Proverbs 15

Romani Sinte 2024 (O Debleskro Lab 2024 (Sinte-Manouche))

← Chapter 14 Jump to: Chapter 16 →

1I kamlo lab krell te djal o vavareskri rholi pale. I lab, hoy o vavares doukrell, krell les rhoyedo.

2O gosevo rakrell yaake, te hayvenn i vavar, hoy mishto hi. Dran o narveleskro mouy vell či har dinlepen.

3I yaka o baro Deblestar dikenn lauter, kova, hoy i čilače krenna, oun kova, hoy i lače krenna.

4I lačo lab, hoy i vavares zoor dell, hi har o rouk, hoy djipen della. I midjak lab phagell leskro dji.

5O dinelo shounell gar ap leskro dadeste, te dell lo les trad. Kova, kay shounell koy pre, hi gosevo.

6Kova, kay an o čačepen tardo hi, les hi boudeder har les hounte vell djipaske. Kova, hoy i čilačo khetne lell, anell leske bibarht.

7I gosevengro rakepen sikrell i vavarende, hoy lenge mishto hi. Kova, hoy i dinelen an o shero hi, hi či moldo.

8O baro Devel dikell rhoyedes ap kova, hoy o čilačo leske anell. Te mangenn les kolla an, kay an o čačepen tardo hi, dikell lo lačes ap lengro mangepen.

9O baro Devel dikell rhoyedes ap kova, hoy i čilače krenn. Koon peskro tselo djiyeha o čačepen krell, koles kamell yob.

10Kolla, kay o Debleskro drom moukenn, lenn i phari phagi. Koon moukell pes či te penell, hounte merell.

11O baro Devel djinell, hoy hi an o telstunepen oun an o moulengro them. Har boud boudeder djinell yob, hoy an i menshengre djia hi.

12O pre-phourdo rhoyrell pes pral koleste, kay leske penell, hoy lo gar mishto kras. Oun yob djal gar pash kolende, kay gosevo hi.

13I barhtelo dji moukell o mouyes te sal. Kones i pharo dji hi, koles hi či sapaske.

14Yek, kay hayvell, hoy mishto oun gar mishto hi, kova rodell, har te djinell lo gomme boudeder. O narvelo bokell pal dinelo koova.

15Kolen, kay i pharo dji hi, kolenge hi hake divessa čilače. Yekes, kay shoukapen an o dji hi, leskro dji givell oun bashrell hako dives.

16Hi feteder, te hal čorvelo oun djiveh o baro Debleha, har te hi tout i baro bravlepen oun hounte daress halautereske.

17Hi feteder te hi tout sharha te rhal tire malentsa, har lačo groumyengro mass kolentsa, kay hi rholi an lende.

18I morsh an koleste rholi hi, anell čingepen. Yek, kay gar sik rhoyedo vell, kova lell i yag dran o čingepen.

19O drom kolendar, kay kamenn gar te boudrell, hi pherdo soubyengre bourra. Kolenge, kay o čačepen krenn, hi kek barra an o drom čiddo.

20I gosevo čavo krell peskro dades oun peskri dat barhteles. I dinelo sal pral lende.

21Kones či an o shero hi, kova kamell narvelo koova. I morsh, kay hayvell, hoy mishto oun gar mishto hi, ačell ap o čačo drom.

22Kova, hoy yekes an o shero hi, djal gar mishto, te poučell lo gar i vavarendar, hoy yon patsenna. Kote, kay boud menshe hi, kay denn pengro gosvepen pashel, kote djal mishto.

23Barhtelo hi o morsh, te djinell lo, hoy te rakrell lo. Har lačo hi o čačo lab ap o čačo tsiro.

24Kova, kay hayvell, hoy mishto oun gar mishto hi, koleske djal peskro drom pre an o djipen. Oun yob rikrell pes pale o dromestar, kay djal tele pash i moulende.

25O baro Devel phagell o kheer kolestar, kay pre-phourdo hi. Yob dell yak, te lell kek koy phoub i romyatar krik, kolakro rom meras.

26O baro Devel dikell rhoyedes ap ko midjak koova, hoy lell pes i čilačo glan. Lačes dikell lo ap koleste, kay rakrell lače laba.

27Koon rhorhepah peskro bravlepen khetne lell, anell peskri familya an i bibarht. Koon moukell pes gar te ginell, savo djivell.

28Koon an o čačepen tardo hi, rakrell peskro djiyeha glan kova yob čomone penell. Dran o mouy o čilačestar venn čilače laba vin har divyo pani.

29O baro Devel hi dour krik kolendar, kay čilačo hi. Yob shounell kova, hoy kolla lestar mangenna, kay an o čačepen tardo hi.

30Te dikeh lačes ap yekeste, vell lo barhtelo. Te peneh leske i lačo lab, vell lo zorelo.

31Te shouneh ap yekeste, kay penell touke, hoy touke mishto hi, palle hal mashkral i gosevende.

32Koon gar shounell, te vell lo trad dino, činell pes an peskro mass. Koon moukell pes čomone te penell, kova vell gosveder.

33Kolla, kay djivenn o baro Debleha, dikenn dren, hoy lenge mishto hi, oun venn gosveder. Kolenge, kay krenn pen gar bares, vell ko tsiro, kay sharenn len i vavar.

← Chapter 14 Jump to: Chapter 16 →