Proverbs 9

Romani Sinte 2024 (O Debleskro Lab 2024 (Sinte-Manouche))

← Chapter 8 Jump to: Chapter 10 →

1O gosvepen hi har i djouvel, kay moukas efta bare pesse kashta te činell oun pre te čivell, oun peskro kheer ap lende te krell.

2Yoy maras i groumyat, kras i mool mishto, oun čivas čare, khore, čourya ap i rhapaskri.

3Palle bičras li djouvyengre boudepangre ap i pralstouni platsa an o foro, te denn le gole:

4“Kones či an o shero hi, kova vell kate pash mande!” Ap o narveleste, penell li:

5Ab, rha miro maro oun pi i mool, hoy me krom!

6Ma dja kolentsa, kolen či an o shero hi! Palle djiveh. Dja kolentsa, kay goseve hi!

7Te kameh i pre-phourdes čomone pashel te anell, palle praasell lo tout. Te peneh i čilačeske, te kras lo, hoy gar mishto hi, palle doukell lo tout.

8Te peneh i pre-phourdes, kay kova, hoy lo kras, gar mishto hi, palle vell lo rhoyedo ap toute. Te peneh i goseves, kay kova, hoy lo kras, gar mishto hi, palle kamell lo tout.

9Pen i goseveske kova, hoy yob gar mishto kras! Palle vell lo gomme gosveder. An koleske čomone pashel, kay an o čačepen tardo hi! Palle djinell lo gomme boudeder.

10Glan halauter hounte djivess o baro Debleha, te kameh goseves te vell. Te prindjreh koles, kay o čačo Devel hi, hal tou čačepah gosevo.

11Me, o gosvepen, dau tout i lengsto djipen, krau, te djiveh boud bersha.

12Te hal gosevo, hi kova touke boud moldo. Te hal pre-phourdo, hounte hidjress kokres, hoy kova touke anell.

13O dinlepen hi har i narveli, bipandli djouvel, kolat či an o shero hi.

14Glan o voudar peskro kherestar hi li beshdo, pral ap i platsa an o foro.

15Oun penell ap hakeneste, kay koy djal oun ap o čačo drom hi:

16“Koles či an o shero hi, kova vell pash mande!” Oun ap koleste, kay narvelo hi, penell li:

17“Čoredo pani hi goudlo! Oun maro, hoy rhah khatedo, hi o lačeder!”

18Oun yob djinell gar, te hi kote i moule. Kolla, kay pash late venn, hi ap ko drom, kay an o merepen djal.

← Chapter 8 Jump to: Chapter 10 →