Proverbs 12

Romani Sinte 2024 (O Debleskro Lab 2024 (Sinte-Manouche))

← Chapter 11 Jump to: Chapter 13 →

1Koleske, kay kamell gosevo te vell, hi shoukar, te vell leske penlo, hoy lo gar mishtes kras. Kova, kay moukell pes či te penell, ačell dinelo.

2Ap i lačo mensheste dikell o baro Devel lačes. Pral koleste, koles o čilačepen glan hi, rakrell lo i phagi vin.

3O čilačepen dell kekes i zoor, te ačell lo zoreles tardo. Kova, kay an o čačepen hi, ačell zoreles tardo har i rouk bare drabentsa.

4I romni, kay peskri boudi mishto krell, hi peskro romeske har shereskro sonakay. I romni, kay anell ladj ap peskro romeste, hi har i djoungelo nasslepen an leskre kokale.

5O Debleskre menshe kamenn o čačepen te krell. Čilače menshen hi či an o shero har rhorhepen.

6I čilačengre laba kamenn yekes an o merepen te anell. O rakepen kolendar, kay o čačo drom djan, lell len dran o merepen vin.

7I čilače venn tele vitsedo oun hi gar bouder koy. O kheer kolendar, kay an o čačepen tardo hi, ačell tardo.

8Kones gosevo koova an o shero hi, kova vell sharedo. Kones dinelo koova an o shero hi, ap koleste dikenn le tele.

9Hi feteder, te hi yek čorvelo oun hounte djal ap i boudi, har te krell pes yek bares oun les hi gar doha rhapaske.

10Kova, kay an o čačepen tardo hi, les hi i dji peskre firhenge. I čilačen hi kek dji lenge.

11Koon ap peskro kotar phoub boudrell, koleske vell boud maro. Koon savo koova pal nashell, hoy či moldo hi, kova hi narvelo.

12Čilače menshenge hi shoukar, te krenn le midjak koova. Kolla, kay an o čačepen tardo hi, hi zoreles tardo oun krenn lačo koova.

13O čilačo taprell pes kokres an peskre rhorhene laba. Kolla, kay an o čačepen tardo hi, venn vin dran i bibarht.

14Koon lačepen rakrella, djivell ninna lačes. I mensho lell pale, hoy lo peskre vastentsa krell.

15O drom, kay o dinelo djal, hi an leskre yaka čačo. I gosevo mensho shounell ap kova, hoy vavar leske penenn, te krell lo.

16Koon peskri rholi sik sikrell, hi dinelo. Koon krell, har te shounals lo o praasepen gar, kova hi gosevo.

17I morsh o labestar rakrell o čačepen vin. I rhorheno, kay dell glan, te penell lo, hoy lo dikas oun shounas, anell rhorhepen pre.

18Laba, hoy sik vin rakedo venna, nay denn čourye har i rharo. O rakepen i goseve menshendar anell sastepen.

19O čačo rakepen ačell hako tsireske. Rhorhene laba rikrenn gar rah.

20Rhorhepen hi an i djia kolendar, kay čilačo koova vin krenn. Kolla, kay yaake rakrenn, te vell kek čingepen pre, venn barhtelo.

21Kek čilačo koova vell ap kolende, kay an o čačepen tardo hi. Ap i čilačende vell boud bibarht.

22O baro Devel dikell rhoyedes ap kolende, kay rhorhenna. Lačes dikell yob ap kolende, kay krenn o čačepen.

23Yek, kay gosevo hi, sikrell gar, har boud yob djinell. I dinele denn pengro dinlepen vin gole.

24Koon boud boudrell, vell o ray pral vavar. Koon peskre vasta an i gali čiddo moukell, vell i boudepaskro, oun hounte boudrell tel dava.

25I pharo dji tserdell i menshes tele. I lačo lab krell les barhtelo.

26Kova, kay an o čačepen tardo hi, hatsell peskro drom. I čilačen anell pengro drom kote, kay djan le nashedo.

27Koon peskre vasta an i gali čiddo moukell, hatsell či, hoy yob nay rhals. Koles, kay boud boudrell, hi boud rhapaske.

28O djipen hi kote, kay djan le ap o čačo drom. Kava drom hi mishto kerdo oun anell gar an o merepen.

← Chapter 11 Jump to: Chapter 13 →