bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
Ezekiel 20
Ezekiel 20
Sukuma 2019
← Chapter 19
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 41
Chapter 42
Chapter 43
Chapter 44
Chapter 45
Chapter 46
Chapter 47
Chapter 48
Chapter 21 →
1
Mu lūshikū lwikūmi ng'weji gwa katanò, ng'waka gwa mpungatī, bamò ba banamhala ba Isilaeli bakiza kūbūūja kūlī SEEBA; būshika bigasha kū būtongi bone.
2
Mhayo go ng'wa SEEBA gūnizīīla:
3
Ng'wana wa munhū, lūngalūngaga nabo a banamhala ba Isilaeli ūbawīle, “Ū Seeba MULUNGU alīhaya gīkī, ‘Ng'wizaga kūbūūja kūlī nene? Alīyo ūmo nene nalī mpanga, natūmuzunīlīja kūnibūūja mhayo;’ alīhaya Seeba MULUNGU.”
4
Alihooyaga nabo! Ng'wana wa munhū ūdūgije ū kūhooya nabo? Bizūkījage ī shītīle sha basaabo ī sh'ipelanya;
5
ūbawīle gīkī, “Ū Seeba MULUNGU alīhaya, Ū mu lūshikū nansolelaga ū Isilaeli, nakawilahīlīla ū būbyīle wa numba ya ng'wa Yakobo; niyoolecha ū kūbo balī mu Misili. Nūgoloola nkono gwane nūbawīla, ‘Ū nene nalī SEEBA Mulungu wing'we.’
6
Ū mu lūshikū lwenūlo nakabilahīlīla gīkī nakūbīnja ū mu sī ya Misili nabatwale kū sī īyo naalī nīkooba kūlwa nguno yabo; sī ya būhondo, sī yawiza kūtinda jose.
7
Nakabawīla, ‘Būlī ūmò wing'we n'agaponyage a mashigīmbo gakwe ga malofu ayo agakalalīlile, yaya ū kwikala ng'wisosohaja na shiikolile sha kūlamiwa sha Misili; ū nene nalī SEEBA Mulungu wing'we.’”
8
Alīyo bakanigomela, būlema ū kūniigwa; batagaponije a mashigīmbo gabo ga malofu ayo baalī bagakalalīlile, nūūlū a shiikolile sha kūlamiwa sha Misili batashilekile. Hū nūhaya kūbitīīla būpelanu bone, nabūmalīle kūbo ū būdaki bone aho balī mu Misili.
9
Gwike kūlwa nguno ya lina lyane, nūbeeja gwa kūlīlang'hana lītizūsosohala mu būtongi wa banhū ba mahanga abo bikalaga mubo, abo mu būtongi wabo naalī niyoolecha ū kū Baisilaeli kūlwa kūbafunya ū mu sī ya Misili.
10
Hūna lūūlū nūbafunya ū mu sī ya Misisli, nūbatongeela kūja kū sī y'itogolo.
11
Nūbinha malange gane, nī shilagīlo shane nūbakundūlīla, īsho ūlū munhū ūshidima akūbiza mpanga kūlwaasho.
12
Nīyo nī sabato jane nūbinha, jibize būmanīkījo a ha gatī yane na a boi, badeebe gīkī ū nene SEEBA hū nakabīītaga kūbiza beela.
13
Alīyo a banhū ba numba ya Isilaeli būnigomela aho balī ū mu sī y'itogolo, batashimīzīlile ū mu malange gane, nī shilagīlo shane būshilema, īsho ūlū munhū ūshidima akūbiza mpanga kūlwaasho. Ī sabato jane ī jene būjisosohaja kībi no. Hūna nūhaya nabitīīle būpelanu bone, nabamalīle ū mu sī y'itogolo.
14
Gwike kūlwa nguno ya lina lyane nūbeeja gwa kūlīlang'hana lītizūsosohala mu būtongi wa banhū ba mahanga, abo baalī baabona nalībīnja a Baisilaeli ū mu sī ya Misili.
15
Alīyo nahene nakagoloola nkono gwane nūbilahīlīla aho balī ū ng'witogolo; gīkī natūbingīja ū mu sī īyo naalī nabinha; sī ya būhondo, sī yawiza kūtinda jose.
16
Ū gwenūyū nakagwīta kūlwa nguno baalī bashilema ī shilagīlo shane, na a malange gane baalī balema ū kūgalondeela; nī sabato jane bajisosohajaga, nguno ī ng'holò jabo jalī jilolile kū shiikolile sha kūlamiwa.
