Proverbs 19

Romani Sinte 2024 (O Debleskro Lab 2024 (Sinte-Manouche))

← Chapter 18 Jump to: Chapter 20 →

1Hi feteder te hal an o čačepen tardo oun djiveh an čorvlepen, har te vess i dinelo, kay rakrell rhorhepen.

2Yek, kay peskro koova gar hayvell, hi či moldo, ninna te boudrell lo sik. Kova, kay sik nashell, perell.

3O mensheskro dinlepen anell les ap i drom, kay nashrell lo pes. Oun palle dell lo o baro Debleste i doosh.

4Bravele menshe hatsenn boud mala. I čorveleskre mala djan penge lestar.

5Kova, kay rhorhras, har penas lo, hoy lo dikas oun shounas, kova lell peskri phagi. Oun kova kay rhorhepen pre anas, kova vell tapedo oun nay nashell gar peske.

6Boud makenn o braveleske gvin troul o mouy, oun hakeno hi o maal kolestar, kay dell čomone čičeske.

7I phrala i čorvelestar kamenn či lestar te djinell. Oun har boud boudeder rikrenn pen leskre mala lestar krik. Te kamell lo lentsa te rakrell, hi le bouder gar koy.

8Kova, kay peske boud pashel anas, kras peske lačepen. Kova, kay lauter mishto hayvell, hatsell barht.

9Kova, kay rhorhras, har penas lo, hoy lo dikas oun shounas, kova lell peskri phagi. Oun kova hoy rhorhepen pre anell, kova nashrell peskro djipen.

10I lačo djipen hi gar i dinelenge. Har boud boudeder djal gar, te vell i boudepaskro o ray pral i pralstunende.

11Koles čačo gosvepen hi an o dji, kova vell gar sik rhoyedo, oun dikell gar ap i doosh i vavarendar. Doleske dikenn le pre ap leste.

12Har koy gole, hoy i levo dell, hi i rholi o baro rayestar. Oun leskro lačepen hi har o brishin ap i phoub, hoy krell lat pale sapeno.

13I dinelo anell peskro dades an i bibarht. Oun i djouvel, kay i tselo tsiro čingepen rodell, hi har i kheer, kay dren della.

14I kheer oun love lell o čavo peskro dadestar pal koleskro merepen. I romni, kay an peskro dji dikell, glan te rakrell li, vell o baro Deblestar.

15Kova, kay kamell gar te boudrell, vell khino. Moukell lo peskre vasta an i gali čiddo, vell ko tsiro, kay hounte bokell lo.

16Kova, kay rikrell pes ap o činlo lab, dell yak ap peskro djipen. Kova kay gar yak dell ap peskre dromma, merella.

17Kova, kay peskro dji pre krell oun i čorveles dell, kova hi har yek, kay patsals o baro Debleske. Oun o baro Devel dell les ko lačepen pale, hoy lo kras.

18Činge tiro čaveha yaake rah har yob terno hi, oun ap toute shounella. De yak, te dess les gar yaake, te merell lo.

19Kova, kay dran i bari rholi čomone kras, mouk les peskri phagi te lell. Veh tou ap leskri rig, hounte kress tou kova pale te pale.

20Shoun ap kova, hoy yek ap toute penell, oun mouk touke čomone te penell, te vess pal kova gosevo.

21Boud koova hi, hoy i morsh peske glan lell an peskro dji; kokres kova vella, hoy o baro Debles glan hi yekeha.

22Kova, hoy i mensho rodell, hi kamlepen. Hi feteder te hal čorvelo har te vals i rhorheno.

23Te djiveh o baro Debleha, hi tout o djipen: tout hi doha rhapaske; tou nay soveh mishto; kek bibarht vell ap toute.

24I či-moldo, kay kamell či te krell, čivell peskro roy an o čaro, oun anell peskro vast gar pash o mouy.

25Te deh tou yekes, kay pral halauter sal, palle venn kolla gosevo, kolen či an o shero hi. Oun te čingreh koleha, kay hayvell, hoy mishto oun gar mishto hi, palle hayvell lo gomme boudeder.

26Kova, kay peskro dades dell oun peskri dat tradell, kova hi i čavo, hoy ladj ap peste oun lende anell.

27Miro čavo, te moukeh touke či bouder te penell, palle djineh tou sik bouder gar, hoy čačo hi.

28Yek, kay hounte penell, hoy lo dikas oun shounas, oun kay či moldo hi, leske hi o čačepen sapaske. Oun čilače menshe rhan o čilačepen har maro.

29Pral kol pre-phourden, kay pral halauter sanenn, vell i phagi vin rakedo; oun dava ap o doumo lell o dinelo.

← Chapter 18 Jump to: Chapter 20 →