Proverbs 28

Romani Sinte 2024 (O Debleskro Lab 2024 (Sinte-Manouche))

← Chapter 27 Jump to: Chapter 29 →

1O čilačo hi ap o naashepen, ninna te lell les kek palla. Kova, kay an o čačepen tardo hi, hi har i terno levo oun darell či.

2Te hi boud čilačepen an o them, venn ninna boud raya pre. Te vell savo morsh o ray, kay djinell boud oun hayvell lauter mishto, palle hi o čačepen i rah tsiro an o them.

3I čorvelo morsh, kay vas baro oun rikrell i čorvelen tele, hi har depen, hoy lauter krik thovell oun o djob paash krell.

4Kolla, kay moukan o Debleskro drom, sharenn i čilačen. Kolla, kay djan ap o Debleskro drom, kourenn pen lentsa.

5Čilače menshe hayvenn gar, hoy o čačepen hi. Kolla, kay o baro Debles rodenn, kolla hayvenn lauter mishto.

6Hi feteder te hal čorvelo oun djiveh i djoudjo djipen, har te vals bravelo oun djals ap bange dromma.

7Kova, kay o Debleskro drom djal, hayvell, hoy mishto oun gar mishto hi. Kova, kay i maal kolentsa hi, kay či-molde hi, anell ladj ap peskro dadeste.

8Kova, kay bare love kolendar lell, kolen pash leste siyaan hi, oun krell pes koleha braveles, koleskro bravlepen lell savo mensho, koles i baro dji i čorvelenge hi oun lende dell.

9Kova, kay kamell či o Debleskro dromestar te djinell, oun palle mangell lo čomone o baro Deblestar, koleskro mangepen hi djoungelo glan o Debleskre yaka.

10Kova, kay anell o Debleskre menshen ap i čilačo drom, kova perell kokres an i grouba. Kolla, kay kek doosh ap pende anan, lenna lačo koova.

11O bravelo hi gosevo an peskre yaka, oun o čorvelo, kay čačepah gosevo hi, dikell, koon glan leste hi, oun perell gar ap leste dren.

12Te hi kolen penepaske, kay an o čačepen tardo hi, palle hi barhtelo tsiro. Te vell i čilačen penepaske, palle khatrenn pen i menshe.

13Kova, kay peskri doosh khatrell, kova vell gar dour an peskro djipen. Kova, kay penell, hoy lo kras, oun moukell peskri doosh, hatsell o Debleskro kamlepen.

14Barhtelo hi kova, kay hako tsireske o Debleha djivell! Kova, kay moukell peskro dji har i bar te vell, perell an i bibarht.

15I čilačo, kay hi o baro ray pral čorvele menshende, hi har i levo, hoy bares gole dell, oun har i divyo firho, hoy bokell ap peskro rhapen.

16I ray, kay hayvell gar mishto peskre menshentsa trouyel te djal, krell boud doosh. Koles, kay kamell gar rhorhepah braveles te vell, koles vell i lengsto djipen.

17I mensho, kay i vavares moulo das, kova ačell ap o naashepen, yaake rah har djivell lo. Kek te rikrell les pre!

18Kova, kay i djoudjo djipen djivell, vell vin lino dran i bibarht. Kova, kay ap douy dromma djal, perell ap yekeste.

19Kova, kay ap peskri phoub boudrell, les hi doha maro. Kova, kay či-moldo koova krell, vell čorvelo.

20I morshes o labestar hi barht an boud koova. Kova, kay kamell sik braveles te vell, anell ninna doosh ap peste.

21Te dikeh lačeder ap o braveleste har ap o čorveleste, hi kova gar mishto. I kotar mareske nay anell i morsh doosh ap peste.

22Koles, kay bok pal i love hi, nashell o bravlepen palla, oun djinell gar, te vell yaake o čorvlepen pral leste.

23Te peneh yekeske, hoy yob gar mishto kras, palle vell ko tsiro, kay parkrell lo pes pash toute. Oun kova boudeder, har te rakrals leske pal o mouy.

24Koon peskro dades oun peskri dat vi-randell oun penell kova hi kek doosh, savo hi gar feteder har i čorepaskro.

25Kova, kay bokell pal i love, savo anell čingepen pre. Kova, kay rikrell pes ap o baro Debleste, lell boudeder har doha te rhal.

26Dinelo hi kova, kay krell kokres, hoy peskro dji leske penell. Koon djivell gosvepah, vell dran i bibarht vin lino.

27Kova, kay dell i čorveleste, koles vell doha djipaske. Kova, kay yaake krell, har te dikell lo o čorveles gar, pral koleste rakrenn boud i bibarht vin.

28I čilače, te venn le raya, palle khatrenn pen i menshe. Yon te merenn, palle venn kolla boudeder, kay o čačepen krenn.

← Chapter 27 Jump to: Chapter 29 →