Proverbs 17

Romani Sinte 2024 (O Debleskro Lab 2024 (Sinte-Manouche))

← Chapter 16 Jump to: Chapter 18 →

1I trouk kotar maro oun kek čingepen hi feteder har i kheer pherdo mass o čingepah.

2I boudepaskro, kay djinell, hoy te krell, kova vell o ray pral o čaveste ko kherestar, kay ladj ap peste anas. Ko boudepaskro lell palle ninna kolestar, hoy i čave lenna pral pengro dadeskro merepen.

3Yaake har o roup an i yag čiddo vell, oun o sonakay an i bob, yaake lell o baro Devel i menshengre djia an o yak.

4Kova, kay čilačo koova krell, shounell ap midjak rakepen. Oun i rhorheno shounell ap save laba, hoy bibarht anenn.

5Kova kay pral i čorveleste sal, kova praasell koles, kay les kras. Kova, kay barhtelo hi pral o vavareskri bibarht, savo lell peskri phagi.

6Čavengre čave hi har i rayeskri stadi i phourenge. Oun i čave sharenn pen pengro papeha oun pengri mami.

7Kova djal gar, te krenn i narvele bare oun shoukar laba. Vitar gar djal, te rakrell i an-diklo morsh rhorhepen.

8Kova, kay vavaren čorrhanes love dell, te krenn le, hoy yob kamell, an koleskre yaka hi peskre love har dourkepangre barra, hoy anenn leske barht an hako koova.

9Kova, kay i doosh i vavarendar bistrell, krell peske mala. Kova, kay pale te pale pral koy doosh rakrell, nashrell peskre malen.

10Te čingreh yekeha, kay moukell pes čomone te penell, lell yob kova peske boudeder an o dji, har te dell yek sheel kope an i dineleste dren.

11I čilačo mensho rodell hako tsiro čingepen. Doleske vell yek pash leste bičedo, ko dell les i phari phagi.

12Hi touke feteder, te vess pash i bari divyi margodja, kolake i terne krik lino van, har te vess i dineleha khetne, kay narvelo koova krell.

13Koleske lačepen kerdo vas, oun yob čilačepen pale das, dran koleskro kheer djal i bibarht bouder gar krik.

14Mouk tele o čingepah yaake rah har lo gomme tikno hi! Čingepen hi har pani, hoy dran i phoub vin phagell. Mouk tele glan kova yob zorleder vell!

15Kova hi douy kope i djoungelo koova glan o baro Debleskre yaka: te rakrell yek koles čačes, kay doosh ap peste las, oun ninna, te čivell yek doosh ap koleste, kay o čačepen kras.

16Hoske hounte dals i dinelo love vin, te nay djal lo an i sikepaskri? Leske djal či an leskro shero.

17I maal sikrell hako tsiro pengro kamlepen. Oun i phraal vell boldo, te vell lo touke ap i rig an phare tsirya.

18Narvelo hi kova, kay dell peskro dadeskro vast oun penell, te playsrell lo i siyaan i vavareske.

19Kova, kay čingepen kamell, kova kamell ninna o čilačepen. Kova kay hadell pes kokres pral, nay perell sik.

20Yek douy djiyentsa hatsell kek lačepen. Oun yek douy čipyentsa perell an i bibarht.

21Kones i čavo hi, hoy narvelo koova krell, koles hi i pharo djipen. I dineleskro dades hi či sapaske.

22I barhtelo dji hi mishto tiro sastepaske. Te hi touke hako tsiro ropaske, nashreh tiri zoor.

23O čilačo kamell i love, hoy leske čorrhanes dino vell, te rissrell lo o čačepen trouyel.

24Kova, kay hayvell, hoy mishto oun gar mishto hi, moukell pes gar tele te rikrell, te lell lo gomme boudeder gosvepen. I dinelo dikell kate te kote.

25I dinelo čavo krell peskro dadeske rholi. Oun leskri date vell ropaske pral leste.

26Kova hi gar mishto, te lell kova i phagi, kay kek doosh ap peste anas. Gomme djoungleder hi, te rhal i an-diklo mensho dava.

27Kova, kay peskre laba pale rikrell, sikrell, te djinell lo, hoy mishto hi. Kova, kay gar sik an i rholi vell, sikrell, te hi lo gosevo.

28Ninna i dinelo, kay rikrell peskro mouy, nay vell yaake an-diklo, har te vals lo gosevo. Te krell lo peskro mouy gar pre, hi lo i vavarenge har i gosevo.

← Chapter 16 Jump to: Chapter 18 →