Proverbs 23

Romani Sinte 2024 (O Debleskro Lab 2024 (Sinte-Manouche))

← Chapter 22 Jump to: Chapter 24 →

1Te vell, te beshess pash i rayeste ap i rhapaskri, palle biste gar, koon glan toute beshdo hi.

2Ma pere pral o rhapen, har bari ninna tiri bok hi.

3Mouk tiro dji gar pal leskro lačo rhapen te nashell! Kova nay vell i rhorheno rhapen.

4Ab yaake gosevo, te maress tout gar tele, bravelo te vell.

5Te dikeh tire yakentsa pre, hi o bravlepen gar bouder koy, yaake sik hi lo krik har i čirklo, hoy hadell peskre moussya oun hadell pes an o bolepen.

6Ma rha ko maro, hoy i činlo toute dell. Mouk tiro dji gar pal leskro lačo rhapen te nashell!

7Les hi douy djia. Ap toute penell lo: “Rha oun pi”, an leskro dji kamell lo toute či te dell.

8Kova, kay tou tele dandral oun rhal, koles hounte čadess tou pale vin. Oun tire lače laba his čičeske.

9Ma rake an i kanda i dinelestar! Ap tiro gosvepen dikell yob tele.

10Ma čip kol phoure barra krik, hoy sikrenn, har baro tiro them hi. Ma le i phoub kol čavendar krik, kolen kek dad bouder hi.

11O baro Devel vell lenge zoreles ap i rig, oun lell lengro koova an o vast, oun krell o čačepen pral toute vin.

12De yak ap kova, hoy tiro sikepaskro touke penell, oun shoun ap kova, hoy mishto oun čačo hi.

13Ma rike tout pale, te dess tiro čaves i phagi. Te deh les o kashteha, merell lo kolestar gar.

14Tou deh les o kashteha, oun rikreh les yaake pale, ap o merepaskro drom te vell.

15Miro čavo, te hi tiro dji čačes gosevo, palle hi miro dji ninna barhtelo.

16Te rakreh, hoy mishto hi, sal miro dji.

17Ma zilve ap kolende, kay o Debleskro drom moukan. Hako dives de yak, te djivess o baro Debleha.

18Palle hi tout i lačo djipen glan toute, oun kova vella, hoy tou o djiyestar kamal.

19Shoun, miro čavo oun ab gosevo, oun dja o djiyestar o čačo drom!

20Ma ab mank kolende, kay pen mates piyenn, vitar gar mank kolende, kay boudeder mass an pende dren rhan har mishto hi.

21Ko pipaskro oun ko rhapaskro venn čorvelo, oun kolenge, kay kamenn gar te boudrell, vell ko tsiro, kay hi len či te rivell har koola hoy paash hi.

22Shoun ap tiro dadeste oun tiri date! Yon dan tout o djipen. Ma dik tele ap lende, te van le phouro.

23Mouk touke o čačepen oun o gosvepen boud moldo te vell! Mouk touke hako tsiro čomone te penell, te hayvess lauter mishto.

24Barhtelo hi i dad, te hi leskro čavo an o čačepen tardo oun les i gosevo dji hi.

25Doleske kre tiro dades oun tiri day barhteles! Kre, te givenn le i barhtyatar pral toute.

26Miro čavo, kre tiro dji mange pre, oun dja ap mire dromma!

27Ma dja pash i loubyate, vitar gar pash o vavareskri romyate. Kolla hi har i brounna, hoy dour tele djal, kay veh gar bouder vin.

28Yon hi har čorepangre, kay lourenn khatemen pash o drom, oun anenn boud morshen yaake dour, te rhorhenn le pengre romyen.

29Koneske hi ropaske? Koneske djal djoungelo? Koon krell čingepen? Koon hi bibarhtelo? Kones hi douk kek nasslepah? Kones hi mate yaka?

30Kova hi kolla, kay dour an i rati gomme pash i mool beshdo hi, oun zorelo vavar pipen khetne čorenn oun piyenn.

31Ma dik i mool an, te hi li yaake shoukar loles an o khoro, oun djal tele har djet.

32O vavar dives djal touke yaake, har te dandrals tout i čilačo sap.

33Tire yaka dikenn kova, hoy gar koy hi. Oun tiro dji penell touke dinelo koova.

34Oun tou hal har yek, kay hi čiddo an i shiffo, hoy djal pral oun tele ap o baro pani, oun har savo, kay hi kote beshdo pral pre ap o pesso kasht.

35Palle peneh: “Mange hi, har dans le man, ninna te hayvom kek douk, har te marans le man khetne, ninna te doukell mange či. Te hom vi-sodo, palle djau pale koy.”

← Chapter 22 Jump to: Chapter 24 →