menshe koy, kay patsenn pendar, har lačo yon hi, oun dikenn tele ap hako vavareste.

14Hi menshe koy, kolengre danda doukrenn har rhare oun činenn har čourya. Oun yon rhan i čorvelen an o them, oun kolen, kay lenge kek ap i rig vell.

15Hi menshe koy, kay hi har ko kirmo, hoy o rat piyell. Koles hi douy ča. Kolla kharenna: “De kay! De kay!” Triin hi koy, kay gar čalo venn, oun star penenn an kek tsiro: “Kanna hi man doha”:

16o moulengro them; o per i djouvyatar, kay lell kek čave; i phoub, kay gar boud brishin dell; oun i yag, hoy gar gole dell Kanna hi doha!.

17Kova, kay praasell peskro dades, oun kamell gar ap peskri date te shounell, koleske hounte dens i korake i yaka vin, oun i bare čirkle hounte rhans len.

18Triin koova hi mange yaake baro, te hayvau len gar. Oun o startestar djinau me či:

19O drom o baro čirklestar, har hadell lo pes an o bolepen; o drom o sapestar ap i bare barra; o drom foun i shiffo ap o baro pani; oun o drom o morshestar pash i terni djouvyate.

20I djouvel, kay rhorhell peskro romes oun sovell i vavareha, thovell pes pal kova oun penell: “Me krom kek čilačepen”, yaake har te rhals li oun thovals peske o mouy tele.

21Tel triin koova trissell i phoub, oun tel o starto rikrell li les gar vin:

22Tel i boudepaskro, kay i baro ray vas; oun tel i narvelo, kay bravelo vas;

23tel i čilači djouvel, kay vell romedino. Oun tel i boudepaskretsa, kay las koy platsa peskri rayetsa dren.

24Star firhe hi i tikneder ap kay phoub, oun hi gosveder har i goseve menshe:

25I kirya: Ninna te hi len kek zoor, anenn le pengro rhapen khetne an i niyal.

26I bergetikre shoshoya: Len hi vitar gar boud zoor oun krenn pengre khera an i bare barra.

27I stepangre: Len hi kek ray oun djan vin har kourepangre, kolenge penlo vas, har le hounte djan.

28I aideksa: Tou nay taprell lat i vastentsa, oun hatseh lat ninna an i zorele shoukar khera i bare rayendar.

29Triin hi, kay rayles pre stakrenn, oun o starto hi o rayleder:

30O levo, ko zorleder mank i firhende: Glan kekeste djal lo pale;

31o bashno, har djal lo pre-phourdemen trouyel; o morsh bouzni; oun o baro ray, har djal lo glan peskre lourdende.

32Te hals yaake dinelo, te hadal tout pre, oun lal tout čilačo koova glan, ač oun čip o vast ap tiro mouy!

33Te deh thoud, vell kolatar khil. Te deh yekes ap o nak, ratell kova. oun te moukeh i rholi vin, vell čingepen.

← Chapter 29 Jump to: Chapter 31 →