17
Alīyo nūbachīla shigongo nahene, nūleka ū kūbakenaagūla nūūlū kūbamala gete aho balī kwitogolo.
18
Nūbawīla a baana babo ū kwitogolo kwenūko, Yaya a bing'we ū kūlondeela kajīle ka basīng'we, nūūlū ū kūshidima ī shilagīlo shabo, nūūlū kwisosohaja kūlwa shiikolile shabo sha kūlamiwa.
19
Ū nene nalī Seeba Mulungu wing'we, galondeelagi a malange gane, mushidime mu welwa ng'holò ī shilagīlo shane.
20
Nī sabato jane jikūjagi jiikale neela ū kū bing'we, jibize būmanīkījo a ha gatī yane na a bing'we; mudeebe gīkī ū nene hū nalī SEEBA Mulungu wing'we.
21
Alīyo na a baana babo bakanigomela, batagalondeelile a malange gane; nī shilagīlo shane batashidimile mu welwa ng'holò, nūūlū īkī ūlū munhū ūshidima akūbiza mpanga kūlwaasho; pyī nī sabato jane būjisosohaja. Hūna nūhaya nakūbitīīla būpelanu bone, ū būdaki bone nabūmalīle kūbo ū mu sī y'itogolo.
22
Gwike nūgūlemeja ū nkono gwane, na kūlwa nguno ya lina lyane nūbeeja gwa kūlīlang'hana lītizūsosohala mu būtongi wa banhū ba mahanga, abo baalī babona nalībīnja a Baisilaeli ū mu sī ya Misili.
23
Alīyo nahene nakagoloola nkono gwane nūbilahīlīla aho balī ū ng'witogolo; gīkī nakūbabbalasanya mu mahanga, nabasambaagīje hose pyī ū mu masī,
24
kūlwa nguno baalī batashiigwaga ī shilagīlo shane, na a malange gane baalī bagalemile, nī sabato jane baajikenaagūlaga, īkī a miso gabo gaalī gaadutwa na shiikolile sha kūlamiwa sha basaabo.
25
Hanuma ya henaho nakabatūūla ha sīlīlī ya malange mabi, na shilagīlo īsho shaalī shitadūgije kūbagunanha kūpandīka būpanga.
26
Nīyo nūbalekanīja bandya kwisosohaja mu nzīla ya shakwinha shabo, būyūbafunya shitambò a babyalwa babo ba kwandya; nsango gwa kogohya, badeebe gīkī ū nene hū nalī SEEBA.
27
Alilūūlū ng'wana wa munhū, bawīlage a Baisilaeli īyo nene Seeba MULUNGU nalībawīla: Gūūyū mhayo gwa koolecha gīkī a bakūlūgenji babo baalī banibengelegije kūlwa kūnileka:
28
Nguno aho nabashisha ū mu sī īyo naalī nabisagīj kūbinha, bandya kūyūfunya shitambò shabo būlī hene aho babona ka lūgūlū nūūlū ntī gwa madūūtū mingī, būyūfunya shakwinha shabo sha kūnipelanya, na shitambò sha ng'waso gwawiza, na sha kūng'wiwa.
29
Nakababūūja: A mapandī ga higūlya geneya mukikalaga ng'ūja koi, ni ga kinehe? (Kūshisha lelo gakitanagwa Bama, makūlū gaho ū mu Shihebulania ipandī lya higūlya).
30
Alilūūlū bawīlage a ba numba ya Isilseli gīkī, “Ū Seeba MULUNGU alīhaya, A bing'we mukwikala ng'wisosohaja ūmo bīītīlaga basīng'we, na kūgikūmvwa a mashigīmbo gabo ga malofu?
31
Ūlū ng'wabafunya shakwinha a baana bing'we, gīkī babize shitambò sha kūpemvwa mu moto, kūshisha lelo īyī mukwisosohajaga kūlwa mashiikolile ging'we ga kūlamiwa pye a gose. Nikale nūmuzunīlīja kūnibūūja bing'we ba numba ya Isilaeli? Ūmo nene nalī mpanga; alīhaya Seeba MULUNGU, natūmuzunīlīja kūnibūūja mhayo.”
32
Mūkūhayaga, “Tūtogilwe kūbiza gītī mahanga gangī, gītī banhū ba mu sī, abo bakalamyaga mitī na mawe.” Gwike ūyo mukūgwiganikaga gūtilonga.
33
Nguno ūmo nene nalī mpanga, alīhaya Seeba MULUNGU, nakūmusuga na nkono gwane gwa būdūla, nakūgūgoloola mu būpelanu būtaale.
