Proverbs 24

Romani Sinte 2024 (O Debleskro Lab 2024 (Sinte-Manouche))

← Chapter 23 Jump to: Chapter 25 →

1Ma zilve ap čilače menshende, ma rode lengro maal te vell!

2Lengre djia lenn penge savo koova pherdo marepen glan, oun hoy le rakrenn, anell bibarht.

3Tout hounte vell gosvepen, te čivess i kheer pre, oun tou hounte hayvess mishto, hoy te kress, te ačell ko kheer zoreles tardo.

4Koon boud djinell, kova hayvell, har te krell lo peskre tsele iseme pherdo kouč shoukar koova.

5I gosevo morsh hi har i zorelo, oun yek, kay boud djinell, an koleste hi pherdi zoor.

6Te kamell lo i kourepen te krell, hounte hayvell lo mishto, har te djal glan. Oun kote, kay boud morsha pengro gosvepen khetne čivenn oun pral rakrenn, hoy mishto vals, djal lengro kourepen mishto.

7I dinelo hayvell gar goseve laba. Kote, kay i čačepangre khetne venna, nay krell lo peskro mouy gar pre.

8Kova, kay peske glan lell te krell lo čilačo koova, koles denn le čilačo bedo gole.

9Kova, kay moukell pes či te penell, lell peske savo koova glan, hoy anell les o Debleskro dromestar tele. Oun i menshe dikenn rhoyedes ap koleste, koles i pre-phourdo dji hi.

10Kova hi gar zorelo, kay an phare tsirya gar zoreles tardo hi.

11Dja oun le kolen dran o merepen vin, kay venn pandles ap koy platsa tserdedo, kay venn le maredo. Rike kolen pale, kay koy djan.

12Te peneh tou: Mer djinam kova gar! Palle djiness: Kova, kay an i djia dikell, hayvell les. Oun kova, kay ap tiro djipen yak dell, kova djinell les. Oun yob dell o menshes kova pale, hoy lo kras.

13Rha gvin, miro čavo! lačo hi lo, oun goudlo an tiro mouy.

14Yaake hi o gosvepen lačo tiro djipaske. Te hatsal les, palle hi tout i lačo djipen glan toute, oun kova vella, hoy o djiyestar kamal.

15Ma loure har i čilačo ap o kheer kolestar, kay an o čačepen tardo hi! Ma de koy platsa khetne, kay čivell lo pes sopaske!

16Kova, kay an o čačepen tardo hi, nay perell efta kope, hako kopo stell lo pale pre. I čilače perenn an i bibarht.

17Te perell kova, kay touke čilačepen kamell, ma ab barhtelo! Tiro dji te sal gar pral leskri bibarht!

18O baro Devel nay dikals kova i rholyah, oun palle rissrals lo peskri rholi kolestar tele!

19Ma ab rhoyedo ap kolende, kay midjak koova krenn! Ma zilve ap i čilačende!

20Kolenge, kay čilačo hi, vell kek lačo tsiro. Lengro djipen hi har i momeli, hoy djal vin.

21Miro čavo, djib glan o baro Debleskre yaka oun kre, hoy o baro ray toutar kamella! Ma dja kolentsa, kay vavaren ap lende pre anenn!

22Sik vell i bibarht pral savende. Nay djineh tou, havi bibarht o baro Deblestar oun o baro rayestar nay vell?

23Ninna kolla hi laba, hoy i goseve penan: Kova hi gar mishto, te dikenn i čačepangre morsha yekes feteder an har o vavares.

24Kova, kay ap koleste penell, kay doosh ap peste las tout hi kek doosh, koles praasenn i menshe oun rakrenn i bibarht vin pral leste.

25Kol čačepangre morsha, kay djan pal o čačepen, kolenge djal mishto. Oun bari barht vell ap lende.

26Te deh tou i lačo lab pale, hi kova har te dess i čoum.

27Dja vin ap tiri phoub oun kre tiri boudi! Pal kova le i romni, te vell tout i familya!

28Ma an rhorhepen pre ap i vavareste! Pen o čačepen!

29Ma pen: “Yaake har yob mange kras, krau me leske ninna. Hakeneste dau pale, har yob mange kras.”

30Me djom glan vergel ko kotar phoub savestar, kay kamell gar te boudrell, oun dikom i drakengro them yekestar, koles či an o shero hi.

31Oun soubyengre bourra his koy tardo oun lauter djoungelo zenlepen, oun i massouri troul ko kotar them his tele peredo.

32Oun me dikom kova, oun moukom les an miro dji te djal; oun kova sikras mange:

33Te kameh o sopen oun pandeh i yaka oun čiveh i vasta an i gali oun kreh či,

34palle vell o čorvlepen lengste heryentsa pral toute. Oun tout venn phare tsirya.

← Chapter 23 Jump to: Chapter 25 →