bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Romani
/
Romani Sinte 2024 (O Debleskro Lab 2024 (Sinte-Manouche))
/
Proverbs 31
Proverbs 31
Romani Sinte 2024 (O Debleskro Lab 2024 (Sinte-Manouche))
← Chapter 30
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
1
Kolla hi i laba, hoy rakras i day o baro rayestar Lemouel ap leste. O Lemouel his o baro ray pral Massa.
2
Miro čavo, koles me ap i phoub anom, tou, ko čavo, koles o Deblestar mangom, hoy penap touke?
3
Ma de tiri zoor i djouvyenge! Ma dja ko drom, ap koleste i bare raya nashedo djan.
4
Ma pi tout mates! Mool oun rhačedo pipen hi či bare rayenge oun pralstunenge.
5
Te piyenn le, nay bistrans le, hoy o Devel lendar kamell, oun dikenn bouder gar koy pre, te lenn i čorvele pengro čačepen.
6
Denn zorelo pipen kolenge, kay ap o merepen čiddo hi, oun mool kolenge, kay lenge ropaske hi.
7
Save nay piyenna, te nay bistrenn le pengri bibarht oun kova, hoy lengre djia doukrell.
8
Kre tou tiro mouy pre kolenge, kay gar nay rakrenna, hakeneske, koles gar i zoor hi, te anell lo peske kokres peskro čačepen dren.
9
Kre tiro mouy pre, kre o čačepen yaake vin, te lell hakeno peskro čačepen, ninna i čorvele oun bibarhtele.
10
I lači romni, koon hatsell lat? Yoy hi boudeder moldo har kouč barra.
11
Lakro rom nay patsell lat oun djinell, te rikrell li pash leste. Oun dran kova hoy les hi, krell li gomme boudeder.
12
Yoy krell leske lačepen oun kek čilačepen, yaake rah har djivell li.
13
Yoy lell bakrengro bal oun layntikre thaba, oun boudrell barhteles peskre vastentsa.
14
Yoy anell rhapen khetne foun doural har i shiffo, hoy paredo koova anell.
15
Yoy stell pre, kote hi gomme rati, oun krell o rhapen peskro khereske, oun penell i djouvyenge, kay lake boudrenn, hoy te krenn le.
16
Yoy rodell i harhetikri phoub oun ginell lat, oun kol loventsa, hoy lakre vasta dren anan, čivell li terne drakengre rouka an i phoub.
17
Yoy boudrell phares oun krell peskre moussya zoreles.
18
Yoy hayvell, te anell lakri boudi čomone dren. Ninna rati djal pash late i momeli gar vin.
19
Yoy lell koy thabeskri spindla an o vast, oun krell peskre thaba.
20
Yoy krell peskro vast pre i čorvelenge, oun dell kolende, kolen gar doha hi.
21
Yoy darell gar peskro khereske, te vell o vend. Hakenes an lakro kheer hi tate koola.
22
Plarhte krell li peske, rido hi li an lačo layntikro than oun lolo bakrengro bal.
23
Lakro rom hi an-diklo an o foro, te rakrell lo pes tele i phourentsa.
24
Kouč gada krell li oun bikrell len, oun i parepangre lenn latar kol pereskre dorya, hoy yon bikrenn.
25
Yoy hi zorelo oun an-diklo, oun yoy darell gar o tsirestar, hoy vella.
26
Lakro rakepen hi pherdo gosvepen, oun lače labentsa sikrell li, har čomone djal.
27
Yoy dikell pal lauter, hoy an o kheer kerdo vell. Oun ko mareske, hoy li rhal, boudras li.
28
Lakre morsh čave stakrenn glan oun sharenn lat. Oun lakro rom sharell lat kal labentsa:
29
“Boud romya hi boud moldo, tou hal i lačeder lendar lauterendar!”
30
O shoukapen ačell gar, oun i shoukar djouvel vell ninna phouro. I romni, kay djivell o baro Debleha, kolat sharenn le.
31
Parkrenn t'men pash late lautereske, hoy yoy kras! Givenn kolestar ap i platse an o foro!
← Chapter 30
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31