Proverbs 29

Romani Sinte 2024 (O Debleskro Lab 2024 (Sinte-Manouche))

← Chapter 28 Jump to: Chapter 30 →

1Koon moukell pes či te penell, oun djal hako tsiro pal peskro shero, savo vella ap yek kopo phagedo, oun kek hi palle koy, kay hadell les pale pre.

2Te hi boud menshe koy, kay an o čačepen tardo hi, palle hi i tsele menshe barhtelo. Te hi i čilačo o ray pral lende, palle hi i tsele menshenge ropaske.

3Kova, kay kamell o gosvepen, krell peskro dades barhtelo. Kova, kay pes loubyentsa dren moukell, nashrell peskro bravlepen.

4I baro ray, kay rikrell pes ap o čačepen, kova krell, te djal o themeske lačes. Kova, kay lell boud themeskre love peskre menshendar, kova krell o them paash.

5Kova, kay makell i vavareske gvin troul o mouy, kova čivell i netsa khatedo vin glan koleskre pire.

6I čilačo taprell pes an peskro čilačepen. Kova, kay an o čačepen tardo hi, djal barhteles peskro drom.

7Kova, kay an o čačepen tardo hi, kova dell ninna yak, te lell o čorvelo peskro čačepen. I čilače djinenn gar, hoy čačo hi.

8Kol pre-phourde, kay djinenn lauter feteder, krenn i tselo fores divyes. I goseve hayvenn, har te lenn le lengro čingepen krik.

9Te vell i gosevo khetne i dineleha pash o čačepaskro morsheste, te vell o čačepen vi-kerdo, palle vell o dinelo divyo oun sal. Či dikell lo dren.

10I marepangre hi rhoyedo pral koleste, kay kek doosh ap peste anas. Kolla, kay an o čačepen tardo hi, denn yak ap koleskro djipen.

11I dinelo rikrell peskri rholi gar pale. I gosevo hi o ray pral peskri rholi.

12I ray, kay ap rhorhene laba shounella, koleskre boudepangre venn lauter rhorhene.

13O čorvelo oun kova, kay les tele rikrell, kol douyen hi yek koova khetne: Kol douyende das o baro Devel yaka.

14I baro ray, kay dell i čorvelen lengro čačepen, ačell ray i rah tsiro.

15Te lell i čavo i phagi oun vell leske penlo, hoy lo gar mishto kras, palle vell lo gosevo. I čavo, kay ap peste kokres yak hounte dell, savo anell ladj ap peskri date.

16Kote, kay boud čilače hi, kote hi ninna boud doosh. Vell ko tsiro, kay dikenn kolla, kay an o čačepen tardo hi, har i čilače perenn.

17Sike tiro čaves zoreles, hoy lo gar mishto kras. Palle krell lo tout barhtelo. Oun tou hounte ladjess leske gar.

18Te hi kek Debleskro rakepen koy, palle venn i menshe divyo oun bipandlo. Barhtelo hi kova, kay shounell ap o Debleskre laba.

19I labentsa moukell pes o boudepaskro či te sikrell. Ninna te hayvals yob, rikrell lo pes gar ap kova.

20Dikeh tou i morshes, kay sik ap o rakepen hi, i dineleske nay djal feteder har saveske.

21Te deh tou tiro boudepaskres lauter, hoy kamell lo, foun tiknes pre, palle vell ko dives, kay shounell lo bouder gar ap toute.

22I morsh, kay hako tsiro an i rholi hi, savo krell čingepen, oun anell boud doosh ap peste.

23O pre-phourdepen i menshestar krell, te perell lo. Kova, kay hadell pes gar, vell an-diklo.

24Kova, kay djal khetne yekeha, kay čorell, činell pes an peskro mass: yob djinell, o praasepen hounte vals ap leste, te penell lo či. Oun yob kamell či te penell.

25Kova, kay darell i menshendar, perella. Kova, kay rikrell pes ap o baro Debleste, pral koleste rikrell lo peskre vasta.

26Boud rodenn i rayes pre, te rakrenn le leha. Kova, kay dell o menshes peskro čačepen, hi kokres o baro Devel.

27Rhoyedo pral kolende, kay čilačo koova krenn, hi kolla, kay o čačepen krenn. Oun rhoyedo pral koleste, kay o čačepen krell, hi kolla, kay čilačo koova krenn.

← Chapter 28 Jump to: Chapter 30 →