34
Nakūng'wenha kūfuma kū mahanga ga banhū, nakūgoloola nkono gwane gwa būdūla mu būpelanu būtaale, namubilinge kūfuma ū kū mahanga ga banhū, kūfuma ū kū sī ījo ng'wasambaagījiwa.
35
Nakūmutwala kwitogolo lya mahanga, nakamanhye ning'we būshū kū būshū kwenūko nang'winhe nsango.
36
Ūmo nakabinhīla nsango basīng'we kwitogolo lya Misili, na a bing'we nakūng'winha nsango gīko; alīhaya Seeba MULUNGU.
37
Nakūmusuga nene ng'wenekīlī na nang'ha gwane, nang'wingīje mu būsangī wa būlagane.
38
Nakūmsūngūla nabīnje mo a bagomi na a bashitiigwa; a benabo nūūlū īkī nakūbīnja ū mu sī ījo biikalaga, alīyo nahene batingīla ū mu sī ya Isilaeli. Hūna mukūdeeba gīkī ūnene nalī SEEBA.
39
Hūna lūūlū a bing'we numba ya Isilaeli, ū Seeba MULUNGU alīhaya gīkī, Jagi; būlī ūmò wing'we akagatūmamīle a mashiikolile ging'we ga kūlamiwa! Alīyo a hanuma ya henaho mukūnidegeleka ng'oye ū kūlīsosohaja ī lina lyane lyeela mu nzīla ya kūnifunīja shakwinha shing'we na mashiikolile ging'we ga kūlamiwa.
40
Nguno ū kū sī yenīyo, ū kū lūgūlū lwa Isilaeli, ū lūgūlū lwane lwela, ī numba ya Isilaeli īkūnitūmamīla pyī ī yose; alīhaya Seeba MULUNGU, nū nene nakūbanukūla ū kwenūko. Nī shakwinha shin'gwe nakūshikoobela kwipandī lyenīlo, na a manong'ho a gawiza nī shitambò shing'we ī sheela.
41
Nīyo ūlū nūng'wīnja ū kū mahanga, nūmubilinga kūfuma ū kū sī ījo musambaalīlile, nakūng'wanukūla mubize gītī shakwinha sha ng'waso gwawiza; hūna nakwiyoolecha nalī ng'wela ū mu bing'we, na a mahanga gakūbona.
42
Ūlū nūmushisha ū mu sī ya Isilaeli, ī sī īyo nakagoloola nkono nūbilahīlīla bakūlūgenji bing'we gīkī nakūbinha, a henaho mukūdeeba gīkī ū nene nalī SEEBA;
43
nī nhūngwa jing'we mukūjiizūkwa, pyī nī shītwa shing'we īsho shang'wenheleja kūsosohala, mukwidalaha no kūlwa būbi bose ūbo ng'wawīta.
44
Bing'we numba ya Isilaeli, ū Seeba MULUNGU alīhaya gīkī, ūlū nūng'wītīla ī yenīyo kūlwa lina lyane, ītī kūlenganīla na nzīla jing'we ī jabūbi na shītīle shing'we sha malofu, mukūdeeba gīkī ū nene nalī SEEBA.
45
Ū mhayo go ng'wa Seeba gūnizīīla,
46
“Ng'wana wa munhū, galūkaga; ū būshū wako būlole dakama, ūlīlomeele ī lipandī lya dakama ūlīhūgūle; ī lipoolu lya sī ya dakama ūlīhangīle.
47
Līwīlage ī lipoolu lya dakama gīkī, ‘Gwigwage ū mhayo go ng'wa Seeba. Ū Seeba MULUNGU alīhaya gīkī, Nalī hihī kūkūpemba moto ū bebe, gwīnegeteje pyī ī mitī yako, ī midoto nī myūmu. Ū moto gwa būpī wene gūtī gwa kūjimiwa kwīngīīla dakama kūja sukuma, nīyo gūkūūmabūla būlī ng'wene ū kū būshū.
48
Pye a banhū bakūbona gīkī nene Seeba hū naagūbakije; gūtūbiza gwa kūjimiwa.’”
49
A henaho nūhaya, “Ee Seeba MULUNGU! Ūlū balīnihaya bakwiwīlaga gīkī, ‘Ū ng'wenūyū atūhayaga sumo dūhū a hene?’”
← Chapter 19
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 41
Chapter 42
Chapter 43
Chapter 44
Chapter 45
Chapter 46
Chapter 47
Chapter 48
Chapter 21 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40
41
42
43
44
45
46
47
48